Connect with us

تازه خبرونه

د ۴۰ کلنې جګړې پای ته رسول له زغم پرته ناشوني دي ـ خلیلزاد

خپور شوی

 په

(Last Updated On: تله ۱۶, ۱۳۹۹)

د افغانستان د سولې لپاره د امریکا ځانګړي استازي زلمي خلیلزاد ویلي؛ خبرې کوونکې خواوې باید د داسې یوې سولې په تکل کې وي، چې هیڅ بایلونکي یا ګټونکی ونلري.

ښاغلي خلیل زاد په ډاګه کړې؛ طالبان د افغانستان حکومت نه تر لاسه کوي، بلکې د حکومت یوه برخه به وي. ټولې خواوې باید ځانونه په دې حکومت کې ومومي؛ ځکه حکومت باید ټولډونه وي.

د افغانستان د سولې لپاره د امریکا ځانګړي استازي له آزادۍ رادیو سره په مرکه کې څرګنده کړې: خبرې زغم ته اړتیا لري؛ مونږ وړاندوینه نشو کولی، چې ۴۰ کلنه جګړه به څومره اوږده شي؛ خو څومره، چې ژر وي هومره به ښه وي.

زلمي خلیلزاد ویلي: اړینه ده، چې صبر ولرو؛ یو بل ومنو او داسې یوې پایلې ته ورسیږو، چې ټولو ته د منلو او پلي کولو وړ وي.

هغه زیاته کړې؛ دواړه خواوې باید د داسې یوې لارې موندلو لپاره چمتو شي، چې په کې نه یو ګټونکی وي او نه یو بایلونکی، بلکې ګټونکي په کې د افغانستان خلک وي او ورسره روانه اوږده جګړه پای ته ورسیږي، چې هره ورځ په کې افغانان وژل کیږي او یا مالي او ځاني زیان ورته رسیږي.

هغه دا هم ویلي، چې د افغانانو ترمنځ د خبرو اترو د پرمختګ یو له ترټولو مهم خنډ د تاوتریخوالي لوړه کچه ده، چې د دواړو لوریو تر منځ د بې باورۍ لامل کیږي.

خلیلزاد وایي: مونږ د تاوتریخوالي د کمولو غغوښتونکي یو. مونږ د دوحې په غونډه کې هم غوښتنه وکړه ، چې تاوتریخوالی باید کم شي.

هغه زیاته کړې، چې دواړه خواوې د خبرو د پرمخ بیولو لپاره تر دې دمه یوې هوکړې ته ندي رسیدلي.

خلیل زاد ویلي، چې امریکا ټولو خواوو ته ټینګار مړی، چې د افغانستان د راتلونکې په اړه د امریکا پالیسي  د نوي سیاسي نظام پر جوړښت د خپلمنځي خبرو اترو د پلاوو له پرېکړې سره تړاو لري، چې د ټولو افغانانو هیلو ته په کې درناوی په ډاګه شي.

هغه دا هم ویلي، چې له افغانستان سره د امریکا مالي ملاتړ هم د دوی له پرېکړو سره تړلی دی.

دغه راز ولسمشر اشرف غني قطر ته د دوه ورځني سفر په بهیر کې، د حکومت او رسنیو د استازیو له یوه پلاوي سره د افغانستان د سولې په اړه وکتل؛ خو له طالب پلاوي سره یې لیدنه نده شوې. یوازې د هېواد د رسنیو استازیو د طالبانو د رسنیو له استازیو سره لیدلي دي.

 

 

همدارنګه د بهرنیو چارو وزارت چارسمبالي حنیف اتمر پرون له خبریالانو سره په خبرو کې ویلي، چې د حکومت د خبرو اترو ډله پدې مرحله کې پر درې ټکو راڅرخي.

د قطر په پلازمېنه دوحه کې حنیف اتمر خبریالانو ته د خبرو پرمهال ویلي، چې د افغانانو تر منځ د خبرو لومړی اختلافي ټکی د خبرو د ژر تر ژره پای ته رسیدو لپاره لار اوارول دي.

دوه یمه مسله د تاوتریخوالي کمول دي. دا د افغانستان د ټولو خلکو غوښتنه ده، چې باید ژر تر ژره پلی شي.

درېیمه مسله دا ده، چې د خبرو اترو پلاوي باید ژر تر ژره سیاسي هوکړې ته ورسیږي.

د ښاغلي اتمر په وینا؛ دا هوکړه باید په هېواد کې وینه تویدل ودروي او د ټولو ستونزو د حل لامل شي، چې جګړه پرې روانه ده.

تازه خبرونه

په جلال آباد ښار کې ۴ چاودنو ۲۱ کسانو ته مرګ و ژوبله اړولې

خپور شوی

په

توسط

(Last Updated On: وږی ۲۷, ۱۴۰۰)

د ننګرهار ولایت د جلال آباد ښار په بېلابېلو سیمو کې څلور پرله پسې چاودنو دوه کسان وژلي او ۱۹ نور ټپیان دي.

د ننګرهار عامه روغتون ويلي، له دغو پېښو څخه ۲ مړي او ۱۹ ټپيان وروړل شوي، چې د ځېنو روغتیایي حالت د اندېښنې وړ دی.

د دغو پېښو عيني شاهدانو ويلي؛ دغه چاودنې د جلال اباد ښار د پنځمې حوزې په مربوطاتو کې شوي او په قربانیانو کې ښځې او ماشومان هم شامل دي.

د دې پېښې لامل او انګیزه اوس هم روښانه نده او هیچا هم د دغو چاودنو مسوولیت پر غاړه ندی اخیستی.

دا په داسې حال کې ده، چې نن سهار د کابل ښار د ۱۳ ناحیې د ۴۰ مټره سړک د عرفاني ښارګوټي په اړوند سیمه کې هم ماین چاودنه شوې ده.

Continue Reading

تازه خبرونه

قطري الوتکې له کابل هوایي ډګره یو شمېر بهرني وګړي ایستلي

خپور شوی

په

توسط

(Last Updated On: وږی ۲۷, ۱۴۰۰)

د افغانستان لپاره د امریکا ځانګړي استازي زلمي خلیلزاد په خپل ټویټ کې په ډاګه کړې، چې پرون په یوه قطري الوتکه کې د کابل له هوایي ډګره یو شمېر امریکایي او اروپایي ملکي وګړي وتلي دي.

خلیلزاد له دې پرمختګه هرکلی کړی او ویلي یې دي، چې د جو بایډن د حکم له مخې، د امریکایانو د وتلو لپاره هیڅ مهالوېش نشته؛ خو که وغواړي، چې کورونو ته ستانه شي. مونږ ژمن یو، چې دوی راوباسو.

تېره میاشت د امریکایي ځواکونو له وتلو وروسته دا درېیمه کرایه شوې الوتنه ده، چې له افغانستان څخه ملکي وګړي قطر ته لېږدوي.

یوه قطري چارواکي رویټرز ته ویلي، چې د جمعې پر ورځ په الوتکه کې نږدې ۱۷۰ امریکایي او اروپایي وګړي سپاره ول.

په دې الوتکه کې د بلجیم، انګلستان، کروشیا، جرمني، هالینډ، ایټالیا او امریکا وګړي لېږدول شوي دي.

د یادونې ده، چې قطر د لویدیځ او اسلامي امارت تر منځ د لېږد د بهیر منځګړی غوره شوی دی.

Continue Reading

تازه خبرونه

سیمه ییز هېوادونه له اسلامي امارت سره د امریکا د اړیکو غوښتونکي شول

خپور شوی

په

توسط

(Last Updated On: وږی ۲۷, ۱۴۰۰)

روسیې، چین، پاکستان، ایران او د سیمې نورو هېوادونو پرون (جمعه د وږي ۲۶ / د سپټمبر ۱۷ ) د شانګهای هېوادونو د ناستې په څنډه کې له امریکا وغوښتل، چې له افغانستان اسلامي امارت سره د تعامل او معاملې لار خپله کړي.

دغو هېوادونو پر امریکا غږ کړی، چې له افغانستان سره خپلې مرستې روانې وساتي.

دغه راز دغو هېوادونو له اسلامي امارت هم غوښتي، چې یو ټولمنلی پراخ حکومت جوړ کړي.

د شانګهای د همکارۍ سازمان په دې غونډه کې د افغانستان برخلیک یوه توده موضوع وه.

د رویټرز د څرګندونو له مخې، دغو هېوادونو ویلي، چې دا د لویدیځ او په ځانګړي توګه د امریکا مسوولیت دی، چې په افغانستان کې د رامنځته کېدونکې بشري ناورین مخه ونیسي.

د روسیې ولسمشر په دې ناسته کې وړاندیز کړی، چې له طالبانو سره باید د تماس ‌ډله جوړه شي.

د هغه په باور دا اقدام کولی شي، چې طالبان د ژمنو پلي کولو ته غاړه کېدي.

د روسیې ولسمشر ولادمیر پوتین ویلي: له جګړې وروسته د افغانستان د بیارغونې ډېری لګښتونه باید د امریکا او ناټو هېوادونو لخوا ورکړ شي؛ ځکه دوی په افغانستان کې د اوږدمهاله شتون د پایلو مسوولیت پر غاړه لري.

پوتین له امریکا وغوښتل، چې د افغانستان بانک پانګه آزاده کړي؛ ځکه له دې پرته به د اسلامي امارت مشران د مخدره توکو او وسلو سوداګري پیل کړي.

د چین ولسمشر شي جین پینګ د امریکا له نوم اخیستو پرته ویلي، چې ځینې ځانګړي هېوادونه باید د افغانستان د راتلونکي مسوولیت پر غاړه واخلي؛ ځکه، چې مسوولیت لري.

د پاکستان لومړي وزیر که څه هم خبرداری ورکړی، چې په اوسنیو شرایطو کې د افغانستان یوازې پرېښودل به ناوړه پایلې د سیمې هېوادونو ته ولري؛ خو طالبان غواړي، چې د پراخ بنسټ حکومت د جوړېدو لپاره پخپلو ژمنو عمل وکړي.

د پاکستان لومړي وزیر عمران خان ویلي، چې په افغانستان کې باید بشري او اقتصادي کړکېچ لومړی له منځه یوړل شي.

نوموړي زیاته کړې، چې پخواني افغان حکومت پر بهرنیو مرستو تکیه کوله او د دا ناکامي به د اقتصادي سقوط لامل شي.

د پاکستان لومړي وزیر ویلي، چې اسلامي امارت باید یو داسې هر اړخیز سیاسي جوړښت رامنځته کړي، چې په کې ټول توکمونه برخه واخلي او د نورو هېوادونو پروړاندې د افغان خاورې د کارولو مخه ونیسي.

په داسې حال کې، چې تاجکستان په افغانستان کې د یوه پراخ بنسټ حکومت جوړېدل غواړي او د خلکو له خوښې پرته د سیاسي نظام تپل د نه منلو وړ اټکل له ځان سره لري.

Continue Reading

Trending

آریانا نیوز: ټول حقونه خوندي دي