د قطر بهرنیو چارو وزیر په کابل کې د سترې محکمې پر موټر د ناڅرګندو وسلوالو برید، چې د دوه ښځینه قاضیانو په ګډون یې پېنځه کسانو ته مرګ و ژوبله اړولې؛ په کلکه وغانده.

د یکشنبې پر شپه د قطر بهرنیو چارو وزارت په یوه خپره شوې خبرپاڼه کې د انګېرنې او لاملونو له په پام کې نیولو پرته د تاوتریخوالي او تروریزم پر وړاندې خپل کلک دریځ په ډاګه کړ.

قطر نه یوازې د افغانانو د خپلمنځي خبرو په کوربتوب کې غوره هڅې تر سره کړي، بلکې د اړتیا پر وخت د منځګړیتوب ټټر یې هم وهلی دی.

د قطر چارواکو د قربانیانو کورنیو او د افغانستان خلکو ته خپله خواشیني هم وړاندې کړې ده.

د سترې محکمې دوه قاضیانې د یکشنبې پر سهار دندې ته پر لار ناڅرګندو وسلوال پر ډزو وژل شوي، چې د دوی د یو لاروي په ګډون یې درې نور کسان ټپيان کړي دي.

موخه ییزو وژنو په پلازمېنه کابل کې د وېرې کچه لوړه کړې ده. په دې بریدونو کې حکومتي چارواکي ، د مدني ټولنې مخکښان او خبریالان په نښه کیږي، چې د سولې خبرو د دوه یم پړاو له پیلېدو راپدیخوا ډېر شوي دي.

تر دې دمه هیچا د دې وژنو مسوولیت پرغاړه ندی اخیستی؛ خو یو شمېر حکومتي چارواکو یې پړه پر طالبانو اچولې ده.

دا په داسې حال کې ده، چې د یکشنبې پر ورځ ولسمشر اشرف غني یو ځل بیا پر ملکي وګړیو بریدونه وغندل او څرګنده یې کړه، چې ترهګري، وحشت او جرم د افغانستان د ستونزې حل ندی او له طالبانو یې وغوښتل، چې تلپاتې اوربند ومني.

د ملي پخلاینې عالي شورا مشر ډاکټرعبدالله عبدالله په دوحه کې د سولې خبرو د ګړندي کولو پر اړتیا ټینګار وکړ.

عبدالله عبدالله ویلي، چې د افغانستان د خپلمنځي خبرو جمهوریت پلوی پلاوي  هوډمن او واک لرونکی دی، له اجنډا سره سم پر ېلابېلو مسایلو له طالبانو سره خبرې وکړي.

عبدالله زیاته کړې: یو له هغه مقرراتو څخه، چې زمونږ د خبرو اترو ډله پرې ټینګار کوي؛ هغه د خبرو د ګړندي کولو لپاره د هرڅه ترسره کول دي.

د ملي پخلاینې عالي شورا مشر اوربند له طالبانو سره د جمهوريت پلوي پلاوي د خبرو لومړۍ بحث بولي.

د نوموړي د څرګندونو له مخې، د افغانستان بهرني متحدین هم د دې نظر پلویان دي.

هغه ټینګار کوي: تر کومه ځایه، چې مونږ پورې اړه لري؛ هر اړخیزې سولې ته رسېدل، د تېرو۲۰ کلونو لاسته راوړنې زمونږ د خلکو د سرښندنو پایله ده او همدا اصل زمونږ د خبرو اترو د ډلې لارښوونه کوي.

عبدالله عبدالله په دې اند دی، چې سیمه ییزه او نړیواله اجماع د سولې لپاره د افغانستان یوه اړتیا ده؛ ځکه ، نو د سیمه ییزې او نړیوالې همکارۍ راجلبولو لپاره هڅې روانې دي.

که څه هم د دوحې د خبرو له پیل څخه دوه اوونۍ تېریږي، خو جمهوريت غوښتونکیو او طالب استازیو تر دې دمه د خبرو لپاره پر ګډه اجنډا هوکړه نده کړې.

په افغانستان کې د هندوانو او سیکهانو له زرګونه کورنیو یوازې دوه سوه پنځوس کسان پاتې دي او نور له هېواده وتلې دي.

افغان سیکهان او هندوان څرګندوي، چې په وروستیو پېنځه کلونو کې دوی هم نورو هېوادوالو ته ورته له مرګونو بریدونو سره مخ شوي او ځاني او مالي زیانونه یې ولیدل؛ نو، ځکه د دوی ډېرې کورنۍ له هېواده بهر کډوالې شوې.

د هندوانو او سیکهانو د شورا مشر ويلي، چې په کابل کې د سکهانو پر درمسال له برید وروسته پېنځه سوه هندوان او سیکهان هند ته کډه شول.

په افغانستان کې د هندو او سیکهـ مذهبه لږکيو شمېر په افغانستان کې دوه سوه زرو ته رسیده؛ خو اوس یوازې دوه سوه پنځوس کسان پاتې دي، چې یو سل و شل یې په کابل او پاتې نور په ولایتونو کې ژوند کوي.

هندوان او سیکهان وايي، چې ډېر شمېر کورنۍ په وروستیو پېنځه کلونو کې د افغانستان پریښودو ته اړې شوې.

د افغانستان د سیکهانو او هندوانو د ګذر وکیل سوندر سینګهـ ویلي: باید یوه تلپاتې سوله رامنځته شي. ۴۰ کله جګړه مو لیدلې: نتور جنګ بس دی. وضعیت نور هم خراب شوی. که دا حالت روان وي، پاتې سرداران به هم له هېواده کډه کولو ته اړ شي.

هندوان او سیکان وايي، چې له یوې خوا یې ژوند په خطر کې دی او له بلې خوا یې ځمکې او ملکیتونه غصب شوي او په ټولنه کې ځورول کیږي.

دوی اوس د کابل په یوه درمسال کې را غونډ شوي او ټول یو ځای ژوند کوي.

څه موده مخکې د کابل د شور بازار پر درمسال وسلوال برید وشو، چې لسګونه کسانو ته یې مرګ و ژوبله واړوله. له دې برید وروسته پېنځه سوه کسان هندوستان ته ولاړل.

د افغانستان سیکهان او هندوان وايي، چې له خپل هېواد سره یې مینه نه شلیدونکې ده او که د ژوند شرایط برابر شول، ټول به بېرته راستنیږي.