Connect with us

تازه خبرونه

د اسلامي امارت مشرانو په دوحه کې له اروپايي او بریټانیاوي چارواکو سره وکتل

خپور شوی

 په

(Last Updated On: ليندۍ ۸, ۱۴۰۰)

د افغانستان اسلامي امارت د بهرنیو چارو وزارت د چارسمبالي مولوي امیرخان متقي په مشرۍ د یکشنبې پر ورځ ( د لیندۍ ۷ ) په قطر کې له اروپايي ټولنې او بریتانیاوي چارواکو سره وکتل.

نوموړی د یوه پلاوي په مشرۍ له امریکايي او اروپايي چارواکو سره د خبرو لپاره دوحې ته تللی، له تېرو دوه ورځو راپدیخوا د اروپايي ټولنې له یوه پلاوي سره یې کتلي دي.

د بهرنیو چارو وزارت ویاند عبدالقهار بلخي ټویټ کړی، چې د متقي په مشرۍ د اسلامي امارت پلاوي د افغانستان لپاره د اروپايي ټولنې له ځانګړي استازي ټوماس نیکولسون او مل پلاوي سره دوه ورځنۍ هراړخیزې لیدنې وکړې.

عبدالقهار بلخي ویلي؛ دواړو لوریو د افغانستان د بشري وضعیت، روغتیا، امنیت، د سفرونو د خوندیتوب او د مرستو د رسولو په اړه خبرې وکړې.

هغه زیاته کړې: د اروپايي ټولنې پلاوي له افغانستان سره د خپلو مرستو د دوام لپاره چمتووالی څرګند کړ او په کابل کې یې د اروپايي ټولنې د دفتر د شتوالی په اړه د بشري مرستو له برابرولو ډاډ ورکړ.

نوموړي دا هم ویلي، چې افغان پلاوي دوی ته د امنیت ډاډ ورکړ او په ورته وخت کې یې د سیاسي او بشري ملحوظاتو د جلا کولو غوښتنه کړې او ټینګار کوي، چې د همکارۍ له لارې پرمختګ ته اړتیا ده، نه د فشار له لارې.

مولوي متقي همدا راز په دوحه کې د بریټانیا له سفیر سره هم وکتل او دواړو لوریو د افغانستان پر بشري، اقتصادي او امنیتي وضعیت خبرې وکړې.

د عبدالقار بلخي د څرګندونو له مخې؛ افغان پلاوي دوى ته په افغانستان کې د امنيت د ټينګښت ډاډ ورکړ او له نړۍ سره يې د مثبتو اړيکو د ټينګښت لپاره د افغانستان پر هڅو ټينګار وکړ.

اروپايي ټولنې هم د یکشنبې پر ورځ ناوخته په یوه خپره شوې خبرپاڼه کې دغه ناسته تائید کړې او ویلي یې دي، چې اسلامي امارت د افغانستان د بشري وضعیت او “جدي اندېښنو” ترڅنګ د خبرو پر مهال د افغانستان د هوايي حریم پر فعال ساتلو د مرستې غوښتنه کړې ده.

په خبرپاڼه کې راغلي: د خبرو اترو موخه د اروپايي ټولنې لخوا د اسلامي امارت د موقت حکومت په رسمیت پېژندنه نده، بلکې د اروپايي ټولنې د عملیاتي ښکېلتیا یوه برخه د اروپايي ټولنې او د افغانستان د خلکو په ګټه ده.

اروپايي اتحادیې څرګنده کړې؛ اروپايي ټولنې ژمنه کړې، چې د اګست په میاشت کې له افغانستان څخه د امریکا او متحدینو تر وتلو پورې به هغه افغانان بخښي، چې له تېرو دوه لسیزو راپدیخوا د افغانانو او د هغوی د متحدینو پر ضد جنګېدلي دي.

اسلامي امارت هم پخپلې ژمنې یو ځل بیا ټینګار کړی، چې که وغواړي افغانان او بهرنیو اتباعو ته اجازه ورکړي، چې له افغانستان ووځي او په بدل کې یې د کابل په هوايي ډګر کې د عملیاتو د دوام لپاره د مرستې غوښتنه وکړه.

دواړو لوریو د ژمي له رارسېدو سره په افغانستان کې د خرابېدونکي بشري وضعیت په اړه ژوره اندېښنه څرګنده کړې او د اروپايي ټولنې پلاوي له اسلامي امارت وغوښتل، چې د ټولګډونه حکومت د جوړولو، د نجونو د تعلیم دودولو لپاره خپلې هڅې ګړندۍ کړي او د هغو ډلو مخه ونیسي، چې د نورو امنیت له خطر سره مخ کوي.

د اعلامیې له مخې؛ اسلامي امارت له “اسلامي اصولو سره سم” د بشري حقونو څخه خپل ملاتړ یو ځل بیا تکرار کړ او څرګندوي، چې په افغانستان کې د تړلیو ډیپلوماټیکو ماموریتونو د بیا پرانستلو هرکلی کوي.

دا په داسې حال کې ده، چې د اسلامي امارت د پلاوي او امریکایي استازیو ترمنځ د دوشنبې پر ورځ  د قطر په پلازمېنه دوحه کې د نوي پړاو خبرې پیلیږي او اسلامي امارت تمه لري، چې په دغو خبرو کې به له امریکا سره د افغانستان د شتمنیو د خلاصون په اړه هوکړه وشي.

تازه خبرونه

په کابل کې له ۱۰۰۰ اړمنو کورنيو سره مرسته وشوه

خپور شوی

په

توسط

(Last Updated On: سلواغه ۷, ۱۴۰۰)

په کابل کې د چارشنبې پر ورځ  د سلواغې ۶  د کډوالو او راستنېدونکیو چارو وزارت لخوا  پر ۱۰۰۰ کورنیو خوراکي توکي او ګرمې جامې ووېشل شوې.

د کډوالو او راستنیدونکیو چارو وزارت د چارواکو د څرګندونو له مخې؛ په دغه مرسته کې اوړه، وريجې، بړستنې او ژمنۍ جامې شته، چې مخکې د چین او پاکستان د الخدمت موسسې لخوا تر سره شوي او په کابل د کډوالو چارو ریاست اړمنو کسانو ته ووېشلې.

د کډوالو او راستنیدونکیو چارو وزارت مرستیال محمد ارسلا خروټي د مرستو د وېش پر مهال ویلي: دا ځل مرستې د بېوزلو او بې ځایه شویو ښځو په موخه شوې دي.

هغه له ټولو مرسته کوونکیو هېوادونو او خیریه موسسو مننه وکړه او له هغوی یې وغوښتل، چې د افغانستان د خلکو لپاره نورې زیاتې مرستې وکړي.

د دغه وزارت د چارواکو د څرګندونو له مخې؛ هڅه کیږي، چې دغه مرستې په کابل او نورو ولایتونو کې پر اړمنو کسانو ووېشل شي.

د وزارت چارواکو له وکیلانو او سیمه ییزو مشرانو وغوښتل، چې له کډوالو او راستنېدونکیو چارو وزارت سره د اړو کورنیو په پېژندلو کې همکاري وکړي.

د کډوالو چارو وزارت چارسمبالي ويلي، چې د دې وزارت په بېلابېلو څانګو کې لسګونه زره نورې اړمنې کورنۍ د بشري مرستو د ترلاسه کولو په موخه په  تمه دي او دغه وزارت هڅه کوي، چې ټولو اړمنو کسانو ته مرستې ورسوي.

Continue Reading

تازه خبرونه

م.م له افغانستان سره د مرستې لپاره د انتقالي تعامل کړنلاره اعلان کړه

خپور شوی

په

توسط

(Last Updated On: سلواغه ۷, ۱۴۰۰)

د افغانستان په اړه د ملګرو ملتونو د امنیت شورا په غونډه کې د انتقالي تعامل کړنلاره وروستۍ او په ډاګه شوه.

په افغانستان کې اقتصادي او بشري ناورین ملګري ملتونه اړ ایستل، چې له افغانستان سره د بشري مرستو د تنظیم لپاره د انتقالي تعامل کړنلاره اعلان کړي.

د افغانستان لپاره د ملګرو ملتونو د سرمنشي د ځانګړي استازي مرستیال او د بشري مرستو همغږې کوونکی وايي، د افغانستان روان وضعیت ته په کتو به د ملګرو ملتونو دا ستراتیژي اړمنو افغانانو ته د بنسټیزو بشري مرستو برابرولو موکه برابره کړي.

افغانستان لپاره د ملګرو ملتونو د سرمنشي د ځانګړي استازي مرستیال رامز الاکبروف ویلي:  دا ستراتیژي به پر روغتیا او پوهنې سربېره د افغانانو لپاره د اړین ټولنیز جوړښت په برخه کې بنسټیزې او اوږدمهاله مرستې تضمین او همغږې کړي. په دغه چاره کې یوسلواته پنځوس ملګري په ګډه کار کوي، چې د روغتیايي خدمتونو او د ژوندانه نورو برخو کې خپلې مرستې وغزوي.

د ملګرو ملتونو سرمنشي د چارشنبې پر ورځ په نیوریارک کې د افغانستان په اړه د امنیت شورا غونډې ته د هغو قواعدو د ځنډولو غوښتنه کړې، چې افغانستان ته د اقتصاد او بشري مرستو په رسولو کې خنډ پېښوي.

د ملګرو ملتونو سرمنشي انټونيو ګوټرش وایي: مونږ باید هغه قواعد او شرطونه وځنډوو، چې د افغانستان پر اقتصاد سربېره یې د خلکو پر ژغورنې هم اغېزکړی او په کار ده، چې د اړتیا په دې سختو شرایطو پرې له سره غور وشي.

اسلامي امارت د ویاند مرستیال بلال کریمي د ملګرو ملتونو له دې دریځه پر هرکلي سربېره له افغانستان سره د بشري مرستو پر دوام د ټینګار تر څنګ ویلي، چې د افغانستان له بشري او اقتصادي ناورین سره باید سیاسي چلند ونشي.

په کابل کې د اسلامي امارت له بیا واکمنېدو شاوخوا شپږ میاشتې تېرېږي او هېوادوال له سخت اقتصادي ناورین سره مخ دې. له دې سره هممهاله نړیواله ټولنه او مرستندوی بنسټونه هم د هرې ورځې په تېرېدو پر احتمالي بشري کړکېچ د اندېښنې ترڅنګ، له افغانانو سره د بشري مرستو پر دوام ټینګار کوي.

Continue Reading

تازه خبرونه

په تار کې له ځوړند افغانستان سره مرسته وکړئ – م. م

خپور شوی

په

توسط

(Last Updated On: سلواغه ۷, ۱۴۰۰)

د ملګرو ملتونو سرمنشي انټوونیو ګوټریش د سلواغې پر ۶ د امنیت شورا غونډې ته څرګنده کړې، چې په تار کې ځوړند افغانستان د افغانانو لپاره پر کنګل شوي دوزخ بدل شوی او ورسره مرسته وکړئ.

د ملګرو ملتونو د سرمنشي د څرګندونو له مخې؛ د افغانستان اوسېدونکي د یخ او واورو په منګولو کې پاتې او له نیمايي ډېر وګړي یې له لوږې سره مخ دي.

انټونیو ګوټریش یو ځل بیا د هغو قوانینو د ځنډولو غوښتنه وکړه، چې په افغانستان کې مرستندویه عملیات  محدودوي؛ ځکه، چې په افغانستان کې ميليونونه افغانان له سختې لوږې سره مخ دي، ښوونه او روزنه او ټولنيز خدمتونه د سقوط په درشل کې دي او د نغدو پیسو نشتوالي د ملګرو ملتونو او مرستندويه ادارو د مرستو وړتياوې محدودوي.

نوموړي د امنیت شورا د ۱۵ غړیو د تېرې میاشتې د بندیزونو لرې کولو ته په نغوته کې ویلي؛ مونږ باید مالي موسسو او سوداګریزو ونډوالو ته قانوني ډاډ ورکړو، چې کولی شي له بندیزونو څخه پرته له سرغړونې او وېرې له مرستندویانو سره بشري کار وکړي. 

په امریکا او نورو بهرنیو هېوادونو کې له تېرو ۶ میاشتو راپدیخوا نه یوازې د افغانستان بانک شاوخوا ۹ اعشاریه ۵ میلیارډ ډالر زیرمه کنګل شوې، بلکې له دې هېواد سره پرمختیايي مرستې هم وځنډول شوې. دې مسلې پر سیاسي پرمختګونو سربېره پراخې بېوزلۍ ته هم لمن ووهله.

د تېر کال په ډسمبر کې تمویلوونکیو د افغانستان د بیارغونې له وجهي صندوق څخه د ۱.۵ میلیارډ ډالرو څخه د ۲۸۰ میلیون ډالرو له لېږد سره هوکړه وکړه. دغه پیسې د خواړو نړیوال پروګرام او یونیسف ته وسپارل شوې.

د ملګرو ملتونو سرمنشي وايي، له دې صندوقه پاتې پيسې هم بايد په سږني ژمي کې د افغانانو د ژوند ژغورلو لپاره آزادې شي.

ملګرو ملتونو د روانې میاشتې په پیل کې له افغانستان سره د ۴ اعشاریه ۴ میلیارده ډالرو بشري مرستو غوښتنه وکړه. دغه سازمان د چارشنبې پر ورځ اعلان وکړ، چې د روغتیا او تعلیم، بنسټیزو بېخبناوو، وړتیاوو او ټولنیز یووالي په ځانګړې توګه د ښځو او نجونو لپاره نورو ۳ اعشاریه ۶ میلیارډ ډالرو ته اړتیا ده.

Continue Reading

Trending

Copyright © 2022 Ariana News. All rights reserved!