Connect with us

تازه خبرونه

د سیاسي جوړجاړي لپاره د جګړې د درولو غوښتنه وشوه

خپور شوی

 په

(Last Updated On: زمری ۲, ۱۴۰۰)

د افغانستان د سولې لپاره د امریکا ځانګړي استازي زلمي خلیلزاد او یوناما دواړو د شنبې پر ورځ یوه اعلامیه خپره کړې؛ د جګړې له ښکېلو خواوو یې غوښتي، چې جګړه ودروي او د سولې خبرو اترو د لښتیلیک پر بنسټ پرمختګونه رامنځته کړي.

دا خبرې د پنجشنبې پر ورځ په روم کې د اروپايي اتحادیې، ناتو، انګلستان، فرانسې، جرمني، ایټالیا، ناروې او امریکا تر منځ له غونډې وروسته راپورته کیږي.

په اعلامیه کې څرګنده شوې، چې د هېوادونو او سازمانونو ډله له افغانستان سره ځواکمن ګډون ته ژمنه ده او د لیږد نوي پړاو په بهیر کې به د بهرنیو ځواکونو له وتلو سره روان پرمختګونه له نږدې وڅاري.

دوی د تاوتریخوالي له لوړې کچې، پوځي بریدونو او بشري حقونو څخه سرغړونو اندېښمن کړي او وایي؛ مونږ پر ټولو لوریو غږ کوو، چې تاوتریخوالی کم او د ملکي وګړو ساتنه وکړي او د نړیوالو بشردوستانه قوایونو له مخې د خلکو مسوولیتونو ته درناوی وشي.

دغه راز څرګنده شوې؛ مونږ اوربند ته د رسیدو پر اړتیا ټینګار کوو، چې د خبرو اترو بریا تضمین کړو او د افغان امنیتي ځواکونو قربانۍ باید هیرې نشي.

دې ډلې ټینګار کړې، چې په افغانستان کې د جګړې لپاره هیڅ ډول پوځي حل نشته او له هغه لوري، چې واک و ځواک ته د رسېدو لپاره پوځي لار غوره کوي؛ ملاتړ نکیږي.

د افغانستان د سولې امریکایي استازي زلمي خلیلزاد دغې ناستې د ګدې اعلامیې په اړه ویلي؛ مونږ د سیاسي جوړجاړي پر اړتیا همغږي یو؛ خو هغه جوړجاړی، چې مونږ یې ملاتړ کوو پېنځه برخې لري:

۱- ټولګډونه حکومت

۲- د سیاسي مشرانو د ټاکني حق

۳- د ټولو نرینه او ښځو لپاره د بشري حقونو ساتنه او ملاتړ

۴- د تروریزم پر وړاندې د مبارزې ژمنې

۵- د اساسي او نړیوال قانون پلوي.

نوموړي په خپلو ټویټونو کې په ډاګه کړې: د روم غونډې له جوړولو سره به مونږ د سیمې هېوادونو، ترویکا پلس هېوادونو او ملګرو ملتونو سره کار وکړو، چې یوې هوکړې ته ورسیږو.

هغه زیاته کړې؛ ګډ کار له افغانانو سره مرسته کوي، چې پر عادلانه او دوامداره سولې هوکړه وشي او له راتلونکي نړیوال سیاسي او اقتصادي ملاتړه برخمن پاتې شي.

دغه راز دې ډلې د افغانستان د حکومتي او طالب مشرانو تر منځ په دوحه کې له خبرو اترو هرکلی وکړ او څرګندوي: مونږ د یوه جامع سیاسي جوړجاړي په اړه د خبرو ګړندی کولو او په نږدې وخت کې د بیا کتنې لپاره د دواړو لوریو له اعلان شوې ژمنې څخه هم هرکلی کوو. مونږ باور لرو، چې راتلونکې ناستې به پر اصلي مسلو راوڅرخي او یوه ټولګډونه سیاسي جوړجاړي ته د رسېدو لپاره به بنسټیزې وي.

دې ډلې پر دواړو خواوو غږ کړی؛ پر ښه نیت خبرې وکړئ، چې عادلانه او سیاسي جوړجاړي ته ورسیږئ.

دې ډلې د قطر د ستاینې ترڅنګ ویلي، چې دوی به د افغانستان ګاونډ هېوادونه دې ته وهڅوي، چې له افغانانو سره خپلې مرستې پیاوړې او تلپاتې سولې او اقتصادي پراختیا لپاره مرستې وکړي.

دغه راز مونږ له ټولو اړخونو غواړو، چې د بهرنیو سفارتونو او نورو ډیپلوماټیکو ماموریتونو، څو اړخیزو ادارو، د رسنیو نمایندګانو، هوایي ډګرونو او نادولتي سازمانونو او د دوی د افغان او نړیوالو کارمندانو امنیت ډاډمن کړي.

مونږ په ځانګړي توګه د ترکیې چمتووالي او ژمنې، چې له اړتیا سره سم د هوایي ډګر په امنیت کې مرستې ته ټټر وهي؛ نړۍ مننه کوو.

تازه خبرونه

افغانستان اوس خطر ندی که ( ا.ا ) پخپلو ژمنو ودریږي، امریکا به یې پر رسمیت وپېژني

خپور شوی

په

توسط

(Last Updated On: تله ۵, ۱۴۰۰)

د افغانستان په چارو کې د امریکا پخواني استازي له آریانا نیوز سره په خبرو کې څرګنده کړې؛ افغانستان اوس د امریکا لپاره خطر ندی او که پخپلو ژمنو ودریږي؛ امریکا به یې پررسمیت وپېژني.

د امریکا پخواني ځانګړي استازي په افغانستان کې موخو ته د امریکا د رسېدو په اړه ویلي، چې هېواد یې خپلو ډېرو موخو ته رسېدلې په ځانګړي توګه یوه یې د القاعده ځپل دي. 

هغه وایي: که څه هم القاعده پوره له منځه نده تلې او اوس هم په یوشمېر هېوادونو کې هڅې تر سره کوي؛ خو افغانستان دمګړۍ د امریکا لپاره ګواښ ندی؛ ځکه اسامه بن لادن ووژل شو، ډېر شمېر غړي یې بندیان او یا وژل شوي دي.

دغه راز وایي، چې افغانستان دمګړۍ د امریکا لپاره ګواښ ندی او د شویو ژمنو د پلي کېدو په صورت کې امریکا چمتو ده، چې طالبان (د افغانستان اسلامي امارت) پر رسمیت وپېژني.  

زلمي خلیلزاد دا هم ویلي، چې کابل ته د اسلامي امارت د ځواکونو له ننوتو مخکې هوکړه شوې وه، چې د اسلامي امارت ځواکونه به تر دوه اوونیو کابل ته نه دننه کیږي؛ د حامد کرزي او ډاکټر عبدالله عبدالله په ګډون به یو لوړپوړی پلاوی قطر ته ځي او د ټولمنلي حکومت پر جوړښت به د ا.ا له غړیو سره هوکړه وکړي.

هغه په دې اړه ټینګار کړی، چې له افغانستان څخه د اشرف غني ناڅاپي تېښتې نه یوازې په نظام کې تشه رامنځته کړه، بلکې په سوله ییزه توګه یې د واک لیږد چارې هم ګډوډې کړې او طالبان کابل ته دننه شول.

نوموړی وایي: نړۍ اوس په تمه ده، چې طالبان ( اسلامي امارت) خپلې کړې ژمنې پلې کوي او که نه او که یې عملي او پلې کړي؛ نو د نړۍ او طالبانو( اسلامي امارت ) ترمنځ عادي اړیکې هم خوندي کیږي.

دغه راز خلیلزاد د افغانستان د جمهوریت او امارت تر منځ د سولې خپلمنځي خبرو د ماتې په اړه ویلي، چې پخوانی ولسمشر اشرف غني د نوي حکومت له جوړېدو سره مخالف و او غوښتل یې طالبان ( اسلامي امارت) د ده د حکومت یوه برخه شي.

د یادونې ده، چې هغه خپلو هڅو او ماموریت ته په نغوته کې د امریکایي ځواکونو د وتلو، خپلمنځي خبرو، اوربند او سولې د خوندي کېدو په اړه ویلي؛ د افغانستان خلک به د ده په اړه قضاوت وکړي؛ ځکه پدې اړه یې د سیمې او نړۍ د همغږۍ لپاره هڅې او منډې کړي، چې جګړه ودریږي او ستونزې له سیاسي لارې حل شي.

دا ځای پوره مرکې ته  کېکاږئ   .

Continue Reading

تازه خبرونه

تاجکستان د افغانستان په کورنیو چارو کې لاسوهنه کوي- د ا.ا.ا

خپور شوی

په

توسط

(Last Updated On: تله ۵, ۱۴۰۰)

د افغانستان اسلامي امارت د لومړي وزیر مرستیال ملا عبدالغني برادر د یکشنبې پر ورځ په یوه مرکه کې ویلي، چې تاجکستان د افغانستان په کورنیو چارو کې لاسوهنه کوي.

ملا برادر له الجزیرې تلویزیوني چینل سره په یوه مرکه کې څرګنده کړې: تاجکستان زمونږ په چارو کې لاسوهنه کوي؛ خو د هر عمل لپاره عکس العمل هم شته.

یوه ورځ مخکې  د اسلامي امارت ویاند او د اطلاعاتو او فرهنګ وزارت مرستیال ذبیح الله مجاهد په خپل ټویټ کې څرګنده کړې وه، چې د ا.ا.ا په زرګونه جنګیالي د افغانستان تخار ولایت ته لیږلي، چې له تاجکستان سره ګډه پوله لري.

د مجاهد د څرګندونو له مخې؛ دا کار له امنیتي ګواښونو سره د مبارزې یوه اړتیا ده.

د روانې میاشتې په پیل کې د تاجکستان ولسمشر امام علي رحمان د شانګهای هېوادونو د همکارۍ ټولنې او د ډله ییز امنیت تړون ټولنې په ګډه غونډه کې، چې خبرې یې په افغانستان کې پر وروستیو پرمختګونو راڅرخېدلې؛ د ترهګرو ډلو د احتمالي پراختیا د مخنیوي لپاره د افغانستان پر شاوخوا د “امنیتي کمربند” جوړولو وړاندیز کړی و.

Continue Reading

تازه خبرونه

هېوادونه باید د افغانستان له بې ثباتۍ څخه د ځان په ګټه کار وانخلي – هند

خپور شوی

په

توسط

(Last Updated On: تله ۵, ۱۴۰۰)

د هندې لومړي وزیر نریندرا مودي د ملګرو ملتونو په عمومي غونډه کې ویلي؛ نړۍ باید ډاډ تر لاسه کړي؛ ځکه، چې اوس هم ځينې هېوادونه له ترهګرۍ څخه د وسیلې په توګه کار اخلي.

د ملګرو ملتونو په عمومي غونډه کې د افغانستان پر مسایلو د نړۍ مشرانو د خبرو په لړ کې د هند لومړي وزیر نریندرا مودي ویلي، چې د افغانستان له بې ثباتۍ څخه باید هیڅ هېواد د ځان په ګټه کار وانخلي.

د هند لومړی وزیر نریندرا مودي: دا ډېره اړینه ده، چې نړۍ د افغانستان له خاورې د ترهګرۍ د پراختیا او ترهګریزو بریدونو څخه د کار له نه اخیستنې څخه ډاډ تر لاسه کړي.

مودي په افغانستان کې د روان وضعیت په اړه ویلي؛ ښځې، ماشومان او لږکي بېړنیو مرستو ته اړتیا لري او نړۍ دنده لري، چې هغوی ته مرستې ورسوي.

نوموړي زیاته کړې؛ افغانان، ښځې ماشومان او لږکي بېړنیو مرستو ته اړ دي. مونږ باید خپله دنده پر ځای کړو او له هغوی سره مرسته وکړو.

دغه راز روسیې ویلي، چې تر اوسه هیڅ هېواد د طالبانو د رسمیت پېژندلو په اړه غور ندی کړی.

د ملګرو ملتونو عمومي غونډې ته د روسیې د بهرنیو چارو وزیر سرګي لاوروف په ډاګه کړې، چې نړۍ باید د افغانستان نازک شرایط درک کړي او له دې هېواد سره بشردوستانه مرستې سیاسي نکړي.

نوموړي زیاته کړې؛ په افغانستان، سوریه، لیبیا، یمن او نورو سیمو کې ښکېل بهرنیان باید د دې هېوادونو تمدن او فرهنګ ته په کتو چلند غوره کړي. د بشري مرستو سیاسي کولو پر ځای باید د یوه غښتلي ګډون او مرستو لپاره لاس ورکړو.

دا په داسې حال کې ده، چې د البانیا ولسمشر د ملګرو ملتونو عمومي غونډې ته په خبرو کې ویلي؛ افغانان باید په اوسنیو شرایطو کې یوازې پرینښودل شي او د تېرو شل کلونو لاسته راوړنې باید وساتل شي.

Continue Reading

Trending

آریانا نیوز: ټول حقونه خوندي دي