Connect with us

تازه خبرونه

وسلوالو طالبانو په فراه ولایت کې ۱۸ پولیس وژلي دي

Ariana News

خپور شوی

 په

(Last Updated On: November 26, 2018)

د فراه ولایتي شورا ویلي، چې د وسلوالو طالبانو په یوه کمین کې ۱۸ پولیس سرتېري وژل شوي دی.

 د فراه ولایتي شورا غړي داد الله قانع څرګنده کړې، چې تېره شپه د ملي پولیسو یو کاروان د دغه ولایت د لاش جوین ولسوالۍ پر لوري روان و، چې په لاره کې د وسلوالو طالبانو له یوه کمین سره مخ شو.

د نوموړي د څرګندونو له مخې؛ په دې کمین کې د لاش جوین ولسوالۍ د پولیسو د قومندان محمد اقبال په ګډون ۱۸ ملي پولیس وژل شوي دي.

دغه راز په دې پېښه کې د پولیسو د منتظره قطعې آمر شهباز باتور او د پولیسو د امنیه قومندانۍ د ریزرف ټولي مرستیال موسی دلاور هم وژل شوي او د فراه ولایت د امنیه قومندانۍ مرستیال حاجي قادر جان ټپي شوی دی.

کورنیو چارو وزارت نن له غرمې وروسته په یوه خبري ناسته کې د دغو ۱۸ پولیسو سرتېرو وژل کیدل ومنل.

ویل کیږي،چې دغه کاروان یادې ولسوالۍ ته له نوي امنیه قومندان سره وسلې او مهمات هم لیږدول، چې په لاره کې له کمین سره مخ شو.

وسلوالو طالبانو هم تر دې دمه په دې اړه څه ندي ویلي.

تازه خبرونه

په ننګرهار ولایت کې واکسیناتورانو ته مرګ و ژوبله اوښتې

Ariana News

خپور شوی

په

توسط

(Last Updated On: June 15, 2021)

د ننګرهار سیمه ییزو چارواکو څرګنده کړې؛ د لومړنیو معلوماتو له مخې د دې ولایت په بېلابېلو سيمو کې د پوليو یا ګوزڼ پر واکسيناتورانو څلور وسلوال بريدونه شوي، چې په کې څلور رضکاران وژل شوي او څلور ټپيان دي.

د ننګرهار والي ضيالحق امرخېل ویلي، لومړى بريد نن سهار شاوخوا  اووه نيمې بجې د ناڅرګندو وسلوالو لخوا د خوږیاڼو ولسوالۍ د چمتلې په اړوند سيمه کې پر دوه واکسيناتورانو شوى، چې يو رضاکار په کې وژل شوى او يو  ټپي دى.

دوه یم بريد د سهار پر اته بجو د خوږياڼو ولسوالۍ  په زوړ بازار کې پر واکسيناتورانو شوى، چې په کې يو رضاکار وژل او يو ټپي دى. 

درېيم بريد د سهار پر نهه بجو د جلال آباد ښار په درېيمه ناحيه کې پر واکسيناتورانو برید شوى، چې په کې يو رضاکار  وژل شوى او يو ټپي دى.

څلورم بريد د سهار پر ۹ نيمو بجو د سره رود ولسوالۍ په باولۍ سيمه کې پر واکسيناتورانو شوى، چې يو رضاکار په کې وژل شوى او يو ټپي دى.

د خوږياڼو ولسوالۍ امنيتي سرچينې ويلي؛ وسلوالو طالبانو د چمتلې له سيمې د واکسينو دوه رضاکاران له ځان سره ژوندي بېولي وه؛ خو د بړينې په سيمه کې ترې بېرته تښتيدلي.

د ننګرهار والي وياند عطاالله خوږياڼي پر واکسيناتورانو د څو بريدونو پخلى کړی؛ خو وايي، د قربانيانو کره شمېر اوس هم تر لاسه شوی ندی.

تراوسه کومې وسلوالې ډلې د دې بريدونو مسووليت ندى منلى.

Continue Reading

تازه خبرونه

نیول شوې سیمې به د طالبانو پر ډله ییزو ادیرو بدلې شي – امرالله صالح

Ariana News

خپور شوی

په

توسط

(Last Updated On: June 15, 2021)

د ولسمشر اشرف غني لومړي مرستیال امرالله صالح خبرداری ورکړی؛ هغه لارې، چې وسلوال طالبان پرې د ولسوالیو د نیولو لپاره راغلي؛ د دوی پر ډله ییزو ادیرو به بدلې شي.

امرالله صالح نن په خپله فیسبوک پاڼه کې لیکلي: یو شمېر هغه سیمې، چې نیول شوي نومول شوي؛ طالب په کې د یوې نرۍ کرښې پر جوړولو پرمختګ کړی دی.

“نوموړي څرګنده کړې؛ هغه کسان، چې له طالبانو سره جګړه پېژني؛ پوهیږي، چې دا نرۍ کرښې به د دغې وحشي او ناپوهې ډلې پر ډله ییزو قبرونو بدلې شي.

امرالله صالح ټینګار کړی؛ له خلکو سره د طالبانو په چلند کې هیڅ راز بدلون ندی راغلی، بلکې نور هم وحشي او ناپوه شوي دي.

هغه دا هم په ډاګه کړې، چې خلک باید د طالبانو پر پروپاګندونو ونه غولیږي.

امرالله صالح وایي: د طالبانو پروړاندې درېدل له انساني ارزښتونو او کرامته دفاع کول دي. طالب له اطاعت او غلامۍ پرته د دې هېواد خلکو ته بل پیغام نلري.

طالبانو تر دې دمه د امرالله صالح څرګندونو ته کوم غبرګون په ډاګه کړی ندی.

د ویلو ده، چې طالب جنګیالیو په تېره یوه میاشت کې لږ تر لږه ۳۰ ولسوالۍ تر څارنې لاندې راوستي دي او له تېرو څلیریشت ګړیو راپدیخوا یې د سرپل سید آباد، د هرات اوبه او د کندوز خان آباد ولسوالۍ نیولې دي.

Continue Reading

تازه خبرونه

ناټو د افغان ځواکونو روزنې لپاره په قطر کې د اډې جوړولو هڅې کوي

Ariana News

خپور شوی

په

توسط

(Last Updated On: June 14, 2021)

ناټو تړون د بهرنیو ځواکونو له وتلو وروسته په قطر کې د افغان ځواکونو د روزنې لپاره د یوې پوځي اډې د جوړولو هڅې پیل کړي دي.

ویل کیږي، چې د ځواکونو له وتلو وروسته به د ناټو دغه اقدام له افغان ځواکونو سره د دې تړون د ژمنو یوه برخه وي.

دغه تړون به له شاوخوا دوه لسیزو وروسته خپل ماموریت په را روان سپټمبر کې پای ته ورسوي.

د ناتو یوه چارواکي، چې د نوم  له ښودلو ډډه کړې؛ رویټرز ته د خبرو پر مهال ویلي: مونږ په قطر کې د افغان ځواکونو د لوړ پوړیو غړیو د روزنې لپاره د یوې اډې پر جوړولو خبرې کوو.

د ناټو د ماموریت بنسټیزه برخه د وسلوالو طالبانو پر وړاندې د افغان ځواکونو له روزنې او تجهیز پوره  ملاتړ دي.

سرچینې زیاته کړې: مونږ یوه طرحه وړاندیز کړې؛ خو په دې اړه پرېکړه د قطري چارواکو پورې اړه لري، چې په خپله خاوره کې ناټو ته د روزنتون ځای ورکوي او کنه.

په کابل کې میشت یوه ډیپلوماټ هم رویټرز ته ویلي، چې قطر ته د ۴ څخه تر ۶ میاشتو روزنې لپاره د افغان ځانګړيو ځواکونو د غړيو رالېږدول تر بحث لاندې دي.

ناټو، قطراو افغان حکومت تر دې دمه په رسمي بڼه د دې راپور په اړه څه ندي ویلي.

Continue Reading

Trending

آریانا نیوز: ټول حقونه خوندي دي