Connect with us

بی بی سی پښتو

امرالله صالح: نیمه کورنۍ او د دفتر غړي مې په کورونا وېروس اخته شوي

Avatar

خپور شوی

 په

(Last Updated On: غبرګولى ۱۵, ۱۳۹۹)

د افغان ولسمشر لومړي مرستیال امرالله صالح ویلي، نیمه کورنۍ او د دفتر غړي یې په کورونا وېروس اخته شوي دي. ښاغلي صالح پر خپله فسبوک پاڼه لیکلي چې افغانستان د کورونا وبا له امله په بدترین حالت کې دی.

“لطفاً ددې هېواد د عامې روغتیا د وزارت سپارښتنې جدي ونیسئ او په خپلو کورنیو یې پلي کړئ. موږ ټول باید په ګډه کار وکړو څو دا وېروس له منځه یوسو، خو بیا هم هېڅوک په امن کې نه دي. زما د کورنۍ له نیمايي غړو څخه زیات او د دفتر ټول همکاران مې په دې وېروس اخته شوي دي.”

ښاغلی صالح وايي، چې د دې پېښو په اړه یې مخکې له مخکې خبر درلود او په ټکو یې دولت د خلکو په چوپړ کې دی.

دوه ورځې وړاندې هم ښاغلي صالح په یوه ویډیویي پیغام کې ویلي وو چې په افغانستان کې د کورونا وېروس بحران لا خپل اوج ته نه دی رسېدلی، او پر خلکو یې غږ کړی و چې روغتیایي سپارښتنو ته جدي پام وکړي.

د روغتیا وزارت نوی سرپرست: خلک له ناسمو روغتیایي خدماتو تر پوزې راغلي

بل لور ته د افغانستان د عامې روغتیا سرپرست وزير احمد جواد عثماني نن د پنجشنبې په ورځ خپله پېژندغونډه کې وویل، په عادي شرایطو او له کورنا مخکې حالت کې هم د افغانستان روغتونونو د ټیټ کیفیت له امله د خلکو باور تر لاسه نه کړ.

د نوموړي په خبره، که څه هم تېرو دوو لسیزو کې د مور ماشوم د مړینې کمښت کې پاموړ کموالی راغلی، د روغتیا برخه کې نور پرمختګونه شوي، خو بیا هم روغتیایي خدمتونه له اړتیا خورا ټیټ او کمزوري دي:

“له دې بد وضعیت په تېرو تر روغتونونو خلک تر پوزې راغلي، ډېر خلک چې خپلوان یې په کورونا اخته دي رسنیو کې تل دا خبرې کوي چې د خدمتونو د کمښت یا نشتولي له امله اړ شول چې د روغتون په ځای کور کې درملنه وکړي او دا دردوونکې ده”.

په دا مهال د روغتیا وزارت د معلوماتو له مخې په تېر شپه او ورځ کې د هېواد په لابراتوارونو کې ۱۰۷۹ د کورنا وېروس نمونې معاینه شوې چې له ډلې یې ۷۸۷ مثبت ختلې دي.

ښاغلي عثماني دا هم وویل، چې له کورونا سره مبارزه، په روغتونونو کې سمون(اصلاحات) او د نادولتي موسسو پر روغتیايي چوپړونو څار د ده د دندې لپاره درې اېښودل شوي شرطونه دي.

ښاغلی عثمانی وایي، له کورونا سره مبارزه کې د عامې روغتیا وزارت کړې هڅې منسجموي:

“طرحې او پلانونه به ورته جوړ کړم چې له کورونا سره مبارزه هم وشي، د تشخیص ظرفیت به لوړ کړو، قرنطین او تجرید مرکزونه به په داسې ځایونو بدل کړو چې خلک په ډاډه زړه را شي. په روغتونونو کې د درملنې معیار لوړ کړو”.

ښاغلی عثمانی په روغتونونو کې د سمون را وستلو او بنسټیزو بدلونونو ژمنه هم کوي.

د نوموړي په خبره، د افغانستان په ۳۱ ولایتونو کې روغتیايي چوپړونه د نادولتي موسسو له لوري وړاندې کیږي او په درې روغتونونو کې روغتیايي چوپړونه د عامې روغتیا د وزارت له لوري ترسره کیږي:

“دا چوپړونه جدي بیا ارزولو ته اړتیا لري چې وشو کولی چوپړونه ګټور ثابت شي او هم غیردولتي موسسو پر وړاندې شته ستونزې هوارې شي.”

روغتیا

Getty Images

دې غونډه کې د افغانستان د عامې روغتیا پخواني وزیر ښاغلي فیروز الدین فیروز ومنله چې په دې وزارت کې ترسره شوي کارونه ښه ، خو کافي نه و، ځکه په ټکو دې وزارت کې ستونزې وې او وي به.

ده وویل، د دندې په پیر کې یې په هېواد کې له څلور سوو ډېر روغتیايي مرکزونه زیات شول.

ښاغلي فیروز زیاته کړه چې په نړیواله کچه د افغانستان د روغتیا وزارت له ښه باوره برخمنه ده او اړیکې یې پراخې دي چې دا وزارت په نړیواله کچه د “ګوې” د بورډ او د “پي اېم.اېن سي اېچ’ غړیتوب لري.

د روان کال د مې په ۳۱مه نېټه افغان ولسمشر محمد اشرف غني ډاکټر احمد جواد عثماني د عامې روغتیا نوی سرپرست او نوماند وزیر ونوماوه.

تر دې دمه د ښاغلي فېروز د لېرې کېدو لامل نه دی څرګند، خو د افغانستان د عامې روغتیا وزارت نوی سرپرست په داسې مهال خپله دنده پیلوي چې دا هېواد د کورونا وېروس له جدي بحران سره مخ دی.

Continue Reading
Advertisement

بی بی سی پښتو

هغه کډواله وکیله چې د کال دوه لکه ډالره تنخا نه تېره شوه

Avatar

خپور شوی

په

(Last Updated On: چنګاښ ۱۶, ۱۳۹۹)
ریز

Rez Gardi
ریز ګاردي د ښځو د حقونو او عدالت لپاره له خپلې قانوني تجربې ګټه اخلي

  • سواميناتان ناتاراجان
  • بي بي سي

ریز ګاردي د یوې داسې قضیې لپاره، چې دفاع ته یې ځان وقف کړی دی، د امریکا په یوه باوري حقوقي شرکت کې د سلاکارې دنده او هر کال ۲۰۰ زره ډالر تنخا پرېښوده.

ریز بي بي سي ته وویل: “په لوړه تنخا ښه دنده کې مې تل له یوې لویې قضیې سره زړه تړلی و. ما حقوق د یوه مشخص هدف لپاره ولوستل، هغه دا چې د قانون په مټ د مثبت بدلون لپاره ټینګه ودرېږم.”

ریز د هغو ښځو د حقونو له مدافعانو سره ودرېده چې د “اسلامي دولت” (داعش) نومې ډلې د وسله والو لخوا په پلان شوې توګه تښتول کېږي، خرڅېږي او تېري ورباندې کېږي.

دا وايي: “مور او پلار مې له خپلو مېنو وتښتېدل او زه یې د نړۍ بلې خوا ته لیرې بوتلم، خو ما خپلې خاورې ته د ستنېدو لار ونیوه”.

د سیتم منځ کې لویېدل

ریز عراق کې

Rez Gardi
ریز ګاردي وايي، د ایزیدیانو کړاو تر تصور لوړ دی

ریز په ۱۹۹۱ کال پاکستان کې د کډوالو کمپ کې زیږېدلې، مور او پلار یې عراقي کردان دي.‌ ریز ته په کوچنیوالي کې د خپلې کورنۍ غړو، ګاونډیانو او ملګرو د صدام حسین د واکمنۍ د مهال ترخې کیسې کړې چې څنګه یې ژوندونه تبا شول.

کله چې ریز اوه کلنه شوه، له خپلې کورنۍ سره نیوزیلنډ ته ولاړه.‌ تېر کال د هاروارډ پوهنتون د حقوقو له پوهنځي فارغه شوه.

دا وايي: “چاپېریال کې مې پر برابرښت، عدالت او انساني حقونو ته ډېر اهمیت ورکړ،‌ سیتم مو وګاله،‌ مخکې له دې چې د بشري حقونو په معنا پوه شم، ډېر تریخ ژوند مې تېر کړ”.

“ښايي له ما سره هم داسې وشي”

اوس ریز د عراق شمال کې – هغه سیمه چې د ۲۰۱۴ کال ناورین پکې رامنځ ته شوی – د عیني شاهدانو ګواهۍ راټولوي.

ریز

Rez Gardi
ریز پخپلو څېړنو کې د هغو ښځو پر ګواهیو تکیه کوي، چې له رسنیو سره لا نه دي غږېدلې

کله چې “اسلامي دولت” نومې ډلې دا سیمه ونیوه، یوازې ایزیدي لږکي یې په نښه کړل چې د وګړو شمېر یې تر نیم میلیون ډېر نه و،‌ دغې ډلې دا خلک کافر ګڼل او د انسانانو په سترګه یې نه ورته کتل.

داعش وسله والو برید پرې وکړ، زرګونه ترهېدلو کلیوالو سنجار غره ته پنا یووړه، خو د لمر سوځنده وړانګو یې ډېری وګړي ووژل.

“اسلامي دولت” ډلې د ایزیدیانو ډېری سړي چې د جګړې توان یې درلود، جګړې ته اړایستل. د لندن اقتصاد کالج د تېر کال یوه رپوټ کې ویل شوي، کابو لس زره ایزیديان په دې برید کې یا وژل شوي او یا تښتول شوي دي.

زرګونه ایزیدیان د "اسلامي دولت" له نومې ډلې لاس ته لوېدلي وو

Getty Images
زرګونه ایزیدیان د “اسلامي دولت” له نومې ډلې لاس ته لوېدلي وو

خو ښځې او نجونې یې اسیرانې شوې.

ریز وايي: “کله چې له ژغورل شویو ښځو سره د زړه خواله کوم او کیسې یې اورم، زړه مې مات شي او د قهر وروستي حد ته ورسېږم.”

جنګي جرمونه

ریز هغو ښځو ته د رسېدو هڅه کوي چې هلته رسنۍ او د بشري حقونو ډلې لاسرسی نه ورته لري.

ځینې ایزیدیان عراق ته وتښتېدل

Getty Images
ځینې ایزیدیان عراق ته وتښتېدل

دا وايي: “ایزیدیانې باید په یاد کړي چې څو ځله خرڅې شوې او هغه ځایونه ور په زړه کړې چې دوی پکې بندیانې شوې دي. د تښتونې او جنسي تېري د ګواهیو ثبوتونه هم وړاندې کړي. د اسلامي دولت سرغړوونکي جنګیالي هم باید وپېژني.”

ریز وايي: “داعشیانو ښځې له سړو جلا کړې، بیا یې بوډاګان له ځوانانو بېل کړل. لامل یې دا و چې د جنسي غلامانو په توګه د کم عمر نجونو قیمت د دوی په نزد لوړ و. د لوړ عمر ډېری ښځې او سړي یې سم لاسي اعدام کړل”.

ریز وايي، دا جرمونه نه یوازې پر داعش جنګیالیو پورې تړلي، بلکې په وینا یې “د موصل ځینې عربان – په تېره شتمن او نفوذ لرونکي کسان – هم د ایزیدي ښځو په پېر او پلور کې ښکېل وو”.

د عدالت لپاره کمپاین

نادیه مراد له اسیرو شویو ښځو وه، په ۲۰۱۴ کال “اسلامي دولت” جنګیالوی ربړولې او جنسي تېری یې پرې کړی. نادیه هغه مهال ۲۱ کلنه وه.‌

ځینې کورنۍ په بشپړه توګه د وسله والو له بریدونو وتښتېدې

Getty Images
ځینې کورنۍ په بشپړه توګه د وسله والو له بریدونو وتښتېدې

د حقوقو دغې فعالې ته په ۲۰۱۸ کال د نوبل د سولې جایزه ورکړل شوه. خو دا هم د نورو ایزیدیانو په څېر هغسې چې غوښتل یې عدالت ورسره ونه شو.

ریز وايي: “ځینې مشکوک کسان عراق کې نیول شوي، ځینې سوریه او ځینې یې اروپا کې دي. په ځینو حالاتو کې داسې قوي ثبوتونه شته چې دوی دې پرې محاکمه کړل شي.”

خو سوریه لاهم د کورنۍ جګړې په اور کې سوځي. د عراق قضايي سیستم کې لویې ستونزې دي.

د نړیوال عدالت د مرکز له مخې – هغه نادولتي مؤسسه چې امریکا کې مرکز لري – په ساده ټکو، دا قضايي سیستم د ربړونو، جنسي ځورونو، ټولوژنو او بشر ضد جرمونو له قضیو سره د عادلې معاملې توان او وړتیا نه لري.

نادیه مراد (ښۍ خوا) او حقوقپوهه امل کلوني د ملګرو ملتونو امنیت شورا ته د وینا پرمهال

Getty Images
نادیه مراد (ښۍ خوا) او حقوقپوهه امل کلوني د ملګرو ملتونو امنیت شورا ته د وینا پرمهال

محاکمې

پر دې نیوکو او نیمګړتیاوو سربېره، په وروستیو کې یوې عراقۍ محکمې د یوې ایزیدۍ نجلۍ اشواق حجي (چې د جرم پرمهال ۱۴ وه) د جنسي تېري په تور د “اسلامي دولت” نومې ډلې یو غړی په اعدام محکوم کړ.

تښتول شوې او ځورول شوې ایزیدۍ اشواق حجي

Getty Images
د تښتول شوې او ځورول شوې ایزیدۍ اشواق حجي تښتوونکی وروستیو کې عراقي محکمې په اعدام محکوم کړ

اشواق جرمني له جرمني ستنه شوه، چې د تورن پرضد ګواهي ورکړي.

په تېره اپریل میاشت کې، د جرمني یوې محکمې د یوه سړي پرضد هغه دوسیه راپورته کړه چې یوه مور او لور یې پکې ځورولي او بیا یې پنځه کلنه لور وژلې وه.

دا لومړی ځل دی چې اروپا کې د قرباني شویو ایزیدي ښځو په حق کې پرېکړې کېږي.

بالاخره ریز بېرته خپل ټاټوبي ته راستنه شوه

Rez Gardi
بالاخره ریز بېرته خپل ټاټوبي ته راستنه شوه

ریز وايي: “عدالت راتلل به کلونه وخت ونیسي. د ثبوتونو راغونډول اوږدمهاله کار دی. خو موږ د ځینو بریاوو شاهدان یو. همدا موږ ته هیله راکوي”.

ریز وايي، نیا او دوه نورې توړۍ یې په یوه کیمیاوي برید کې ووژل شوې او نیکه یې شل شو. “مور مې د خپلې مور مرګ په سترګو ولید، په لس کلنۍ کې د یوې مور غمونه او مسئولیتونه ورپاتې شول”.

ریز ګادي

Getty Images
ریز ګادي پر خپل کردي هویت ویاړي

د بشري حقونو د څار سازمان اټکل کوي چې په ۱۹۸۸ کال د ۵۰ او سلو زرو ترمنځ کردان وژل شوي. کردي سرچینې دا شمېر تر ۱۸۰ زرو ډېر یادوي.

ریز پر دې اند ده چې صدام حسین کردان له برابرۍ محروم کړي وو او صدام د ټولوژنې مسئول بولي.

ریز وايي: “کله چې د ایزیدیانو لپاره مبارزه کوم، داسې احساس کوم چې ګنې د صدام په لاس د وژل شویو کردانو لپاره هم مبارزه کوم. ایزیدیان کورني لږکي دي، ځکه نو ډېر کمزروي هم دي.”

کوویډ-۱۹ له قربانیانو سره د قربانیانو مرکې او د ثبوتونو راټولول له ځنډ سره مخامخ کړي

Rez Gardi
کوویډ-۱۹ له قربانیانو سره د قربانیانو مرکې او د ثبوتونو راټولول له ځنډ سره مخامخ کړي

ملګرو ملتونو د “اسلامي دولت” د سرغړونو څېړلو لپاره یوه جرګه ګۍ هم ټاکلې ده.

ریز هیله منه ده چې ایزیديانې به عدالت ورسېږي او راتلونکي نسلونه به هم ګټه ترې واخلي.

دا وايي، د قربانیانو ټپونه به ورغېږي او عدالت به مجرمین قانون ته راکش کړي:

“د یوې داسې غوره نړۍ لپاره مبارزې ته اړتیا لرو چې دا ډول کړنې پکې بیا تکرار نه شي.”

Continue Reading

بی بی سی پښتو

پاکستان: پولیسو هغه سړی نیولی چې خپلې لور پرې د جنسي تېري تور لګولی

Avatar

خپور شوی

په

(Last Updated On: چنګاښ ۱۵, ۱۳۹۹)
پاکستان

Getty Images

د پاکستان پنجاب ایالت کې پولیسو هغه سړی نیولی چې خپلې لور پرې د جنسي زور زیاتي تور پورې کړی. دغې ښځې پر خپل پلار رسماً تور پورې کړی چې جنسي تېری یې پرې کړی، د جنسي عمل ویډیو یې ترې اخیستې او د خوښې خلاف یې په کور کې ایساره کړې وه.

دغه ښځه ادعا کوي چې پلار یې په خپله خوښه د واده کولو له کبله اته کاله په ځنځیرونو تړلې وه.

د ډېره غازي خان ګدايي سیمې پولیس افسر شکیل بخاري وايي، پولیسو دغه سړی نیولی چې محکمې د پوښتنو ګروېږنو لپاره توقیف ته استولی او لور یې امن کور ته لېږل شوې ده.

پولیس وايي، د جنسي تېري تورونو معلومولو لپاره ډي این اي معاینات شوي، چې پایله به یې له یوې نیمې تر دوو میاشتو پورې وخت واخلي.

پولیس وايي، د دغې ښځې له بیان وروسته به محکمه پرېکړه کوي، چې پلارګنۍ ته او که خسرګنۍ ته د تلو اجازه ورکړل شي.

ارجنټینی پلار چې شل کاله یې پر خپله لور جنسي تېری کاوه

كلاوس كينسكي ” پر خپلې لور جنسي تېری کړی”

بغلان کې پلار پر لور “پر له پسې جنسي تېری کړی”

بل لور ته پولیس افسر شکیل بخاري وايي، د ښځې پلار پولیسو ته ویلي، چې په تېروتنه یې پر لور جنسي تېری کړی، خو د ښځې وروڼه بیا وايي، خور یې غوښتل د مېړه کره لاړه شي، ځکه یې پر پلار د جنسي تېري تور پورې کړی دی.

ښځې دغه راز تور پورې کړی چې ۲۰۱۲ کال کې یې پخپله خوښه واده وکړ او پلار یې محکمې ته عریضه کې پر مېړه تور پورې کړ، چې تښتولې یې ده، خو محکمې د ثبوتونو نشتوالي له کبله هغه قضیه رد کړه.

د ښځې مېړه هم ادعا کوي، چې د مېرمنې پلارګنۍ یې درې میاشتې په بلوچستان کې ایسار کړی و او له کورنۍ یې د پیسو یا نجلۍ بېرته ورسپارلو غوښتنه کوله.

ښځه وايي، پلار یې ورته ویلي و چې که کورته ستنه شي، مېړه به یې خوشی شي. دا وايي: ما ورته ویل ښه ده، همداسې به وکړو او مېړه مې خوشی شو.

دغه ښځه او مېړه یې تور پورې کوي چې د سیمې مخورو په منځګړیتوب ښځه د پلار کره لاړه، چې د هغوی په خوښه به له سره د واده مراسم ترسره کوي، خو هلته پلار په ځنځیرونو وتړله او جنسي تېری یې پرې کړی.

دغه ښځه ادعا کوي، چې کور ته د ستنېدو پر مهال مېندواره وه او پنځه ورځې وروسته یې لور وزېږېده، چې په خبره یې ۱۵ ورځې وروسته یې پلار پر ځمکه وویشته او ومړه.

د یادونې ده چې دغې ښځې په خپله عریضه کې د لور یادونه نه ده کړې. بل لور ته د ښځې خپلوان وايي، ماشومه د ناروغۍ له کبله مړه شوې.

پولیس افسر شکیل بخاري وايي، دوی ته معلومه شوه، چې د سیمې یوه سړي خپله لور د خوښې خلاف په کور کې ایساره کړې او دوی دغه ښځه له کوره د پولیسو مرکز ته راوستله.

پولیس وايي، د نیول شوي سړي په موبایل ټیلیفون کې یې هغه ویډیو هم وموندله چې خپله لور یې پرې ګواښله.

Continue Reading

بی بی سی پښتو

هندي سينما کې د خپلوۍ پاللو سرلاری څوک دی؟

Avatar

خپور شوی

په

(Last Updated On: چنګاښ ۱۶, ۱۳۹۹)
  • نصرت جهان
  • بي بي سي اردو ډاټ کام، لندن

وايي بریالیتوب او تکړه والی هر وخت په بېلا بېلو ډولونو په کچه کېږي، یا ناپ کېږي.

یو وخت به هغه فلم بریالی ګڼل کېده چې تر پنځویشت یا پنځوسو اونیو به د سينماګانو پر پردو وچلېد او مينه وال به يې خپل کړل، خو اوس د باکس افس یا په کمه موده کې د فلم د ډېرې مالي ګټې تر لاسه کولو زمانه ده، که یوه فلم په څو ورځو کې ډېرې پيسې وګټلې او خپله د ارزښت شمېره يې تر سلو واړوله نو د فلم هلک د سينما پاچا او نجلۍ ملکه ګڼل کېږي.

خو اوس د یوه فلمي ستوري د هنر د کامیابۍ کچه په یوه بله لار هم مالومول کېږي؛ پر خواله رسنیو. یانې داسې چې پر خواله رسنيو د چا مینه وال یا فالورز ډېر دي.

د هندي سينما تکړه نڅاګرې نوره فتحي تېره اونۍ سم جشن جوړ کړ، ځکه چې پر انسټاګرام يې د مینه والو شمېر تر ۱۴ ميلیون واوښت.

اغلې فتحي په همدې خوشالۍ خپله د ګډا هغه وېډيو خپره کړه چې په ۲۰۱۸ کال کې د هند د ښکلا ملکې سره په سیالۍ وه. دې له دغې وېډيو سره لیکلي وو چې همدې نڅا د دې ژوند بدل کړ او له هماغه راهیسې ورته د فلمونو د مرکزي سندرې لپاره د ګډېدو وړاندیزونه پيل شول.

د نوره فتحي څو سندرې ډ‌ېرې مشهورې شوې دي، لکه ‘دلبر دلبر’ او ‘او ساقي ساقي رې’.

په هندي سينما کې خپلوي او خېښي پالنه

د باليووډ فلمي ستوري سوشانت سېنګ راجپوت تر ځان‌وژنې وروسته یو شمېر فلمي او ځینو عامو خلکو د هغه په غم اوښکې تویې کړې او له دې کیسې وروسته د هغه پر وير ماتم کوونکي ډېر شول.

په دې نوملړ کې نوی نوم د شېکر سمن دی چې په فلمي نړۍ کې يې ځان ته کوم ځانګړی نوم ونشو ګټلی. ښايي ځکه ده هم ځان ته دا حق ورکړی چې په باليووډ کې د خپلوۍ او خېښۍ پاللو بحث کې ځان ورګډ کړي.

کرن جوهر او کنگنا رناوټ

Getty Images
پر کرن جوهر تر ټولو لومړی لفظي برید هم همدې کنګنا رناوټ د هغه په یوه خپرونه ‘کافي وېت کرن’ کې کړی و. دې ښاغلی کرن په باليووډ کې د خپلوۍ او خېښۍ پاللو سرلاری بللی و.

دی د سوشانت سېنګ د مور او پلار لیدو ته بېهار ته لاړ او د هغوی د کور په مخکې يې له رسنیو سره په خبرو کې وویل چې، ‘سوشانت سېنګ ته به خامخا انصاف غواړي’.

له رسنیو سره د شېکر سمن د دغو خبرو د وېډيو له خپرېدو سره سم په بېهار ایالت کې د کېدوونکو ټاکنو او پکې د ده د سیاسي ارادو خبرې هم د هر چا په خوله شوې.

ویل کېږي چې د هغه پر دې کار د سوشانت کورنۍ ناخوښه ده، ځکه چې نه غواړي د هغه مړينه څوک د سیاسي ګټې لپاره وکاروي.

کرن جوهر تر ټولو ډېر پر خپلوۍ پالنه تورن دی

په هندي سينما یا باليووډ کې د خپلوۍ او خېښۍ پالنې په مسله کې تر ډېره ګوته فلم جوړوونکي کرن جوهر ته نېول کېږي.

اوس پر خواله رسنیو د هغه پر ضد یو ډول جګړه پېل شوې ده. وړمه ورځ یوه پر خپله ټوېټر پاڼه ولیکل چې د ريلاینس انټرټېمنټ په نوم سينمايي کاروباري ادارې له ‘سوریه ونشي’ فلم د کرن جوهر نوم ایستلی دی.

په دغه راروان هندي فلم کې اکشې کمار مرکزي رول لوبولی او د فلم جوړوونکی روهېت شيټي دی. کرن جوهر د دغه فلم پروډيوسر یا لارښود دی.

د ريلاینس انټرټېنمنټ اجرایئه مشر شباسېش سرکار دا خبره رد کړې او له خلکو يې غوښتي چې پر خواله رسنیو د کرن جوهر له ځورولو لاس واخلئ. د ده په خبره، داسې خبرې د هغو یو څو کسانو کار دی چې د نورو له ځورولو خوند اخلي.

د سوشانت سېنګ تر ځان‌وژنې وروسته په هندي سينما کې د خپلوۍ پالنې پر ضد فلمي ستورې کنګنا رناوټ غږ پورته کړ. پر خواله رسنیو يې په يوه وېډيو کې په دې اړه نيوکې وکړې چې ګڼو خلکو يې خبرې ورسره بدرګه کړې. له هغې وروسته پر ځينو فلمي کورنيو او د هغوی پر اولادونو نېوکې پيل شوې.

ویل کېږي چې که د کومې فلمي کورنۍ غړی نه يې او یا دې تر شا د کومې لویې فلمي سټې لاس نه وي نو په فلم کې په اسانه څوک رول نه درکوي. کرن جوهر وارله مخه د څو فلمي ستورو زامنو، لوڼو یا نورو خپلوانو ته په فلمونو کې مرکزي رول ورکړی دی نو ځکه اوس په دې مسله کې د پاڼ او پړانګ تر منځ ورغلی دی.

پر کرن جوهر تر ټولو لومړی لفظي برید هم همدې کنګنا رناوټ د هغه په یوه خپرونه ‘کافي وېت کرن’ کې کړی و. دې ښاغلی کرن په باليووډ کې د خپلوۍ او خېښۍ پاللو سرلاری بللی و.

په دې شو یا خپرونه کې وتلی فلمي ستوری سيف علي خان هم و. په یوه اوسنۍ مرکه کې سيف علي خان ویلي چې هغه مهال دی هېڅ نه پوهېده چې کنګنا څه ویل غواړي خو په خبره يې، د یو چا په خپرونه کې ګډون کول او بیا د هغه سپکول یا د خلکو په نظر کې کم راوستل سم کار نه دی.

سيف علي خان همدا راز ویلي چې کرن جوهر په هندي سېنما کې یو بریالی کس او پر سمبول بدل شوی سړی دی نو ښايي ځکه خلکو ته پر هغه نېوکې کول اسان دي. دی وايي چې پر کرن جوهر باید داسې انتقاد ونشي.

Continue Reading

Trending