Connect with us

تازه خبرونه

په افغانستان کې د امریکايي ځواکونو ډېرول شوني دي – امریکا

Ariana News

خپور شوی

 په

(Last Updated On: April 17, 2021)

امریکایي چارواکو ویلي، چې له افغانستان څخه د ټولو بهرنیو سرتېرو د ډاډمنو وتلو لپاره ښایي په شمېر کې یې ډېروالی رامنځته شي.

د امریکا د دفاع وزارت ویاند جان کربي د جمعې پر ورځ یوې خبري غونډې ته څرګنده کړې؛ دا به غوره وي، چې تر سپټمبره د لنډې مودې لپاره د سرتېرو د ډاډمنو وتلو لپاره په وړتیاوو کې ډېروالي رامنځته شي.

نوموړي د سرتېرو د رارسیدو او څرنګوالي په اړه پوره څه ندي ویلي.

هغه په دې اړه زیاته کړې؛ لکه څنګه، چې مونږ عراق پریښود، دغه راز په افغانستان کې هم مونږ لوژیستیکي او انجنري مرستې ته اړتیا لرو.

هغه دا هم ویلي، چې د امریکا دفاع وزارت اوسمهال له افغانستان سره د راتلونکیو کلونو پر امنیتي اړیکو کار کوي.

جان کربي زیاته کړې، چې امریکا به له تروریزم سره په مبارزه کې خپلې هڅې روانې ساتي او د ترهګرو د پټنځي د جوړولو مخنیوی به کوي.

کربي زیاته کړې: مونږ په دې برخه کې ډېر ظرفیتونه لرو  او زه نه غواړم پدې اړه تفصيلاتو ته لاړشم، چې مونږ دا ظرفیتونه څنګه کاروو.

هغه دا هم ویلي، چې له افغانستان څخه د بهرنیو ځواکونو وتل د اړیکو د پرې کولو معنی نلري؛ خو امریکا به د افغان ځواکونو ملاتړ روان ساتي.

دغه راز امریکايي چارواکو ژمنه کړې، چې د افغان امنیتي او دفاعي ځواکونو معاشونه به ورکوي.

طالبانو تر دې دمه په دې اړه څه ندي ویلي؛ خو مخکې یې د دې اعلان په غبرګون کې، چې د سپټمبر تر یوولسمې به امریکایي سرتېري له افغانستان څخه وځي ویلي، چې د امریکا دا کړنې به طالب جنګیالي پوځي ټینګار او مقاومت ته اړ کړي، چې مسوولیت به یې د امریکا پر غاړه وي.

تازه خبرونه

په کابل کې د دفاع وزارت د چارسمبالي پر کور موټر بم ۲۸ کسانو ته مرګ و ژوبله اړولې

Ariana News

خپور شوی

په

توسط

(Last Updated On: August 4, 2021)

کورنیو چارو وزارت د چارشنبې پر ورځ تائید کړه، چې تېره شپه اته بجې د کابل په شېرپور سیمه کې د دفاع وزارت د چارسمبالي بسم الله محمدي له کوره بهر له موټر بم بریده د یوې میرمنې په ګډون اته کسان وژل شوي او ۲۰ ډېر نور ټپیان دي.

د یاد وزارت د څرګندونو له مخې؛ له موټر بم برید سمدستي وروسته وسلوالو پر کور ډله ییز برید وکړ او له امنیتي ځواکونو سره یې پېنځه ګړۍ جګړه روانه وساتله.

په یاده څرګندونه کې راغلي: نښته تېره شپه د ځانګړیو ځواکونو او بریدګرو ترمنځ له پېنځه ګړیو نښتې وروسته پای ته ورسېده.

دغه وزارت ویلي، پېنځه بریدګر په پېښه کې ښکېل ول.

د سې شنبې پر شپه چارواکو وویل، چې د دفاع وزارت چارسمبالی بسم الله محمدي خوندي دی.

محمدي له برید څو ساعته وروسته یو ویډیويي پیغام خپور کړ او ویې ویل، چې هغه او کورنۍ یې په کابل کې د هغه پر استوګنځي له “ترهګریز برید” وروسته خوندي دي.

هغه ویلي، چې د هغه یو شمېر امنیتي ساتونکي ټپیان شوي دي.

په ورته وخت کې د ولسمشر لومړي مرستیال امرالله صالح د چارشنبې پر سهار له محمدي سره پخپل دفتر کې وکتل.

طالبانو د دفاع وزارت د چارسمبالي بسم الله محمدي پر کور د تېرې شپې د موټر بم برید مسولیت منلی او وایي، چې دا برید غچ اخیستونکی و او له برید وروسته یې ګڼ ځاني زیانونه هم رامنځته کړي دي.

دغه راز پولیسو ویلي، چې د سې شنبې د شپې پر چاودنې سربېره د چهارشنبې پر سهار شاوخوا ۸:۱۵ دقیقې د کابل د لسمې ناحیې په اړوند سیمه کې د ماین چاودنه شوې ده.

د پولیسو د څرګندونو له مخې په دې پېښه کې دوه تنه ټپیان شوي دي.

Continue Reading

تازه خبرونه

هرات ښاریانو د “الله اکبر” پر نارو پورته کولو له امنیتي ځواکونو ملاتړ څرګند کړ

Ariana News

خپور شوی

په

توسط

(Last Updated On: August 3, 2021)

د هرات زرګونه اوسیدونکیو تېره شپه (دوشنبه د زمري ۱۱) د هېواد له امنیتي او دفاعي ځواکونو څخه د خپل ملاتړ څرګندولو لپاره “الله اکبر” نارې پورته کړې.

په هرات کې له تېرو څو اوونیو راپدیخوا د امنیتي ځواکونو او طالبانو ترمنځ نښتو زور اخیستی او خلک اړ شوي، چې د امنیتي ځواکونو پر ملاتړ خپلې اندېښنې په ډاګه او د روانې جګړې د درېدو غوښتنه وکړي.

پرون د ملي شورا په ګډه غونډه کې ولسمشر اشرف غني له استازیو وغوښتل، چې د طالبانو پر وړاندې خلک راپورته او د ولسي خوزښتونو رهبرۍ ته اوږه ورکړي.

غنی دا هم ویلي، چې له کابل څخه د نویو ځواکونو پر ورتګ د طالبانو پرمختګ درېدلی او د دې ډلې پر ضد چاڼیز عملیات روان ساتل شوي دي.

د اشرف غني له څرګندونو وروسته د هرات اوسیدونکیو د خپلو کورونو له بامونو او سړکونو څخه د امنیتي ځواکونو په ملاتړ د “الله اکبر” نارې ووهلې.

د هرات د خلکو دغه شعار ته په نغوته کې ولسمشر اشرف غني څرګنده کړې:  د هرات د خلکو الله اکبر  ښیي، چې خلک د الله اکبر د مشروع  ویلو حق لري او طالب، چې څه کول غواړي؛ هغه جرم دی.

دغه راز پخواني جهادي مشر اسماعیل خان، چې په هرات کې د ولسي پاڅون مشري کوي؛ د دغه ولایت پر خلکو په ځانګړي توګه له ښځو غوښتي، چې د طالبانو پروړاندې ودریږي.

اسماعیل خان پدې اړه ویلي؛ دا د هرې میرمنې او د هرات د خلکو دنده ده، چې د ناپوهۍ له دې لښکر څخه ځانونه وژغوري. طالبان د پخوا په پرتله ډېر ناپوه او مغرور دي او که دوی له دې ناپوهۍ سره هرات ته راننوتلي وای؛ خلک به یې ډېر ځورولي او پښېمانه کړې وای، چې ولې یې پر وړاندې ونه درېدل.

د هرات والي عبدالصبور قانع ویلي، چې د هرات لویدیځه برخه هم د طالبانو له شتون پاکه شوې او امنیتي ځواکونه د ښار په سویلي برخه کې خپل عملیات روان ساتلي.

یو شمېر سرچینې آریانا نیوز ته تائیدوي، چې د هرات ښار په جنوب کې د طالبانو او امنیتي ځواکونو ترمنځ سختې نښتې روانې دي.

د افغانستان دفاع وزارت ويلي، چې په هرات ښار کې د افغان ځواکونو او ولسي پاڅونوالو په ګډو عملیاتو کې ۴۱ طالبان وژل شوي او ۳۲ نور ټپیان دي او د هرات لویې سیمې د طالبانو له شتون پاکې شوې دي.

طالبانو تر اوسه پدې اړه رسنیو ته څه ندي ویلي.

همدارنګه د ټولنیزو رسنیو یو شمېر هڅاندو یو کمپاین پیل کړی او له خلکو یې غوښتي، چې نن شپه دې په کابل کې د الله اکبر په ویلو د هېواد له امنیتي او دفاعي ځواکونو خپل ملاتړ څرګند کړي.

د دفاع وزارت ویاند فواد امان هم په دې اړه ټویت کړی او له خلکو یې غوښتي، چې د الله اکبر پر ویلو خپل امنیتي ځواکونه ونازوي.

ټاکل شوې، چې د کابل اوسیدونکي نن شپه ۹ بجې د “الله اکبر” پر ویلو له امنیتي ځواکونو خپل ملاتړ څرګند کړي.

Continue Reading

تازه خبرونه

د طالبانو تر واک لاندې افغانستان به بیا هم نړیواله پېژندنه ونلري – زلمی خلیلزاد

Ariana News

خپور شوی

په

توسط

(Last Updated On: August 3, 2021)

د افغانستان د سولې لپاره د امریکا ځانګړي استازي زلمي خلیلزاد د دوشنبې پر ورځ امریکا غږ ته ویلي، چې که طالبان دا هېواد د زور له لارې ونیسي؛ نړۍ به یې پر رسمیت ونه پېژني او یو ګوښه شوی پاریا دولت به پاتې شي.

خلیلزاد له امریکا غږ سره په خبرو کې څرګنده کړې، چې امریکا د جګړه ځپلیو افغانانو ترمنځ د سیاسي جوړجاړي هڅولو ته ژمنه ده او ټینګار یې څرګند کړی، چې د جګړې یو اړخ به هم پر جګړه بری تر لاسه نکړي.

له خلیلزاد پوښتل شوي: آیا امریکا اخلاقي او سیاسي مسوولیت او ډاډ لري، چې له وتلو وروسته به افغانستان د یوې بلې کورنۍ جګړې پر لوري نه ځي. لکه څنګه، چې په ۱۹۸۹ کې د شوروي اتحاد له وتلو وروسته رامنځته شوه؛ خلیلزاد څرګنده کړې؛ دا هغه ټکی دی، چې مونږ په پام کې نیولی. هغه څه، چې په ۹۰  لسیزه کې پېښ شول؛ باید تکرار نشي. افغانانو زمونږ پر ملاتړ ستر کار ترسره کړ او د وخت شورویان ووتل او بیا مونږ افغانستان پریښود. هغه مهال یوه سخته جګړه وشوه او بیا په ځانګړي توګه د ۲۰۰۱ کال ۹/۱۱ ننګونه ترې رامنځته شوه.

هغه زیاته کړې: ځکه، نو مونږ نه غواړو هغه تېروتنه بیا تکرار کړو. مونږ له طالبانو سره د وتلو بنسټیز تړون لرو؛ خو مونږ له طالبانو سره د خوندي وتلو د ستراتیژۍ د یوې برخې په توګه  په پام کې ونیول.

نوموړي دا هم ویلي، چې د سولې بهیر پیل هم د دې ستراتیژۍ یوه برخه ده.

د نوموړي د څرګندونو له مخې؛ د امریکا او طالبانو تړون، چې د تېر ۲۰۲۰ زېږدیز کال د فبرورۍ پر ۲۹ په دوحه کې لاسلیک شو؛ افغانانو ته دا فرصت رامنځته کړ، چې خپلمنځي خبرې پیل کړي. دا یو تاریخي پرمختګ و او ​​یو داسې فورمول ته د رسیدو لپاره یوې هوکړې ته ورسېدو، چې په افغانستان کې د خلکو او نړیوالو له پراخ ملاتړ برخمن شو.

خلیلزاد په پوره ډاډ ویلي: له بده مرغه دواړو لوریو له دې فرصته هومره، چې د افغانستان خلکو او مونږ فکر کاوه ګټه پورته نکړه.

ده ټینګار کړی، چې جګړه پوځي حل نلري؛ باید سیاسي حل او سیاسي هوکړه د تلپاتې سولې لپاره وي.

دغه راز خلیلزاد ویلي، چې افغان حکومت د نوي اسلامي حکومت د مفکورې د منلو یا نه منلو په برخه کې هم له ننګونې یا ستونزې مخ دی او طالبانو زور د دې لپاره کارولی، چې حکومت د دې نوي فارمول یا نوي اسلامي حکومت او نوي اساسي قانون منلو ته اړ کړي.

خلیلزاد وایي؛ د امریکا د څرګندونو له مخې افغان حکومت نشي کولی طالبان له منځه یوسي  او طالبان هم نشي کولی افغانستان فتح کړي او داسې حکومت ولري، چې د افغانانو د اکثریت او نړیوالو ملاتړ ورسره وي.

هغه ویلي؛ په داسې حال کې، چې طالبان امریکا ته وايي: دوی پوهیږي، چې پوځي حل نشته، کېدی شي ځینې طالبان فکر وکړي، چې د جګړې پوڅي حل شتون لري.

خلیلزاد ویلي: غوره خبره داده، چې دواړه خواوې پوره ښکېل شي او بیا سیاسي هوکړې ته، چې د خلکو غوښتنه ده غاړه کېدي.

هغه په ​​ګوته کړې؛ تېر تاریخ  په ځانګړي توګه په تېرو ۴۵ او ۵۰ کلونو کې ښودلی، چې یوې ډلې پر خلکو د خپلې ارادې تپل غوښتي، چې جګړې ترې رامنځته شوې دي.

خلیلزاد د طالبانو د وروستیو پرمختګونو په اړه ویلي، چې افغان امنیتي ځواکونه د شمېر له پلوه د طالبانو پر پرتله ډېر دي؛ دوی درې سوه زره سرتېري، هوايي او ځانګړي ځواکونه او پوره تجهیزات لري او له سیاسي او نظامي ستراتیژۍ هم برخمن دي. په هرحال حکومتي ځواکونه باید د هغو پر پرتله ډېر ښه وي.

خلیلزاد، چې په تېرو درې کلونو کې یې د ښکېلیو لوریو د واټن په لرې کولو نه ستړي کیدونکي هلې ځلې کړي؛ امریکا غږ ته ویلي، چې د پرمختګ نشتوالي ډېر اندېښمن کړی دی؛ خو دوی اړ دي، چې د ځاني ګټو پر ځای هېوادنۍ ګټې لوړې وبولي.

د خبرو په پای کې خلیلزاد د پاکستان او طالبانو د اړیکو په اړه په ډاګه کړې، چې پاکستان په دې اړه له ځانګړی مسوولیته برخمن دی؛ د طالبانو ډېري مشران په پاکستان کې دي او هلته میشته شوي. هر څومره ژر، چې کېدی شي پاکستان باید طالبان سولې او سیاسي جوړجاړي ته وهڅوي؛ ځکه، چې دا به په نړیواله کچه هم وڅیړل شي.

Continue Reading

Trending

آریانا نیوز: ټول حقونه خوندي دي