Connect with us

تازه خبرونه

زمونږ مخالفین د افغان کډوالو په پنډغالو کې د ځان ملګري لټوي- باجوه

Ariana News

خپور شوی

 په

(Last Updated On: سلواغه ۳۰, ۱۳۹۶)

د پاکستان لوی درستیز ویلي، چې حقاني شبکه او د پاکستان وسلوال طالبان د افغان کډوالو په پنډغالو کې د ځان ملګري لټوي.

د پاکستان لوی درستیز قمر جاوید باجوه د جرمني د مونیخ په امنیتي کنفرانس کې تور لګولی، چې د افغانستان په خاوره کې د پاکستان پر ضد بریدونه تنظیمیږي.

باجوه د افغانستان کړکیچ ډېر پېچلی ګڼلی او زیاته کړې یې ده، چې افغان کډوالو د پاکستان امنیت ته ګواښ پېښ کړی دی.

د نوموړي په وینا؛ د پاکستان پوځ القاعده، د پاکستانيو طالبانو تحریک او جماعت الحرار ډلې ماتې کړي، خو دغه ډلې اوس هم په افغانستان کې مرکزونه لري. مونږ اوس هم دوه اعشاریه اووه میلیون افغان کډوالو ته ځای ورکړی، چې د پاکستانيو طالبانو او حقاني شبکې لخوا کارول کیږي. مونږ غواړو، چې افغان کډوال له پاکستان څحه خپل هېواد ته ستانه شي.

باجوه دا هم ویلي، چې د ديورند کرښې د څارنې لپاره یې یو طرفه ګامونه اوچت کړي؛ خو ترهګر د نړۍ لپاره ګواښ دی، چې د مبارزې لپاره یې باید ټوله نړۍ یو موټی شي.

باجوه زیاته کړې؛ تېر کال په پاکستان کې شاوخوا یو سل و درویشت بریدونه تر سره شوي، چې په افغانستان کې تنظیم شوي وه. مونږ د افغانستان ستونزه درک کوو؛ نو، ځکه یې نه ملامتوو، خو په دې هم پوهیږو، چې د افغانستان ناامنيو مونږ ته زیان اړولی دی.

افغان چارواکي بیا وايي، چې ټولې ترهګرې ډلې په پاکستان کې دي او د پاکستان په ملاتړ پر افغانستان بریدونه کوي.

د ملي د فاع وزارت ویاند دولت وزیری وایي؛ باجوه نه مني، چې ترورستان دې په پاکستان کې وي. د هغه په باور ترهګر خپل بریدونه له افغانستان څخه تنظیموي. ای کاش، چې پاکستان د ترورستانو له ملاتړه لاس واخلي؛ ځکه، چې دا نه یوازې د افغانستان په ګټه ده، بلکې پاکستان او نړۍ ته هم ګټه رسوي.

د کورنیو چارو وزارت مرستیال ویاند نصرت رحیمي وایي، مونږ تل له امریکا غوښتي، چې د طالبانو او نورو ترورستانو مرکزونه په پاکستان کې دي او باید بمبارد شي. که داسې ونشي افغانستان به ناامنه وي.

افغانستان تل پاکستان ته د ملامتیا ګوته نیسي او له دغه هېواده غواړي، چې د افغان دولت د وسلوالو مخالفینو او نورو سخت دریځو ډلو له ملاتړه لاس واخلي.

خبریال: فواد ناصري

تازه خبرونه

طالبانو کابل ته نږدې د خپلو پراخو هڅو ویډیو خپره کړې

Ariana News

خپور شوی

په

توسط

(Last Updated On: تله ۵, ۱۳۹۹)

طالبانو د یوې ویدیو په خپرولو وښوده، چې د پېنځمې حوزې په اړوند باغ داوود، پنجه چنار او د ارغندې په حیدرخان کلا سیمو کې فزیکي حضور لري او د شپې  د کمپنۍ بازار او کمپنۍ پله ساحو ته را وځي؛ د لویو لارو د امنیت په اړه له موتر چلوونکیو او خلکو پوښتنې کوي.

په دغو سیمو کې خلکو ویلي؛ د طالبانو سره قطعه وخت ناوخته په دې سیمه کې د امنیتي ځواکونو پر پوستو بریدونه هم کوي.

د کابل ښار د کمپنۍ پله د اړوند سیمې اوسېدونکي اتل ویلي؛ دا لومړی ځل دی، چې طالبان د کابل ښار د پېنځمې حوزې په اړوند سیمو کې شپه مهال سړک ته راوځي او له خلکو د امنیتي حالت په تړاو پوښتنې کوي.

د کابل ښار د کمپنۍ د بازار یوه بل اوسېدونکي ویلي؛ دوه شپې مخکې طالبانو د کوټې سنګي – کمپنۍ څلور لاري په اوږدو کې د څو ساعتونو لپاره د تلاشۍ پوسته جوړه کړې وه او امنیت په تړاو یې له خلکو پوښتنې کولې.

د امنیتي پوستو سرتېرو ویلي؛ په شپه کې پرې د طالبانو سره قطعه حملې کوي او د واټ پر غاړوماینونه ږدي، چې د پوځیانو کاروانونه په نښه کړي؛ خو کورنیو چارو وزارت دغه اړوند خبرې ردوي.

په دوحه کې د افغانانو د خپلمنځي خبرو له پرانیستو سره جوخت د هېواد په زیاترو سیمو کې د طالبانو او امنیتي ځواکونو نښتې زیاتې شوي؛ خو اوس په کابل کې د طالبانود یوې خپرې شوې ویدیوي څرګندونو له مخې پراخ ښاري شون لري، چې دې کار د ښار اوسیدونکي اندیښمن کړي دي.

Continue Reading

تازه خبرونه

ولسمشر غني او د پاکستان لومړي وزير په افغانستان کې پر اوربند ټینګار کړی

Ariana News

خپور شوی

په

توسط

(Last Updated On: تله ۵, ۱۳۹۹)

د افغانستان ولسمشر اشرف غني او د پاکستان لومړي وزير عمران خان د تیلیفوني اړیکې له لارې د دواړو هېوادونو د اړيکو، سولې بهیر او په افغانستان کې د اوربند پر ټينګښت خبرې اترې کړې دي.

په دې تیلیفوني خبرو اترو کې ولسمشر اشرف غني د اوربند پر ټينګښت ځانګړی ټينګار کړی او د پاکستان لومړي وزير ته يې افغانستان ته د رسمي سفر بلنه هم ورکړه.

د پاکستان لومړي وزير عمران خان ويلي، مونږ په افغانستان کې د اوربند له ټينګښت بشپړ ملاتړ کوو او د ولسمشر اشرف غني له بلنې په مننه يې زياته کړې، په نږدې راتلونکې کې به کابل ته سفر وکړي.

د پاکستان جیو تلویزیون په ډاګه کړې، چې پاکستان به له هغو پرېکړو ملاتړ وکړي، چې د افغانستان خلک به د خپل راتلونکي په اړه پرې ټینګار کوي.

لومړي وزیر عمران خان د پاکستان او افغانستان  پر رغنده اړیکو ټینګار کړی او وایي، چې مونږ د دې هېواد سوله ، ثبات او د خلکو سوکالي غواړو.

دغې سرچینې څرګنده کړې، چې د ملي پخلاینې عالي شورا رییس عبدالله عبدالله به راتلونکې اوونۍ اسلام اباد ته سفر وکړي.

Continue Reading

تازه خبرونه

طالبان به له سیاسي هوکړې مخکې اوربند ونه مني- خلیلزاد

Ariana News

خپور شوی

په

توسط

(Last Updated On: تله ۵, ۱۳۹۹)

په افغانستان کې د سولې لپاره د امریکا ځانګړی استازی زلمی خلیلزاد ویلي؛  فکر نکوي، چې طالبان به له سیاسي هوکړې مخکې اوربند وکړي.

زلمي خلیل زاد تېره شپه پی بی ایس نیوز ته ویلي:  فکر کوم، چې تاسې برحقه یاست؛ تر هغې، چې سیاسي هوکړه ونشي طالبان به دایمي او هر اړخیز اوربند ونه مني.

خلیلزاد ویلي: مونږ ژمن یو، چې د تاوتریخوالي د کمولو په اړه یوې هوکړې ته د رسیدو لپاره له دواړو خواوو سره کار وکړو. مونږ به په راتلونکیو څو میاشتو کې د خپلو ځواکونو ۴ یا ۵ زره ته له رسولو وروسته ارزونه وکړو، چې طالبان د خپلو ژمنو د پلي کولو تر کوم ځایه رسیدلي دي.

د افغانستان لپاره د امریکا ځانګړی استازی دا ردوي، چې مستقیما د افغانستان د سولې په خبرو کې دخیل ندی؛ خو ټینګار کوي، چې واشنګتن د داسې یوې هوکړې ملاتړ کوي، چې د ټولو افغانانو په ځانګړي توګه د ښځو او لږکیو حقونو ته درناوی وشي.

نوموړی وایي: مونږ د دې خبرو د بریالیتوب لپاره هیڅ وخت ندی ټاکلی، مونږ په مستقیم ډول په مذاکراتو کې دخیل نه یو، دا د افغانانو تر منځ خبرې دي. دوی ونه غوښتل، چې بهرنیان په کې د آسانتیاوو د برابروونکيو او منځګړيو په توګه برخه ولري.

دغه راز د پاکستان لومړي وزیر عمران خان هم د ملګرو ملتونو پېنځه اویایمې اسامبلې ته ویلي، هېواد یې د افغانستان د سولې په بهیر کې خپل مسوولیت په پوره ډول سر ته رسولی دی.

نوموړي ویلي: پاکستان … ډېر خوښ دی، چې د افغانستان د سولې په بهیر کې یې د خپل مسوولیت یوه برخه تر سره کړې ده. افغان مشران باید سولې ته د رسېدو او پخلاینې ته د لاسرسي لپاره  له دې تاریخي فرصت ګټه واخلي.

ټاکل شوې، چې د ملي پخلاینې عالي شورا مشر عبدالله عبدالله د پاکستان د لومړي وزیر په بلنه د افغانستان د سولې په بهیر کې د سیمه ییزې اجماع پیاوړتیا لپاره پاکستان ته په نږدې راتلوونکیو ورځو کې سفر وکړي.

دا په داسې حال کې ده، چې د افغانستان ولسمشر اشرف غني او د پاکستان لومړي وزير عمران خان د تیلیفوني اړیکې له لارې د دواړو هېوادونو د اړيکو، سولې بهیر او په افغانستان کې د اوربند پر ټينګښت خبرې اترې کړې دي.

Continue Reading
Advertisement

Trending