د افغانستان لپاره د ملګرو ملتونو د عمومي منشي ځانګړې استازې روزا اوتونبایوا او ورسره مل پلاوي د ریاست الوزراء له سیاسي مرستیال مولوي عبدالکبیر سره د لیدنې پر مهال په کابل کې د وروستیو نندارتونونو جوړېدل د افغانانو د تولیداتو د معرفي کولو لپاره ارزښتناکه وبلله او وایي، چې یوناما د کوچنیو کاروبارونو د ودې لپاره د پورونو ورکړه پیل کړې ده.

د ارګ خبرپاڼې د مېرمن اوتنبایوا د څرګندونو له مخې څرګنده کړې؛ هغې له افغانستان څخه بهر د خپل وروستي سفر پر مهال له هغو هېوادونو او مرستندویه بنسټونو سره خبرې کړې، چې له افغانستان سره مرستې کوي. دغه راز او یوناما د راتلونکي ژمي لپاره د اړتیا وړ مرستو یوه برخه هم ترلاسه کړې ده.

د ریاست الوزراء سیاسي مرستیال مولوي عبدالکبیر په دې غونډه کې ویلي، چې په راتلونکیو ورځو کې به د یوناما په ګډون له نشه‎يي توکو سره د مبارزې عالي کمیسیون په کابل کې د بهرنیو هېوادونو له سفارتونو سره ګډه غونډه کړې او پر یو شمېر اړینو مسایلو به خبرې وکړي.

د افغانستان د سرحدي مسلو په اړه هغې ویلي، چې له ګاونډ هېوادونو سره د لارو بندېدا د افغان بزګرانو د کرنیزو محصولاتو د صادرولو پر وړتیاوو منفي اغېزه کوي.

هغې له اسلامي امارت وغوښتل، چې له اړوندو هېوادونو سره خبرې وکړي او یوناما هم د دغو ستونزو د اواري لپاره هڅې کوي.

اوتونبایوا په کابل کې د سوداګریزو نندارتونونو موضوع راپورته کړه او ویې ویل، چې دغه نندارتونونه د افغاني تولیداتو د ودې لپاره اړین دي.

دغه راز هغې له اسلامي امارت سره د نشه‌يي توکو د له منځه وړلو، د پخوانيو کوکنارو کروندګرو لپاره د بديل کښت پر موندلو او د نشه‌يي توکو د روږدو کسانو د درملنې په برخه کې د همکارۍ ژمنه څرګنده کړه.

دغه راز هغې د اسلامي امارت له دې اقدام ستاينه وکړه، چې د نشه‌يي توکو او شرابو د مسايلو د له منځه وړلو لپاره يې يو کميسيون جوړ کړ.

هغې دا هم ویلي، چې دا یو "مثبت ګام" دی.

مولوي عبدالکبیر ویلي، چې اسلامي امارت په افغانستان کې د یوناما ماموریت ته ارزښت ورکوي.

هغه وایي، چې له نشه‌یي توکو او الکولو سره د مبارزې عالي کمیسیون عملیاتي چوکاټ جوړ شوی او ډېر ژر به وروستی شي.

د نوموړي د څرګندونو له مخې؛ اسلامي امارت له اسلامي اصولو سره سم فعالیت کوي او د هر ډول اندېښنو په اړه خبرو ته چمتو دی.

ویل کیږي، چې یوناما باید ځینې مسایل احساس او له مسوولیت سره سم پرې غور وکړي.

چارواکو ویلي، چې د مزارشريف په شادیان دښته کې له ۱۰۳۵ جريبه ډېره ځمکه حکومتي ومنل شوه

د عدلیې وزارت ويلي؛ د بلخ په زون کې د اماراتي غصب شویو ځمکو د دوسیو د څېړلو ځانګړې محکمې په شادیان دښته کې د یو زر او پېنځه دېرش اعشاریه پېنځه جریبه ځمکې اړوند اسناد وڅېړل او د مزارشريف له نساجي سرک سره پر لګېدلې ځمکې یې پرېکړه وکړه، چې حکومتي ده.

د دغه وزارت په خبرپاڼه کې راغلي، چې د ځمکو د غصب د مخنیوي کمیسیون له دې مخکې هم په مزارشریف ښار کې د یادې ځمکې موضوع څېړلې وه او پر ځمکه د خېټې اچوونکي د قناعت لپاره یې دغه دوسیه رسماً په بلخ زون کې د غصب شویو ځمکو ځانګړې محکمې ته د څېړلو لپاره سپارلې وه.

د یاد وزارت د خبرپاڼې له مخې؛ یادې محکمې د ملکیتونود اسنادو او د املاکي دفترونو او د غاصبینو له لوري د وړاندې شویو اسنادو په اړه له اړوند څانګو څخه د معلوماتو له ترلاسه کولو او د اسنادو له څېړلو وروسته دغه اسناد د اعتبار وړ نه وبلل او پرېکړه یې وکړه، چې غصب شوې ځمکې حکومتي ملکیت دی.