Connect with us

پرمختګ او بشپړتیا

جاپانی داکتر ناکامورا د کونړي سیند د اوبو قرباني شو

Ariana News

خپور شوی

 په

(Last Updated On: ليندۍ ۱۴, ۱۳۹۸)

د طب داکتر ناکامورا، چې په خټه جاپانی و؛ تېره ورځ له خپلو پېنځه افغان ستاتونکیو سره د کونړي سیند قرباني شو؛ خو خدمتونه به یې تر پېړیو ژوندي وي.

د داکتر ناکامورا همکاران وايي؛ په ۱۹۸۴ کې یې د پېښور افغان کډوالو ته روغتیايي خدمات پیل کړي وه، د مجاهدینو په واکمنۍ کې له پېښوره ننګرهار ته راغی او له څه وخت وروسته په ۲۰۰۳ کال کې یې د وچو دښتو آبادولو ته پام شو او خپل کار یې  ګمبیري دښتې ته له کونړي سیند څخه د اوبو پر پورته کولو پیل کړ، چې د خپلو اته کلنو نه ستړي کیدونکیو هڅو په پایله کې یې مروارید نومی ۲۵ کیلو متره کانال بشبړ کړ.

د ښیوې ولسوالۍ استوګن  محمدبصیر ویلي، چې داکتر ناکامورا داسې یوه دښته شنه او زرغونه کړه، چې مرغۍ به په کې جل وهله. اوس د هغه د کار له برکته مونږ نه یوازې شنه سیمه لرو، بلکې له پېنځه ویشت نیم کیلو متره مروارید نومي کاناله هم برخمن یو او اوس مو ترې درې نیم زره هکتاره ځمکه خړوبیږي.

 د ښیوې یو بل استوګن ښایسته باز، چې د داکتر ناکامورا هڅو اغېزمن کړی وایي؛ د زیړي بابا نه تر دې ځایه، له کامې راونیسه تر باراباده دا ټوله ځمکه خدای آباده کړه ده آباده کړه.

نوموړی زیاتوي؛ ده لومړی سربندونه جوړ کړل، اوبه یې ورته راوستې او ځمکې یې راته خړوبه کړې. ان د سیمې له خلکو سره دمره بلد او آشنا شو، چې زمونږ د ناروغانو پوښتنې او درملنې ته به هم کورونو ته روان و.

ناکامورا په کامه او ښیوه کې ۶ کانالونه، ښیوه والو ته یو دارلعلوم، یو لوی جومات، سلګونه پُلچکونه او لسګونه کلیوالي لارې هم جوړې کړي دي.

د ناکامورا د کاري هڅې له نورو مرستندویانو ځانګړې بڼه لرله او شعار یې دا و، چې: زه هلته ځم او کار کوم، چې نور نه ځي.

ناکامورا په خپلو پروژو کې د سیمې له موادو او د ځايي خلکو له مټو ګټه پورته کړې او پر لږ لګښت یې ډېر کار کړی دی.

افغان هېواد د ګنو بدو پېښو او وژنو نه یوازې شاهد و او دی، بلکې خلک او ولسونه له دې پېښو خواشیني شوي هم دي. د ده او ساتونکیو وژنې د ننګرهار خلک دومره خواشیني کړي، چې وايي، دې پېښې د دې هېواد نور تېر غمونه ترې هېر کړي دي.

د سیمې ځايي استوګن سید حمیدالله وایي؛ خلک مو په کاري برخه کې یتیمان شول، دغه کانال، چې اوس په کې اوبه روانې دي بې سرپرسته شو. هغه شپه او ورځ کار ته چمتو و او دلته به راتلو او کار به یې کاوه. د هغه ټولې هڅې زمونږ لپاره وې، زمونږ د هېواد لپاره وې او همدې ته یې خولې تویولې.

د ناکامورا د پارک ساتوونکی عبدالمنان خان وایي، مونږ ورپسې ډېر خفه یو؛ هغه دلته کار کاوه او نورو ته یې د کار زمینه برابروله. لکه څومره، چې افغانان او د افغانانو  خاوره پرې ګرانه وه، هومره یې ځان هم ترې ځار کړ او په همدې خاوره کې ووژل شو. روح یې ښاد او یاد یې تازه اوسه.

د ننګرهار ولایتي شورا مرستیال عبدالله شنیواری وايي، د ناکامورا خدمتونه او د کونړي سیند د اوبو مدیریت د هغه د وژنې لاملونه دي.

خلک او ولسي استازي پرچارواکو سختې نیوکې کوي او وايي، ولې یې د افغان وطن یو لوی خدمتګار ناکامورا ونه شو ساتلی.

د ننګرهار د ولایتي شورا غړی ابرارُالله مراد ویلي؛ ناکامورا پلان درلوده، چې له کونړي سیند څخه دوه یم مروارید کانال پورته کړي او پر کابلي سیند یو سربند هم جوړ کړي.

تراوسه د ناکامورا او د هغه د پېنځه افغان ساتوونکیو قاتلین ندي نیول شوي؛ خو د ننګرهار والي شاه محمود میاخېل ویلي، چې په اړه یې پرمختګ شونی دی.

د ناکامورا د ورځني ژوند او خاطراتو په اړه د هغه افغان همکارانو ویلي؛ داسې هیڅ ندي شوي، چې ناکامورا دې کومه ورځ کار ته ناوخته راغلی وي او یا یې ویلي وي، چې دا کار نه کېږي.

ناکامورا خلکو ته د کار ترڅنګ د همکارۍ، هېواد غوښتنې، پالنې او مینې لارښوونې هم کولې او افغانانو هم افتخاري افغان نومولی و.

افغان کاکا مراد ۱۶ کاله په ننګرهار کې بېلابېل کارونه کړي؛ خو د تېرې چهارشنبې پر سهار( د لیندۍ ۱۳/ د دسمبر ۴) د جلال آباد ښار په لومړۍ ناحیه کې د خپلو پېنځه افغان ساتوونکیو سره په یو وسله وال برید کې ووژل شو، چې په کور د ننه او بهر یې وژنې سخت غبرګونو او غندنې راوپارولې.

خبریال: رحمت الله زیارمل

پرمختګ او بشپړتیا

افغان بیسیم مخابراتي شرکت انټرنټي بیې راټيټې کړې

Ariana News

خپور شوی

په

توسط

(Last Updated On: وری ۱۷, ۱۳۹۹)

د افغان بیسیم شرکت مسوولینو ویلي، چې د دوشنبې له ورځې به نوې انټرنټي کڅوړې په ټيټه بیه خپلو مشتریانو ته وړاندې کړي.

په افغانستان کې انټرنټ ته د خلکو اړتیا د هرې ورځې په تېریدو مخ په ډېریدو ده؛ ځکه، نو افغان بیسیم مخابراتي شرکت په انټرنټي کڅوړو کې تخفیفونه راوستي دي.

د مخابراتو او معلوماتي تکنالوژې وزارت مسوولینو ويلي، چې د ولسمشر د حکم او د اقتصاد عالي شورا د پرېکړې له مخې له افغان بیسیم شرکت سره هوکړې ته رسیدلي، چې دغه شرکت به د انټرنټ بیې را ټيټوي.

د مخابراتو او معلوماتي تکنالوژۍ وزارت سرپرست فهیم هاشمي وايي، چې د ولسمشر د حکم او د اقتصاد د عالي شورا د پرېکړې له مخې په دې اړه له افغان بیسیم مخابراتي شرکت سره هوکړې ته رسیدلي دي.

د افغان بیسیم مخابراتي شرکت استازی  علي الله سروري وايي، چې پر ټیټ قیمت د انټرنټ نوې کڅوړې به د دوشنبې شپې پر دولس بجو خپلو مشتریانو ته وړاندې کړي.

په افغانستان کې د کورونا ویروس له کبله په ځينو لویو ښارونو کې پر تګ راتګ محدودیتونه لګیدلي او خلک اړ دي، چې په موبایل او انټرنټ له حالاتو ځان خبر وساتي.

خلک د افغان بیسیم د دغه ګام هرکلي کوي.

Continue Reading

پرمختګ او بشپړتیا

د کرنې او مالدارۍ وزارت پر ۳۲۵۰ هکتار ځمکه د انځرو باغونه جوړوي

Ariana News

خپور شوی

په

توسط

(Last Updated On: وری ۱۸, ۱۳۹۹)

د کرنې او مالدارۍ وزارت وایي، چې تر راتلونکیو ۵ کلونو پورې به په هېواد کې پر۳۲۵۰ هکتار ځمکه د انځرو باغونه جوړ شي.

د دغه وزارت مسوولینو ويلي، چې د انځر د باغونو د پراختیا ملي طرحه د ولسمشر له خوا منظور شوې او تر راتلونکیو ۵ کلونو به د هېواد په کچه د انځرو د باغونو د جوړولو په برخه کې ۶۰ میلیون ډالر پانګونه وشي او لسګونه کسانو ته به کاري زمینه هم برابره شي.

مسوولینو دا هم ویلي، چې له دې سره به په هېواد کې د انځرو د پروسس لسګونه مرکزونه هم جوړ شي.

اکبر رستمي د کرنې او مالدارۍ وزارت ویاند وایي، چې ډېري دغه باغو نه به په هرات، بلخ او کندهار کې جوړ شي. افغانستان د انځرو د تولید په برخه کې لوړ ظرفیت لري؛ نو، څکه مو ورته سوداګریزه طرحه جوړه کړې ده.

د اقتصادي چارو کارپوهان هم د کرنې وزارت له دې هڅې هرکلی کوي او زیاتوي، چې د کرني وزارت باید پر هغو کرنیزو برخو پانګونه وکړي، چې ښه سوداګریز مارکیټونه لري.

د اقتصادي چارو کارپوه حکیم الله صدیقي وایي، د کرنې وزارت باید ټول هغه کرنیز اقلام، چې په سیمه اونړۍ کې ښه مارکیټونه لري؛ پر هغو هم لکه د انځرو، پانګونه وکړي.

د کرنې او مالدارۍ وزارت مسوولین ويلي؛ افغانستان دمګړۍ د کال ۲۵ زره متریک ټن صادرات لري، چې د نويو باغونو له جوړیدو سره به د تولید کچه ۴۰ زره متریک ټن ته لوړه شي.

Continue Reading

پرمختګ او بشپړتیا

د آریانا افغان هوايي شرکت دوران ته ۶ نورې الوتکې هم ورزیاتیږي

Ariana News

خپور شوی

په

توسط

(Last Updated On: سلواغه ۱۶, ۱۳۹۸)

د آریانا افغان هوايي شرکت ویلي، د فعالیتونو د معیاري کولو لپاره به په نږدې را تلونکي کی ۶ نورې الوتکې هم د خپلو هڅو دوران ته ورزیاتې کړو.

د آریانا افغان هوايي شرکت مسوولینو زیاته کړې؛ دمګړۍ په دې هوايي  شرکت کې څلور الوتکي هڅې لري، چې په نږ دې راتلونکي کې به  شپږ نورې  مسافر وړونکې نوي الوتکي هم  ورزیاتې شي.

د اریانا افغان هوايي شرکت رییس عالم شاه ابراهیمي څرګنده کړې، چې له دې شپږ الوتکو څخه څلور به د افغان حکومت له خوا پېریدل کیږي او دوه هغه الوتکې، چې د چین هېواد لخوا افغان ولسمشر ته ډالۍ شوې وې؛ هغه به هم د باختر هوايي شرکت او آریانا هوايي شرکت تر چتر لاندې خپلې هڅې پیل کړي.

د اقتصادي چارو کار پوهان وايي، د آریانا افغان هوايي شرکت په تېر کې ډېرې لوړې ژورې لیدلي او له نوې رهبرۍ  هم هیله څرګندوي، چې باید دا ملي تصدي له مالي ستونزو وژغوري او له نړیوالو معیارونو یې برخمنه کړي.

د اقتصادي چارو کارپوه سلیم توپان وایي؛ مونږ له نوې رهبرې هیله لرو، چې دا ملي تصدي ته له شته ستونزونه راوباسې. مونږ منو، چې اوس تر یوه بریده ستونزو ته لاسرس روان دی؛ خو باید باید چاري نوري هم پراخې شي.

د آریانا افغان هوايي شرکت مسوولین وايي، ډېر ژر به دا شرکت له نړیوالو معیارونو او ریفورم برخمن شي او د یوې بهرنۍ کمپنۍ له خوا به په دې ملي تصدۍ کې کارونه پیل شي.

دوی دا ډاډ هم څرګند کړی، چې له مالي پلوه د دې شرکت پخوانۍ  ستونزې حل شوي او اوس د ځان بسیایني پر لور ډاډمن ګامونه پورته کوي.

خبریال: اسلم حجاب

Continue Reading

Trending