د امریکا د سولې د نوبل جایزې ګټونکی پخوانی ولسمشر جیمي کارټر د ۱۰۰ کلونو په عمر له اوږدې ناروغۍ وروسته مړ شو.

جیمي کارتر د امریکا نهه‌دېرشم ولسمشر د جورجیا د مونګلو یو کروندګر و، چې د امریکا د ولسمشر په توګه یې ۱۹۷۸د اسرائیلو او مصر ترمنځ د سولې منځګړیتوب وکړ او په ۲۰۰۲ کال کې یې د بشري کار لپاره د نوبل د سولې جایزه ترلاسه کړې ده.

د رویټرز د راپور له مخې نوموړی د یکشنبې پر ورځ په خپل کور کې مړ شو.

جیمي کارټر د جورجیا له یوه فارم څخه د امریکا ولسمشرۍ ته نوماند شو او په ۱۹۷۷ کې یې ولسمشر جیرالډ فورډ ته په ټاکنو کې ماتې ورکړه او د خپل هېواد ولسمشر شو.

کارټر له ولسمشرۍ مخکې د امریکا له سمندري اکاډمۍ څخه فارغ شو؛ دوه دورې یې د جورجیا ایالت سناتور او د والي په توګه دنده ترسره کړې.

هغه د ولسمشرۍ یوه سخته څلور کلنه دوره تېره کړه، انفلاسیون او بېکارۍ د هغه د حکومت لومړیتوبونه اغېزمن کړل؛ خو په بهرنۍ تګلاره کې یې لاس ته راوړنې لرلې.

د نړۍ مشرانو او د امریکا پخوانیو ولسمشرانو هغه ته درناوی درلود او په منځني ختیځ کې د مهربانه، عاجز او ژمن انسان په توګه وستایل شو.

کارټر د امریکا د هر ولسمشر څخه ډېر اوږد ژوند وکړ؛ خو په ایران کې د یرغمل شویو کسانو پېښې یې په واکمنۍ سیوری وغوړوه او د ۱۹۸۰ کال په ولسمشریزو ټاکنو کې یې د ناکامۍ یو لامل شو. په ۱۹۸۱ کال کې د سپینې ماڼۍ له پرېښودو وروسته د یو ژمن بشرپالي په توګه شهرت ته ورسېد.

د جنوبي کوریا د اور وژنې ملي ادارې ویلي، لږ تر لږه ۶۲ کسان هغه مهال ووژل شول کله، چې یوه الوتکه له ځغاستلیکې ووته او د مون نړیوال هوايي ډګر له یوه دیوال سره ټکر شوه.

یاد بنسټ ویلي، چې د الوتکې دوه کسان ژغورل شوي دي.

د سویلي کوریا د ټرانسپورټ وزارت ویلي، نن سهار پر سیمه‌ییز وخت څه نا څه ۹ بجې ججو ایر الوتکه 7C2216 چې ۱۷۵ مسافر او شپږ عمله په کې سپاره ول د ټایلینډ له پلازمېنې بنکاک څخه والوته او د دې هېواد د سویل په هوایي ډګر کې راکښته شوه.

یاد وزارت د مرګ او ژوبلې راپورونه تائید کړي ندي.

د اور وژنې یوه بل چارواکي رویټرز ته ویلي چې لږترلږه ۵۸ مړي موندل شوي؛ خو دا شمېر وروستی ندی.

د مون د اور وژنې یوه چارواکي ویلي، د الوتکې د عملې دوه کسان ژوندي موندل شوي او د نورو د ژغورنې عملیات روان دي.

یونهاپ خبري سرچینې ویلي، چې درې کسان ژغورل شوي دي.

د هوايي ډګر یوه چارواکي رویټرز خبري سرچینې ته ویلي، د الوتکې په دم برخه کې د خلکو د ژغورنې لپاره کار روان دی.

د ځایی رسنیو لخوا شریکې شوې ویډیو ښودلې، چې دوه انجنه لرونکې الوتکه پرته له دې، چې ټیر یې خلاص شي پر ځغاستلیکه را کښته کیږي؛ اور پرې لګیږي او له دیوال سره ټکر کوي.

یونهاپ د هوايي ډګر د چارواکو د څرګندونو له مخې ویلي، چې ښايي ټیر یې په هوا کې د مرغۍ د لګېدو له کبله خراب شوی وي.

د نیوز ۱ خبري سرچینې د راپور له مخې؛ یو مسافر خپل خپلوان ته پیغام ورکړی، چې یوه مرغۍ د الوتکې په وزر کې بنده ده. د دې سړي وروستی پیغام دا و، " آیا خپله وروستۍ خبره ووایم؟"

د ټرانسپورټ وزارت د هوایي چلند څانګې یوه چارواکي ویلي؛ د الوتونکې نښلېدل یو نظر دی، چې تائید شوی ندی او په اړه یې څېړنې روانې دي.

د ټرانسپورت وزارت د څرګندونو له مخې؛ په مسافرو کې دوه د ټایلینډ وګړي او پاتې نور ښایي د سویلي کوریا وګړي وي.

د هوایی ډګر ویاند ویلي؛ دا الوتکه بوینګ 737-800 جټ الوتکه وه، چې د ججو ایر لخوا اداره کېده.

بوینګ او د امریکا فډرالي هوایي چلند ادارې تر دې دمه د نظر غوښتنې پوښتنو ته ځواب ندی ورکړی.

یونهاپ راپور ورکړی، چې د مون په هوایي ډګر کې ټولې کورنۍ او نړیوالې الوتنې لغو شوې دي.

د سویلي کوریا چارسمبالي ولسمشر چوی سنګ موک، چې د جمعې پر ورځ د روان سیاسي کړکېچ په بهیر کې د مخکیني چارسمبالي ولسمشر له استیضاح وروسته د دې هېواد لنډمهالی مشر ټاکل شوی؛ د دفتر د څرګندونو له مخې؛ د ژغورنې د هر اړخیزو هڅو امر شوی دی.

د نوموړي د دفتر رییس بېړنۍ غونډه جوړه کړې ده.

د سوریې انتقالي ادارې د پنجشنبې پر سهار څرګنده کړې، چې په طرطوس ښار کې د پخواني رژیم د وفادارو ځواکونو د برید له کبله د دې هېواد څوارلس پولیس سرتېري وژل شوي دي.

 د سوریې کورنیو چارو نوي وزیر په یوه ټیلیګرام کې ویلي، چې په طرطوس کې د بشارالاسد د حکومت پاتې شونو ۱۰ پولیس هم ټپیان کړي او خبرداری یې ورکړی؛ «هر هغه څوک، چې د سوریې د امنیت د خرابولو یا د دې هېواد د وګړو ژوند په خطر کې اچولو جرأت وکړي؛ وبه‌ځپل شي.

له دې مخکې، دولتي رسنیو راپور ورکړی و، چې د سوریې پولیسو په حمص ښار کې له هغې وروسته پر تګ راتګ بندیز ولګاوه، چې د علوي اقلیت او شیعه مسلمانانو لخوا د لاریونونو له کبله امنیتي اندېښنې رامنځته شوې.

دولتي رسنیو راپور ورکړی، چې د یوې شپې لپاره ګرځ‌بندیز د ماښام له ۶ بجو څخه د سهار تر ۸ بجو پورې نافذ و.

د سوریې نویو مشرانو په وار وار ژمنه کړې، چې له مذهبي اقلیت ډلو څخه به ساتنه کوي.

د سوریې سواحلو ته نږدې په نورو سیمو کې هم لاریونونه ترسره شوي، چې د طرطوس په ګډون د هېواد ډېری علوی اقلیت په کې ژوند کوي.

دغه لاریونونه له هغې وروسته تر سره شوي، چې په ټولنیزو رسنیو کې یوې ناڅرګندې بې نېټې ویډیو په حلب ښار کې د علویانو په یوه زیارت کې اور لګېدنه ښيي؛ وسلوال کسان شاوخوا ګرځي او د انسانانو د مړیو تر څنګ انځورونه اخلي.

د سوریې د کورنیو چارو وزارت ویلي؛ دا ویډیو د نومبر په وروستیو کې پر حلب د بشارالاسد د ناپېژاندو مخالفانو د عملیاتو په اړه وه.

یاد وزارت زیاته کړې؛ څوک، چې اوس دا ویډیو خپروي په ښکاره فرقه‌یي شخړو ته لمن وهي.

د کورنیو چارو وزارت دا هم ویلي، چې د پخواني نظام ځینو غړیو د چارشنبې پر ورځ د سوریې په ساحلي سیمه کې د دغه وزارت پر ځواکونو برید کړی، چې ګڼ شمېر پولیسو ته یې مرګ او ژوبله اړولې ده.