Connect with us

بلخ @ps

ولسمشر د کندوز په ارچي کې د ملکي مرګ و ژوبلې له کبله بښنه وغوښته

خپور شوی

 په

(Last Updated On: غویی ۲۷, ۱۳۹۷)

ولسمشرغني د کندوز په دشت ارچي ولسوالۍ کې د وروستۍ پېښې د عامو خلکو د مرګ و ژوبلې له کبله بښنه وغوښته او د قربانیانو له کورنیو سره یې ژمنه کړې، چې حکومت به د اوښتو زیانونو تاوان ورکوي او د پېښې له عاملانو سره به قانوني چلند کیږي.

ملي اردو هوایي ځواک د وري پر دولسمه د کندوز په ارچي ولسوالۍ کې پر یوه هوایي برید عامو خلکو ته ګڼه مرګ و ژوبله اړولې وه.

ملي دفاع وزارت له دغه برید څو ورځې وروسته د الوتکې لخوا اخیستل شوي تصویرونه رسنیز کړل، چې د پېښې په ځای کې د طالبانو موتر، مشران او جنګیالي ښیي.

له پېښې څلور دېرش ورځې وروسته د غویي پر ۱۷ ملګرو ملتونو په دې تړاو یو زړه بوږنوونکی او غونی ځیږوونکی راپور خپور کړ، چې په کې ویل شوي: په دې پېښه کې د دېرش ماشومانو په ګډون ۳۶ عام وګړي وژل شوي او د ۵۱ ماشومانو په ګډون ۷۱ نور ټپیان دي.

ولسمشر غني د دې پېښې له کبله تېره شپه په خپل تویت کې بښنه غوښتي او په ډاګه کوي، چې د فتنه جوړونکیو او قانوني حکومت تر منځ توپیر همدا دی، چې حکومت د هغې تېروتنې په تړاو، چې تر سره کوي یې، بښنه غواړي. د دغه راز پېښو له عاملانو سره قانوني چلند کیږي او حکومت خلکو ته د اوښتو زیانونو تاوان ورکوي.

له دې پېښې وروسته ملي دفاع وزارت یوه ویډیو خپره کړې وه، چې په وینا یې په دې برید کې د طالبانو کلیدي غړي وژل شوي؛ خو د سیمې خلکو له حکومته ډېر شکایت کړی دی.

د دشت ارچي اوسیدونکی وایي: دا د دستار بندۍ غونډه وه، قاري صاحبانو حفظ کړی و؛ کله، چې الوتکې راغلی لومړی یې ماشومان بمبارد کړل.

د دشت ارچي یو بل اوسیدونکي هم ویلي، چې الوتکه راغله لومړی یې پر ماشومانو برید وکړ؛ خلکو منډې کړې، خو د الوتکو بمبارد روان و.  

ملي دفاع وزارت هغه مهال ویلي وه، چې په دې هوایی برید کې د طالبانو مهم قومندانان هم په نښه شوي وه.

د کندوز د ولایتي شورا غړی امرالدین ولي وایي: نیوکه کوو، اندېښمن یو؛ حکومتي ځواکونو بریدونه کړي دي، چې په کې عام وګړي او بې ګناه ماشومان هم ول او دې کار مونږ انمدېښمن کړي یو.         

د کندوز د ولایتي شورا یو بل غړی مولوي خوش محمد ویلي دي، چې: یو له وحشته ډک ناورین و، چې نه انساني توجیه لري او نه هم اسلامي؛ ځکه د ارچي ولسوالۍ پر مدرسه برید شوی دی.                   

د بشر حقونو کمیسیون هم د ملګرو ملتونو د راپور په غبرګون کې ویلي وه، چې د ملکیانو وژونکي باید ځواب ویونکي ووسي.

د دې بنسټ مشرې د ارچي ولسوالۍ د پېښې د څېړنې غوښتنه کړې وه او  ولسمشر هم پرې ټینګار کړی و.

خبریال: علی اصغري

بلخ @ps

د آسیا پراختیایي بانک د مزارشریف ګازي برښنا پروژې ته پور ور کوي

خپور شوی

په

توسط

(Last Updated On: غبرګولى ۲۹, ۱۳۹۹)

د آسیا پراختیايي بانک او د افغان برښنا تولیدي شرکت(غضنفر ګروپ) تر منځ د ۱۰ میلیون ډالرو پر ارزښت د پور ورکړه لاسلیک شوه.

د آسیا پراختیايي بانک د څرګندونو له مخې؛ دغه لس میلیون ډالر د پور هغه برخه ده، چې د مزارشریف ګازي برښنا پروژې لپاره د مالي مرستې په توګه په پام کې نیول شوې، چې د کورنیو سرچینو له لارې د دایمي انرژۍ د ترلاسه کولو لپاره وکارول شي.

دا بانک وایي، د افغانستان په خصوصي سکتور کې دا د ګازي برښنا لومړنۍ پروژه ده، چې بودجه یې د مالي پراختیا موسساتو لخوا برابریږي. 

د آسیا پراختیايي بانک څرګندوي؛ دا تر ۲۰۳۰ کال پورې د ستراتیژۍ په نوم د بانک د اوږدې مودې بېخبنایي ستراتیژي ده، چې د افغانستان په جنګي حالاتو کې د خصوصي سکتور له لارې ترې ملاتړ کیږي.

دوی په ډاګه کړې: د آسیا پراختیایي بانک ۱۰ میلیون ډالره نوره قرضه، چې خصوصي بېخبنایي صندوق چمتو کړې هم دې پروژې ته منظوروي. دغه اوږدمهاله پور د افغانستان د مزارشریف په اړوند سیمه کې د۵۸.۵۶ میګاولټه ګازي برښنا د باوري کولو لپاره برابریږي.

د دې بانک د اعلامیې له مخې؛ دا پروژه سره له دې، چې طبعیي ګاز کاروي؛ خو ۸۹ میلیون ډالره لګښت پرې راځي، چې د کال ۴۰۴ میګاولټه ګړۍ انرژي به رامنځته کړي.

د آسیا پراختیایي بانک د بېخبنایي چارو مالي مدیرچکربورټي وایي: دا پروژه مونږ ته ډاډ راکوي، چې له طبیعي ګازو څخه د برښنا تولید به نه یوازې په افغانستان کې د وارداتي برښنا کچه راټيټه کړي، بلکې د انرژۍ امنیت هم ورسره خوندي کیږي.   

هفه زیاته کړې؛ د دې هېواد بریالي کیدل بازار ته یو اړین پیغام رسوي، چې د افغانستان د برښنا صنعت اوس په خصوصي سکتور کې د پانګې جذبولو ته چمتو شوی دي.

 د افغان برښنا تولیدي شرکت( غضنفرګروپ) مشر اسماعیل غضنفر وایي: دا د غضنفر ګروپ په پلان کې لومړنی ګام دی، چې له نړیوالو پراختیایي بانکونو، سیمه ییزو، نړیوالو شرکتونو او افغان حکومت سره د همکارۍ له لارې په افغانستان کې د ۵۰۰۰ میګا ولټه انرژۍ د تولیدي تاسیساتو په جوړولو کې مرسته کوي.

ویل کیږي، چې افغانستان لږ تر لږه ۷۵ سلنه د اړتیا وړ برښنا انرژي له بهره واردوي.

Continue Reading

بلخ @ps

نږدې ۱۰۰۰ کوترې د دانې کموالي له کبله مړې شوي دي – بلخ

خپور شوی

په

توسط

(Last Updated On: غبرګولى ۱۹, ۱۳۹۹)

د مزار شریف ښار کې د روضې په زیارت کې نږدې زر کوترې د دانې کموالي له کبله تلف شوي دي.

کرونا وبا نه یواځې چې د انسانانو ژوند له ګواښ سره مخ کړی، بلکې مزار شریف ښار کې یې د روضې  کوترو دانه هم پرې کمه کړې، ځکه چې خلک دې ځای ته نه ورځي.

سپینې کوترې چې د آزادي پیبغام رسوي، په مزار شریف ښار کې د هر چا سترګې پرې لګیږي. له کرونا مخکې هره ورځ روضې ته زرګونه کسان ورتلل، او له کوترو یې د لیدنې تر څنګ کوترو ته دانې اچولې.

درې میاشتې کیږي چې د کرونا وبا پراختیا دې ځای ته ورتګ بند کړی دی. همدې چارې د کوترو ژوند له ګواښ سره مخخ کړی، ځکه کوترې دانې نه لري.

د مزار شریف ځینې اوسېدونکي د کرونا وبا له پیلېدو سره سم پر ورځ درې بورۍ غنم او جوار کوترو ته اچوي، وایي، که نور خلک او حکومت دې برخه کې پام ونه کړي، د کوترو حالت به نور هم خراب شي.

د زیارت مسوولین وایي، د روان حالت په اړه یې له سیمه ییزو چارواکو او د ارشا، حج او اوقافو وزارت له مسوولینو سره خبره شریکه کړې، خو تر اوسه یې څېړنه نه ده شوې.

دوي له سوداګرو او خلکو غواړي چې د نورو کوترو د تلف کېدو مخنیوی وکړي.

د کوترو کره شمېره نشته، خو مسوولین وایي، شمېر یې له لس زرو ډېر دی.

Continue Reading

بلخ @ps

د اختر لمونځونه دې له روغتیايي سپارښتنو سره سم ادا شي- عالمان

خپور شوی

په

توسط

(Last Updated On: غبرګولى ۳, ۱۳۹۹)

د بغلان ولایت دیني عالمانو له هېوادوالو غوښتي، چې د اختر لمونځونه دې د حج او اوقافو او عامې روغتیا وزارتونو له سپارښتنو سره سم ادا او تر سره شي.

د بغلان ولایت د حج او اوقافو ریاست چارواکي او دیني عالمان له عامې روغتیا وزارت سره د همغږۍ له مخې په هېواد کې د کروناویروس پر خوریدو اندېښنه ښیي او غواړي، چې هېوادوال د اختر لمونځونه له روغتیایي سپارښتنو سره سم ادا کړي.

دوی په یو پرېکړه لیک کې د جوماتونو له ملاامامانو هم غوښتي، چې تبلیغ او خطبې دې د سولې په اړه رالنډې او له کرونا ویروس څخه د خلاصون پر لارو چارو را وڅرخوي.

دیني عالمانو له کرونا ویروس سره د مبارې په موخه وقایوي ګامونه پورته کړي او د هغو جوماتونو ضد عفوني پیل شوي، چې د اختر لمونځ پکې ترسره کیږي. دغه راز سپارښتنې کوي، چې لمونځ دې په پرانستي ځای کې ادا،  واټن او ماسک کارول دې مراعت شي.

د بغلان د حج او اوقافو ریاست مشر نقیب الله سجاد ویلي، چې پر کرونا ویروس اخته او شکمن کسان دې د جماعت لمانځه ته نه راځي او خپل لمونځونه دې په کورونو کې کوي.

دغه راز د بغلان امنیه قومندان محمد ویس صمیمي هم په اختر کې د جوماتونو، ښار او لویو لارو د خوندیتوب ډاډ څرګند کړی دی.

د بغلان دیني عالمانو د هیواد له اوسیدونکو څخه وغوښتل، چې اختر له خپلو کورنیو سره ولمانځي اوله کورونا ویروس سره مبارزه پوره مبارزه وکړي او د خوریدو مخه یې ونیسي؛ له ګډط ناستې، ښکلولو، غېږ کې نیولو او روغبړ څخه دې ډډه وکړي.

Continue Reading

Trending

آریانا نیوز: ټول حقونه خوندي دي