Connect with us

تازه خبرونه

افغان حکومت به د مسکو په ناسته کې ګډون ونکړي

Ariana News

خپور شوی

 په

(Last Updated On: لړم ۲, ۱۳۹۸)

 یوې دولتي سرچینې ویلي؛ د افغانستان استازي به په هغه ناسته کې، چې ټاکل شوې د جمعې پر ورځ د افغانستان په اړه د امریکا، روسیې، چین او پاکستان د استازیو په حضور کې د مسکو پر کوربتوب جوړیږي، ګډون ونکړي.

روسیه د افغانستان سولې په تړاو د څلور اړخیزې ناستې کوربتوب ته چمتووالی نیسي او ټاکل شوې، چې د امریکا، چین، پاکستان او روسیې استازي د جمعې پر ورځ په مسکو کې د افغانستان د سولې په تړاو مشورتي ناسته تر سره کړي.

تر اوسه د دې ناستې د اجنډا په اړه جزئیات ندي ښکاره شوي.

 له دې سره په یوه وخت د افغانستان د سولې لپاره د امریکا ځانګړی استازی زلمی خلیلزاد ویلي، د بلجیم په سفر کې مو د افغانستان د سولې له بهیره د ملاتړ لپاره د اروپایي همکارانو ژمنه اخیستل شوې ده.

افغان دولت ندي ویلي، چې ولې په دې ناسته کې ګډون نکوي.

ټاکل شوې د افغانستان سولې لپاره د امریکا ځانګړی استازی زلمی خلیلزاد په دې ناسته کې ګډون وکړي، خو په مسکو کې یې له حضور مخکې تویت کړی، چې:

تېره ورځ مې په بروکسل کې د افغانستان له دفاع وزیر سره ښه ناسته درلوده او دغه راز له اروپایي همکارانو سره د افغانستان د سولې د ملاتړ لپاره مو د خلکو د هیلو د پلي کولو په تړاو سلا  او بحثونه تر سره کړه.

د مسکو دا مشورتي ناسته په داسې حال کې جوړیدونکې ده، چې چین هم د افغانانو یوې خپلمنځي ناستې جوړېدو ته چمتووالی نیولی.

د چین بهرنیو چارو وزارت ویلي، د دې ناستې برخوال به یوازې د افغانستان کړکیچ د حل لپاره خپل لیدلوري بیان کړي.

د چین د بهرنیو چارو وزارت ویانده هواچنینګ وايي، چې چین د افغان دولت، طالبانو او نورو ګوندونو له خبرو کلک ملاتړ کوي. په دې ناسته کې، چې مونږ یې غواړو، ترې کوربتوب وکړو؛ ګډون وال به د افغانستان جګړې د پای لپاره یوازې خپل شخصي لید لوري څرګند کړي.

طالبانو ویلي، چې د ملا عبدالغني برادر په مشرۍ به د دوی یو پلاوی د چین په ناسته کې ګډون وکړي؛ خو حکومت تر اوسه پدې اړه خپله پرېکړه نده اعلان کړې.

د ناتو سرمنشي د چارشنبې پر ورځ ویلي وه، چې دوی د امریکا او طالبانو د خبرو له بیا پیل ملاتړ کوي. هغه له طالبانو هم غوښتي وه، چې د خبرو میز ته په بېرته را ګرځیدو دې نرمښت وښیي.

تازه خبرونه

په کندهار کې ۱۹ طالبانو او ۷ پولیسو ته مرګ و ژوبله اوښتې

Ariana News

خپور شوی

په

توسط

(Last Updated On: تله ۴, ۱۳۹۹)

د کندهار امنیتي چارواکو ویلي، چې د دې ولایت په تخته پل ولسوالۍ کي ۱۹ وسلوالو طالبانو او ۷ پولیسو ته مرګ ژوبله اوښتې ده.

د کندهارامنیه قومندانۍ ویاند جمال ناصر بارکزي ویلي؛ تېره شپه وسل والو طالبانو د تخته پل ولسوالۍ د ملید پر پوسته ډلیز برید تر سره کړی، چې په کې اته وسلوال وژل شوي یوولس نور ټپیان دي.

نوموړي زیاته کړې، چې په دې نښته کې درې پولیس هم وژل شوي او څلور نور ټپیان دي.

دغه راز چارواکو ویلي؛ په روزګان ولایت کې له تېرو څو ورځو راپدیخوا په نښتو کې لږ تر لږه ۶۴ سرتېري وژل شوي دي.

په دې ولایت کې سیمه ییزو چارواکي څرګنده کړې، چې د روزګان ولایت ګیزاب ولسوالي له څو ورځو راپدیخوا د طالبانو تر محاصرې لاندې ده او له تېرو دوه ورځو پر دهراود ولسوالۍ هم بریدونه روان دي.

سیمه ییز چارواکي خبرداری ورکوي که مرستندوی ځواکونه ور ونه رسیږي دواړه ولسوالۍ به سقوط وکړي.

وسلوالو طالبانو تر دې دمه په دې اړه څه ندي ویلي.

دا په داسې حال کې ده، چې د دوحې د خپلمنځي خبرو له پرانستې را پدیخوا په ټول هېواد کې د ښکېلو خواوو تر منځ نښتو زور اخیستی دی.

Continue Reading

تازه خبرونه

د روزګان دهراود او ګيزاب ولسوالۍ د سقوط په درشل کې دي

Ariana News

خپور شوی

په

توسط

(Last Updated On: تله ۴, ۱۳۹۹)

د روزګان ولايت سيمه ییزو چارواکو ویلي؛ که د دې ولایت دهراود او ګیزاب ولسوالیو ته پوځي مرسته ونه رسيږي، نو په دې ولسواليو کي محاصره سرتېرو ته به درنده مرګ و ژوبله واوړي او دا ولسوالۍ به سقوط شي.

په دغو ولسواليو کي له تېرې يوې اوونۍ راپدیخوا سخته جګړه روانه ده او د ولسواليو مرکزونه وسلوالو محاصره کړي دي.

د سيمي اوسيدونکي وايي، د جګړې په لومړۍ کرښه کې عام خلک بند پاتي دي او ډېري کسان د جګړې له کبله مړه او ټپيان شويدي.

له تېرو لس ورځو څخه د روزګان د ګيزاب ولسوالۍ مرکز د وسلوالو طالبانو له خوا تر محاصرې لاندې دى او هلته لسګونه سرتېري هم وژل شوي دي.

په روزګان کي امنيتي مسوولينو ويلي؛ په ګيزاب کي تر اوسه د جګړې له کبله ٦٤ امنيتي سرتېري وژل شوي او همدا شان ملکي کسانو ته هم مرګ و ژوبله اوښتې؛ خو دوى ته يې شمېر ندى معلوم.

د دوى په خبره له تېرو دوه ورځو را پدیخوا د دهراود پر ولسوالۍ هم د وسلوالو ډله یيز بريدونه پيل شوی، چي پېنځه ملکي کسان په کي ټپيان او يو ماشوم وژل شوى دى.

دوى زياتوي اوس هم هلته ډېري امنيتي سرتېري محاصره دي. که پوځي مرسته ور نکړ شي وبه وژل شي او ولسوالي به هم وسلوال ونیسي.

د دې ولايت د ولايتي شورا پخواني مشر امان الله هوتکي ويلي، مرکزي حکومت تر اوسه د روزګان د جګړې د مهارولو په موخه هڅه نده کړې.

هغه زیاته کړې؛ که د ګيزاب او دهراود ولسواليو د سقوط مخه ونه نيول شي روزګان ولايت به سقوط وکړي، ځکه په زرګونه وسلوال طالبان له بېلابېلو ولايتونو راټول شوي او پر روزګان يې بريدونه پيل کړي دي.

د دغې جګړې قربانيانو ويلي؛ دولت تر اوسه ندى توانيدلى، چي ملکي خلک د جګړې له لومړۍ کرښې وباسي او ډيرو خلکو ته په کي مرګ و ژوبله اوښتې ده.

دا په داسي حال کې ده، چي د سولي د خبرو له پيل سره سم وسلوالو طالبانو او حکومتي ځواکونو د هېواد په بېلابېلو ولايتونو کي سختي جګړې پيل کړي، چي په کې هره ورځ لسګونه ملکي کسان او امنيتي سرتېرو ته مرګ و ژوبله اوړي او خلک د سولي پر خبرو هم بې باوره شوي دي.

Continue Reading

تازه خبرونه

له کوید – ۱۹ ویروس سره د مبارزې لپاره نړیواله ملګرتیا په کار ده- اشرف غني

Ariana News

خپور شوی

په

توسط

(Last Updated On: تله ۴, ۱۳۹۹)

د ملګرو ملتونو د ۷۵ غونډې په څنډه کې ولسمشر اشرف غني له کورونا ویروس او فقر سره د مبارزې لارې چارې تر سرلیک لاندې په اکسفورد پوهنتون کې انلاین څرګنده کړې؛ کوید-۱۹ ویروس افغانستان، سیمه او نړۍ له اقتصادي پلوه سخته ځپلې ده.

ولسمشرغني ويلي، چې له دغه رنځ سره مبارزې ته نړیواله ملګرتیا په کار ده.

افغان ولسمشر اشرف غني دغې غونډې ته په خبرو کې ویلي، چې کورونا ویروس د افغانستان اقتصاد ځپلی؛ خو له دغه ویروس سره د افغان حکومت مبارزه د پام وړ ده.

هغه د کورونا ویروس د څپې پر مهال له فقر سره د مبارزې لپاره د ملي دسترخوان پروګرام تر ټولو اغېزناک وباله.

اشرف غني ویلي، د ملي دسترخوان پروګرام له ۴،۵ میلیون کورنیو سره د خوراکي توکو مرسته ده، چې د افغانستان د نفوسو ۹۰ سلنه جوړوي او یوه دوامداره برنامه ده.

ولسمشر اشرف غني وایي: د کورونا ویروس مونږ اړ کړي یو، چې خطرناکو شرایطو ته ځان چمتو کړو؛ جدي او بېړني ګامونه پورته کړو.

ولسمشر غني ویلي، چې ډېر ژر به په افغانستان کې د ګرخند پر مټ ( زما پيسې) پروګرام له لارې  بېوزلو کسانو ته نغدې پیسې واستول شي.

ولسمشر اشرف غني د خپلو خبرو په پای کې له بې وزلۍ سره د مبارزې په خاطر د هېوادونو تر منځ پر ګډو هڅو ټینګار وکړ او وې ویل، مونږ د کرونا ویروس منفي پایلو د کمولو په موخه د سیمې له هېوادونو سره کار کړی، چې صادرات او واردات په عادي ډول دوام ومومي.

د ملګرو ملتونو د دغې ناستې په څنډه کې د نړۍ ځینو نورو مشرانو هم په مجازي ډول له کورونا ویروس او فقر سره د مبارزې پر لارو چارو خبرې کړې دي.

غونډې ته د پاکستان لومړي وزیر عمران خان ویلي، چې ټوله نړۍ باید له کرونا ویروس او فقر سره مبارزې ته لاس یو کړي.

هغه زیاته کړې، چې په نړۍ کې یو میلیارد کسان له لوږې سره مخ دي، چې د بشري حقونو د خوندیتوب پر هڅو یې سیوری غوړولی دی.

نو موړی وایي: زه ډاډه یم، چې په دې غونډه کې به له کرونا او فقر سره د مبارزې لپاره همکاري ښکاره شي. په کاره ده، چې په دغه وخت کې له مخ پر ودې هېوادونو سره مرستې وشي او له دغو ستونزو راووځي.

دا په داسې حال کې ده، چې د افغانستان ولسمشر اشرف غني د ملي دسترخوان پر پیل شوي پروګرام ټینګار کړی، چې له مخې به یې نوي په سلو کې بېوزله کسان په دغه پروګرام کې شامل او مرسته به تر لاسه کړي.

Continue Reading
Advertisement

Trending