Connect with us

تازه خبرونه

د میدان وردګ د بهسود د دوه یمې حصې ولسوالي د علی پور وسلوالو نیولې – سرچینې

خپور شوی

 په

(Last Updated On: سلواغه ۱۵, ۱۳۹۹)

امنیتي سرچینو ویلي، چې د میدان وردګ د بهسود د دوه یمې حصې ولسوالي د علی پور وسلوالو له حکومتي ځانګړیو پولیسو نیولې او امنیتي ځواکونه ترې وتلي دي.

د علي پور ځینو وسلوالو د آریانا نیوز خبریال سمیع جهش ته په بهسود کې ویلي، چې څو پورې د دولتي ځواکونو لخوا د ملکي وګړیو د وژل کېدو په اړه  د څېړنو ځواب ورنکړ شو؛ نو، ځکه یې پر ولسوالۍ راودانګل.

د علي پور جنګیالیو په ډاګه کړې: څلور ورځې مخکې د میدان وردګ ولایت د بهسود په ولسوالۍ کې له دوه سوه ډېر خلک ټول شول؛ دوی ویل، چې ولې د پولیسو ځانګړي قطعات دلته حضور لري او له یوې شخړې وروسته له امنیتي ځواکونو سره ونښتل.

په دې نښته کې دولس اعتراض کوونکي وژل شوي او د بهسود د لومړۍ حصې د ولسولۍ د نوي امنیه قومندان په ګډون دوه پولیس او ۲۵ د سیمې خلک ټپیان شوي دي.

د بهسود د لومړۍ حصې د ولسوالۍ په اعتراضونو کې د یوه وژل شوي پلار محمد نبي وایي: خلک یې عام قتل کړل؛ نه یې بشري حققونو ته پام وکړ او نه هم اسلامي. ان یو کس یې ۴۰  مرمۍ ویشتی.         

د دېذ ولسوالۍ د وژل شوي کس پلار جمعه ویلي؛ حکومتي ځواکونو ټول وویشتل او له ۱۰۰ ډېرو کسانو ته مرګ و ژوبله اوښتې ده.

د علي پور د وسلوالو او امنیتي ځواکونو په څلور ورځنۍ نښته کې د ولسوالۍ ودانۍ، جومات او د ولسوالۍ نورې برخې ورانې او ویجاړې شوي او د ولسوالۍ تاسیساتو ته یې ډېر زیان رسولی دی.

د ولسوالۍ په څو سوه متري کې د علي پور په مشرۍ ټوپکوال ګوته پر ماشه دي او وایي: د انتقام اخیستو ته چمتو یو.

دوی وایي، چې له څلور خواوو یې د بهسود لومړۍ حصې ولسوالۍ ودانۍ، چې په کې د میدان وردګ امنیه قومندان او ځانګړي پولیس حضور لري، کلابند کړې او د علي پور قومندې ته په تمه دي، چې د جګړې امر وکړي.

د علي پور وسلوال رمضان ویلي: مونږ درندې او سپکې وسلې لرو او دا مو د سیمې د خلکو پر پیسو، چې راټولې کړي مو دي له حکومته مو پېرودلي دي.           

د علي پور بل وسلوال قربان علي نومی وایي: ما ځکه توپک را پورته کړ، چې زوی او وراره مې ټپیان شوي او بدل یې اخلم.

له څلور ورځنیو نښتو وروسته له کابله یو پلاوی دې سیمې ته ورغلی؛ پلاوي لومړی له ځانګړیو پولیسو او د میدان وردګ له امنیه قومندان او بیا د قرباني شویو او ټپیانو له کورنیو سره کتلي او څېړنې یې پیل کړي دي.

جنرال مراد علي مراد، د ولسي جرګې غړی مهدي راسخ او د ولایتي شورا یو غړی د قربانیانو استازیتوب کوي.

په ولسوالۍ کې د پلاوي له حضور سره – سره د سې شنبې پر ماښام امنیتي ځواکونه د میدان وردګ د بهسود د دوه یمې حصې له ولسوالۍ ووتل او د علي پور وسلوال ولسوالۍ ته ننوتل.

د بهسود د لومړۍ حصې ولسوالۍ د پېښې د څېړونکي پلاوي مشر عباد الله عباد وایي: لومړي مو له امنیتي ځواکونو سره ناسته درلوده او معلومات مو ترې راټول کړل او با د دغې ولسوالۍ له خلکو سره وغږېدو. اوس  هم خبرې روانې دی او پایله به یې د افغانستان خلکو ته وړاندې کړو.          

د سیمه ییزو ارګانونو خپلواکې ادارې مرستیال ایوب سالنګي ویلي: د پېښې عاملان، چې هر څوک وي د قانون منګولو ته به راکښل شي او په دې اړه به عدالت خوندي شي.           

د میدان وردګ امنیه قومندان مني، چې پوځيان د بهسود د دوه یمې حصې له ولسوالۍ وتلي؛ خو هغه د شمشېر قومندان یا علی پور د وسلوالو لخوا د بهسود په لومړۍ حصې ولسوالۍ کې د ځانګړیو پولیسو کلابنده کېدو خبر رد کړی دی.

د میدان وردګ امنیه قومندان الله داد فدایي وایي: بلې مونږ غوښتل په سوله ییزه توګه له علی پور څخه هغه رنجر او هاموی تانګ، چې څه وخت مخکې یې له حکومتي ځواکونو نیولي وه؛ بېرته واخلو.            

د میدان وردګ د بهسود د دوه یمې حصې له ولسوالۍ څخه د ځواکونو له وتو سره – سره بیا هم له کابله سیمې ته لېږل شوی پلاوی په دې ولسوالۍ کې دی؛ خو هیڅ غوټه نده پرانیستل شوې او بهسود اوس هم د دولتي ځواکونو او د علي پور د وسوالو تر منځ د احتمالي نښتو سیمه ګڼل کیږي.

تازه خبرونه

اسلامي امارت د دیني عالمانو د علمي رتبو د ټاکلو لپاره د اسنادو ارزولو سپارښتنه وکړه

خپور شوی

په

توسط

(Last Updated On: لړم ۴, ۱۴۰۰)

د اسلامي امارت ویاند ذبیح الله مجاهد په ډاګه کړې، چې نن سې شنبه د لړم ۴ د کابینې په غونډ ه کې سپارښتنه شوې، چې د دیني عالمانو د علمي رتبو د ټاکلو لپاره دې د دوی اړوند اسناد وارزول شي.

 په دې غونډه کې د افغانستان اسلامي امارت لومړي وزير ملا محمد حسن آخوند د ديني عالمانو د علمي رتبو د ټاکلو او د هغوى د ښوونیزو اسنادو د ارزونې طرحه تصويب کړه.

ملا محمد حسن آخوند ټینګار کړی، چې د دیني عالمانو اسناد باید و ارزول شي او د هغوی علمي رتبې دې ځانګړې او مشخصې شي.

دغه راز په دې غونډه کې د هغو شرکتونو د ستونزو د حل لپاره د اسلامي امارت له لوري یو پلاوی وګومارل شو، چې د هېواد په بانکونو کې یې پیسې کنګل دي.

د برښنایي تذکرو د وېش بهیر دوام، د وګړیو د احوالو ثبتولو د پلان چمتو کول، د معتادینو ستونزې، د بهرنیو مرستو سالم مدیریت او د ټاپي پروژې په اړه په دې ناسته کې خبرې او بحثونه وشول.

Continue Reading

تازه خبرونه

په افغانستان کې لوږه له نیمایي ډېر وګړي ګواښي –ملګري ملتونه

خپور شوی

په

توسط

(Last Updated On: لړم ۴, ۱۴۰۰)

د خواړو نړیوالې ټولنې له اقتصادي ناورینه خبر ورکوي او حرګندوي، چې په را روان ژمی کې د افغانستان له نیمایي ډېر وګړي لوږه ګواښي.

دې ټولنې ویلي، که د ژمي له رارسېدو مخکې له لوږې سره مخ ۲۲ میلیون وګړیو ته بېړنۍ مرستې ونه رسیږي؛ له منځه به ولاړ شي.

د کابل اوسېدونکی صورت بېک ویلي؛ که رښتیا ووایم کارو بار نشته. سل ، ۸۰ یا ۹۰ روپۍ پیدا کوم. پخوا به درې ـ څلور سوه کېدې؛ اوس بازار نشته،د خلکو اقتصاد کمزوری دی.   

له بدخشان څخه راغلي راز محمد نومی څرګنده کړې؛ الله باک شته، چې همدا یو بیک لرم؛ خو بیا هم هیله من یم، چې له خپلو بچو سره اووسیږم.

خواړو ته د ماشومانو نه لاسرسی بله ننګونه ده.

له ماشومانو څخه د ملګرو ملتونو د ملاتړ صندوق یا یونیسف څرګندوي؛ د افغان ماشومانو د خواړو حالت  زړه بوږنوونکي دي، ځکه داسې اندېښنې شته، چې د خواړو له کبله ۱۴ میلیون وګړي ژوند له ناورین سره مخ کطدونکی دی.

دا بنسټ وايي، اوسمهال پېنځه میلیون ماشومان د خوارځواکۍ له ګواښ سره مخ دي، چې د تېر ژمي پر پرتله پېنځه دېرش سلنه زیاتوالی ښيي.

کارګر ماشوم دولت نومی وایي: د ۲۵۰ افغانیو سمبوسه پېرم؛ له دې که دېره ګټه تر لاسه کړم؛ نو ۲۰ به وي، چې زما خپله خرچه نه برابروي.

ساحل نومي بل کارګر ماشوم ویلي؛ کارو بار نشته؛ کله وي او کله نه وي. پخوا ښه و. اوس کله ۱۰۰ او کله هم ۵۰ پیدا کوم.

ملګرو ملتونو او د بشري مرستو نړیوالو بنسټونو ویلي، چې مرستندوی هېوادونه دې خپلې مرستې په افغانستان کې د هوا له سړېدو او ژمي مخکې برابرې او پخپلو ژمنو دې عمل وکړي.

د خواړو نړیوالې ټولنې د وړاندویېنې له مخې؛ د افغانستان اړمنو خلکو ته د لاسرسي لپاره هره میاشت ۲۲۰ میلیون ډالرو ته اړتیا لیدل کیږي او هڅه کوو، چې ۲۳ میلیون وګړیو ته په راروان ژمي کې مرستې ورسیږي.

Continue Reading

تازه خبرونه

په قطر کې له چینایي چارواکو سره د اسلامي امارت د مشرانو لېدنې روانې دي

خپور شوی

په

توسط

(Last Updated On: لړم ۴, ۱۴۰۰)

نن د قطر په مرکز دوحه کې د افغانستان د بهرنیو چارو وزیر محترم مولوي امیر خان متقي په مشرۍ یوه پلاوي د چین ولسي جمهوریت د بهرنیو چارو وزیر وانګ پر مشرۍ له پلاوي سره خبرې وکړې.
دواړو لوریو پر ډیپلوماټیکو اړیکو، دوه اړخیزې سوداګرۍ، له افغانستان سره د چین بشري مرستې او افغان زد‌کوونکیو ته په چین کې د لوړو زد‌کړو د فرصتونو رامنځته کولو او په ټوله کې د دواړو هېوادونو په اړیکو کې پر فرصتونو او ننګونو هراړخیزې خبرې وشوې.

د افغانستان د بهرنیو چارو وزیر په ډاګه کړې، چې اسلامي امارت ډاډ ورکوي، چې د افغانستان خاوره به د چین په ګډون د کوم هېواد پرخلاف نه کارېږي.

نوموړي ډاډ څرګند کړی، چې افغانستان پر همکارۍ او همغږۍ ولاړ متوازن بهرنی سیاست لري. چین زموږ په بهرني سیاست کې مهم ځای لري او په سیمه کې مهم هېواد دی. د افغانستان ثبات د چین په ګډون ټولې سیمې ته ګټور دی.

افغان لوري چین سره د دیپلوماتیکو اړیکو د پراختیا تر څنګ د افغانستان د سوداګرۍ پر پراختیا هم ټینګار وکړ.
مولوي متقي له چینايي لوري وغوښتل، چې د افغان سوداګرو د ستونزو په اوارولو کې مرسته وکړي او له افغانستان څخه چین ته د ونیکس ماربل، قیمتي بوټو، کیشتې، بادام، وچو انځرو، پستو، اینجي او په ځانګړي توګه د جلغوزو د صادراتو په برخه کې لازمې آسانتیاوې برابرې کړي.

د چین د بهرنیو چارو وزیر په افغانستان کې له وروستي مثبت تحول هرکلی وکړ او په ډاګه یې کړه، چې افغانستان او چین تاریخي اړیکې لري او په راتلونکي کې به دواړه هېوادونه د ګډو ګټو پر بنسټ کار وکړي او هیڅکله به د افغانستان په کورنیو چارو کې لاسوهنه ونکړي.

وانګ يي زیاته کړې، چې هېواد یې د افغانستان امنیت، خپلواکۍ او ځمکني بشپړتیا ته درناوی لري.
چینايي لوري همداراز ټینګار له افغانستان څخه پر ملاتړ ټینګار کړی، چې د پراختیا لپاره خپله لار په خپله وټاکي.

دغه راز ویل کیږي، چې د چین د بهرنیو چارو وزیر وانګ يي تېره ورځ د قطر په پلازمېنه دوحه کې د اسلامي امارت د اقتصادي چارو له مرستیال ملا عبدالغني برادر پر مشرۍ له یوه پلاوي سره لیدلي دي.

د ذبیح الله مجاهد د څرګندونو له مخې، په دې کتنه کې پر اقتصادي او سیاسي وضعیت او د دواړو هېوادونو ترمنځ د سوداګریزو اړیکو پر پیاوړتیا تمرکز شوی دی.

د یادونې ده، چې په کابل کې د ایران سفیر آریانانیوز ته ویلي؛ د روانې اوونۍ د چارشنبې په ناسته کې به د ایران، پاکستان، ازبکستان، تاجکستان، ترکمنستان، روسیې او چین د بهرنیو چارو وزیرانو یوه ګډه ناسته د افغانستان د اقتصادي او امنیتي ستونزو او ټولمنلي حکومت په اړه جوړه شي.

Continue Reading

Trending

آریانا نیوز: ټول حقونه خوندي دي