Connect with us

تازه خبرونه

د کورنیو چارو وزارت د بې پامۍ له کبله جلریز ولسوالي سقوط شوې

خپور شوی

 په

Photo: Social Media
(Last Updated On: غبرګولى ۱, ۱۴۰۰)

د میدان وردګ ولایت د جلریز ولسوالۍ امنیه قومندان مجیب الله امیني ویلي، چې دا ولسوالي درې ورځې طالبانو کلابند کړې وه او کورنیو چارو وزارت هم ترې ښه خبر و.

د میدان وردګ ولایت د جلریز ولسوالۍ له سقوط وروسته؛ د دې ولسوالۍ امنیه قومندان په یوه غږیز پیغام کې په ډاګه کړې، چې دا ولسوالي د کورنیو چارو وزارت د بې پامۍ له کبله سقوط شوې ده.

د میدان وردګ ولایت د جلریز ولسوالۍ امنیه قومندان مجیب الله امینی وایي، چې درې ورځې د طالبانو له لوري کلابند وو او د کورنیو چارو وزارت له چارسمبالي څخه مو پدې اړه د مرستې غوښتنه کړې؛ خو منفي ځواب یې ترلاسه کړی دی. 

له دې وړاندې د میدان وردګ نرخ ولسوالي هم له څو ورځۍ کلابندۍ وروسته سقوط شوې وه.

د کورنیو چارو وزارت که څه هم وایي، چې افغان ځواکونو تکتیکي شاتګ کړی دی.

په ولسي جرګه کې د خلکو استازي همایون شهید زاده څرګندوي، چې د امنیتي او دفاعي ځواکونو بې پامي د منلو وړ نده.

دفاع وزارت ډاډ څرګند کړی، چې د جلریز ولسوالۍ د بېرته نیولو لپاره یې عملیات پيل کړي دي.

د ملي دفاع وزارت ویاند روح الله احمدزي ویلي، چې د جلریز ولسوالۍ د بېرته نیولو لپاره عملیات پيل شوي او په دې عملیاتو کې طالبانو ته ځاني او مالي زیانونه اوښتي دي.

د میدان وردګ ولایتي شورا مرستیال محمد سردار وایي، چې اوس هم په دې ولسوالۍ کې عملیات پیل شوي ندي او طالبان پر یاده ولسوالۍ واکمني کوي.

د یادونې ده، چې د ولسي جرګې غړي د افغان ځواکونو پرلپسې تکتیکي شاتګونه هم د سرتېرو د تلفاتو او هم د پوځي وسایلو د له منځه تلو لامل شوی دی.

تازه خبرونه

د کونړ د شیګل ولسوالۍ امنیه قومندان په ماین چاودنه کې ووژل شو

خپور شوی

په

توسط

(Last Updated On: تله ۲۲, ۱۴۰۰)

چارواکو ویلي؛ نن پنجشنبه د تلې ۲۲ له غرمې مخکې د افغانستان اسلامي امارت د کونړ ولایت په مرکز اسعدآباد کې د شیګل ولسوالۍ د امنیه قومندانۍ  پر رینجر موټر د سړک غاړې ماین چاودنه کړې ده.

ځایی چارواکو ویلي؛ په پېښه کې، چې له غرمې مخکې ۱۱ بجې شوې رامنځته شوې؛ موخه یې د اسلامي امارت د کونړ ولایت د شیکل ولسوالۍ امنیه قومندان و.

امنیتي سرچینو ویلي، چې د شیګل امنیه قومندان په چاودنه کې وژل شوی او ۱۱ کسان نور ټپیان دي.

د کونړ ولایتي روغتون ډاکټرانو هم پېښه تائید کړې او زیاتوي، چې په ټپیانو کې  څلور د اسلامي امارت ځواکونه دي، چې مرکزي روغتون ته رالېږدول شوي.

تر اوسه کومې ډلې د دې برید مسوولیت پر غاړه ندی اخیستی؛ خو داعش په هېواد کې د وروستیو چاودنو تر شا خپل لاس لرل منلي دي.

Continue Reading

تازه خبرونه

جاپان له افغانستان سره ۱۹۰ میلیون ډالر مرسته کوي

خپور شوی

په

توسط

(Last Updated On: تله ۲۲, ۱۴۰۰)

جاپان له افغانستان سره په جي ۲۰ سرمشریزه کې په ډاګه کړې، چې د نړیوالې ټولنې له لارې به له افغانستان سره ۹۰ میلیون ډالر بشري مرسته وکړي.

جاپاني رسنیو څرګنده کړې؛ د جاپان لومړي وزیر کیشیډا فومیو د جي ۲۰ هېوادونو په ځانګړې سرمشریزه کې ویلي، چې توکیو به د نړیوالو ټولنو له لارې له افغانستان سره ۱۹۰ میلیون ډالر بشري مرستې ولیږي.

کیشیډا د کندوز د اړوند سیمې په یوه جومات د تیرې اوونۍ برید هم وغانده او ژمنه یې وکړه، چې له ترهګرۍ سره د مبارزې له اړوند اړخونو سره به خپلې هڅې چټکې کړي.

هغه ویلي په افغانستان کې د ټولو افغانانو د حقونو ساتنه مهمه ده او ښځې باید د کار او زدکړې حق ولري.

له دې مخکې د اروپایي کمیسیون مشر اورزولا فن ډرلاین د افغانستان او ګاونډ هېوادونو لپاره، چې افغان پناه غوښتونکي مني؛ د یو میلیارډ ډالرو اعلان کړی دی.

دا په داسې حال کې ده، چې د جرمني لومړۍ وزیرې انګېلا میرکل یو ځل بیا د خپل هېواد ۶۰۰ میلیون یورویي مرسته اعلان کړې ده.

Continue Reading

تازه خبرونه

د بهرنیو چارو وزارت لوړ پوړي پلاوی ترکیې ته روان شو

خپور شوی

په

توسط

(Last Updated On: تله ۲۲, ۱۴۰۰)

د افغانستان اسلامي امارت د بهرنیو چارو وزارت ویاند عبدالقهار بلخي ویلي؛ د دې وزارت یو لوړ پوړی پلاوی د ترکیې هېواد د بهرنیو چارو د وزیر مولود چاووش اوغلو په بلنه انقرې ته روان شو.

یاد پلاوی به د ترکیې له لوړ پوړیو چارواکو سره پر دوه اړخیزو همکاریو، سوداګریزو اړیکو، بشري مرستو، کډوالو چارو، هوایي ټرانسپورټ او یو لړ نورو اړوند موضوعاتو خبري وکړي.

یادې سرچینې ویلي؛ له مولوي امیرخان متقي سره په دې سفر کې ملا خیرالله خیرخوا، ملا عبدالحق وثیق، مولوی نورجلال جلالي، شیخ شهاب الدین دلاور، محمد سهیل شاهین، حاجی محمد ابراهیم او عبدالقهار بلخي مل دي.

له دې مخکې د مولوي متقي په مشرۍ يو لوړپوړي پلاوي په دوحه کې د امريکا، چين او ځينو نورو غربي هېوادونو له استازیو سره پر سياسي، اقتصادي او ځينو نورو مهمو موضوعاتو خبرې کړې دي.

پر افغانستان د اسلامي امارت له واکمنۍ وروسته دا لومړی رسمي سفر دی، چې د بهرنيو چارو وزير يې يو بهرني هېواد ته پیلوي.

دغه راز قزاقستان تېره ورځ د افغانستان په اړه د یوی ناستی کوربه و، چې په کې د منځنۍ آسیا د هېوادونو د بهرنیو چارو وزیرانو تر څنګ د هند او روسیې د بهرنیو چارو وزیرانو هم حضور درلود.

د روسیی د بهرنیو چارو وزیر په دې ناسته کې څرګنده کړې، چی د مسکو له ناستی وروسته یوه بله نړیواله ناسته د ملګرو ملتونو تر څارنې لاندی د افغانستان په اړه جوړیږي.

د ترکیې د بهرنیو چارو وزیر مولود چاوش اوغلو په انقره کې له خپل اندونیزیايي سیال رټنو مارسوډي سره یوې ګډې خبري غونډې ته ویلي؛ مونږ د افغانستان وضعیت له نږدې څارو او په پام کې لرو، چې په راتلونکي کې د ځینو بهرنیو چارو وزیرانو سره کابل ته سفر وکړو.

دا په داسې حال کې ده، چې ایران هم په افغانستان کې له ستر سیاسی بدلون وروسته د دې هېواد په اړه د ګاونډ هېوادونو د بهرنیو چارو وزیرانو انلاین ناستی کوربتوب وکړي.

Continue Reading

Trending

آریانا نیوز: ټول حقونه خوندي دي