Connect with us

بی بی سی پښتو

افغان میندې او د طالبانو واکمنۍ کې زېږون: د موبایل څراغ ته د ماشومانو ولادت

خپور شوی

 په

(Last Updated On: تله ۲, ۱۴۰۰)
Afghan mother and baby with doctor. Photo collage illustration from photographs courtesy Getty Images

BBC
افغانستان کې د طالبانو له راتګ سره د عامې روغتیا برخه کې ستوزنې په ډېرېدو دي

رابعه د افغانستان د ننګرهار په یوه روغتون کې له زېږون څو ورځې وروسته خپل نوی ماشوم کراروي. هغه وايي: “دا مې درېیم ماشوم دی خو تجربه یې به بیخي بدله وه، ډېره سخته تجربه مې تېره کړه”.

یوازې په څو اوونیو کې د ماشومانو د زېږون هغه څانګه کې چې د رابعې ماشوم پکې پيدا شوی و، لومړنی خدمتونو په ټپه درېدلي. هغې ته د ولادت پرمهال د درد ګولۍ، خواړه او هیڅ ډول درمل نه وو ورکړل شوي.

په هغه روغتون کې چې د ګرمۍ درجه پکې تر ۴۳ رسېده، برېښنا یې پرې شوې وه او د جنراتور روښانولو ته د تېلو پيسې نه وي.

د زیږون پرمهال د رابعې قابله عابده نه ستړې کېدونکي هلې ځلې کوي او وايي: “پر موږ داسې خولې راماتې وې لکه تشناب کې چې اوبه پر ځان را خوشې کړئ”.

عابده وايي د برېښنا د نشتوالي له امله د ماشومانو د زېږون پرمهال د موبایل څراغ کاروي. نوموړې زیاتوي: “دا زما لپاره د خپلې دندې پرمهال تر ټولو بده تجربه وه. له ډېره درده او نهیلۍ ډکه ده. خو له هغې راهیسې چې طالبان واکمن شوي، شپه او ورځ زموږ همدا حال وي”.

رابعه بختوره ده چې خپله او ماشوم یې ژوندی پاتې شول. افغانستان د نړۍ په هغه هېوادونو کې دی چې د مور او ماشوم مړینه پکې تر نورو ځایونو ډېره ده.

د روغتیا نړیوال سازمان یا ډبلیو اېچ او د مالومات له مخې افغانستان کې لا هم په هر سلو زرو زېږونونو کې ۶۳۸ میندې مري.

دا کچه پخوا نوره هم لوړه وه. خو د مور او ماشوم د روغتیا په برخه کې هغه پرمختګونه چې له ۲۰۰۱ کال راهیسې شوي، په چټکۍ مخ په ځوړ روان دي.

د ملګرو ملتونو د وګړو صندوق اجرایه مشره نتالیا کنېم وايي،‌ اوس حالت خورا بېړنی او نهیلي کوونکی دی او دا یې په ريښتیني ډول حس کوي.

دا صندوق اټکل کوي چې که د ښځو او نجونو لپاره بیړنۍ مرسته ونه شي، ښايي ۵۱۰۰۰ نورې میندې او ماشومان ومري او ممکن ۴ عشاریه ۸ میلیونه میندوارې میندي ونه کتل شي.‌

همدا راز ښايي تر ۲۰۲۵ پورې د هغو کسانو شمېره دوه برابره لوړ شي چې د کورنۍ یا ماشوم پلانولو لپاره روغتیايي کلینیکونو ته لاسرسی نه لري.

Afghan women in burkas, with baby. Photo collage illustration from photographs courtesy Getty Images

BBC
نړیواله ټولنه وایي، که بېړنۍ مرستې ونشي د افغان میندو او ماشومانو ژوند به لا جدي خطر سره مخ شي.

د افغانستان د عامې روغتیا پخوانی وزیر ډاکټر وحید مجروح (چې د ندې پرمهال یې دا خبرې کولې) وايي: “په ټول افغانستان کې د لومړنیو روغتیايي اسانتیاوو مرکزونه په ړنګېدو دي. له بده مرغه له دې سره به د مور او ماشوم مړینه هم لوړه شي”.

ښاغلي مجروج د جهموریت د کابینې یوازینی وزیر و چې د طالبانو په سرپرسته کابینه کې هم تر یو څه مودې پر خپله دنده پاتې و.

کله چې بهرني ځواکونه له افغانستانه په وتو شول، طالبانو د ولسوالیو او ولایتونو پر نیولو پیل وکړ او کله چې طالبان پر کابل واکمن شول، بهرنۍ مرستې ودرېدې او یا له لویه سره کنګل شوې.

د افغانستان روغتیايي سیستم تر ډېره پر همدې بهرنیو مرستو پایېده. د امریکا او د روغتیا نړیوال سازمان په کډون بهرني بسپنه ورکوونکي په کابل هوايي ډګر کې کړکېچن حالت ته پام د افغانستان روغتیايي سیستم ته طبي مرستي نه شي رسولای.

له همدې امله په افغانستان کې د ژوند ژغورنې او د میندوارۍ پرمهال د ښځو د روغتیا لپاره طبي وسایلو ته لاسرسی خورا ډېر اغیزمن شوی دی، او کورونا یې اغېز دوه برابره ډېر کړی دی.

ډاکټر مجروح وايي،‌په افغانستان کې د کورونا د څلورمې ممکنه څپې لپاره هیڅ ډول چمتوالی نشته.

په هغه روغتیايي مرکز کې چې عابده پکې کار کوي، د مالي مرستو بندولو پایله دا شوه چې د امبولانس چلولو لپاره د تیلو پيسې نشته.

عابده وايي: “همدا دوه شپې وړاندې یوه مور چې لنګوالۍ ته نژدې وه، په بیړه یې د امبولانس غوښتنه وکړه، ځکه هغه په ډېر دردر کې وه. زموږ په امبولانس کې تیل نه وو، نه یې د تیلو پيسې وي. هغې ته مو وویل چې ټکسې موټر کې راشي. خو پر وخت هیڅ ورته پیدا نه شول.‌هغوی بلاخره موټر پیدا کړی و، خو ډېره ناوخته وه. تر څو چې کلینک ته رارسېده، په موټر یې کې ماشوم پیدا شوی و. د هغې درد ډېر زیات و، څو ساعته بې هوښه شوې وه. موږ ګومان نه کاوه چې ژوندۍ دې پاتې شي. ماشوم هم په ډېر سخت حالت کې و. موږ هیڅ نه درلودل چې وریې کړو”.

له نیکمرغه د مور ماشومه ژغورل شوې وه. مور هم له همغه روغتون درې ورځې وروسته رخصت شوې وه چې د مالي مرستو نشتوالي خورا ډېر ځپلی دی.

Afghan birth centre. Photo collage illustration from photographs courtesy Getty Images

BBC
افغانستان کې د زېږون پر مهال د مور او ماشوم د مړینې کچه لوړه ده

د ملګرو ملتونو د وګړو صندوق مشره کنېم وايي: “موږ شپه او ورځ کار کوو، هڅه کوو چې یو سیستم رامنځته کړو، خو له پيسو پرته هیڅ نه کېږي. آن په کابل کې د تېرو څو اوونیو ډراماتیکو پېښو پخوا هم په هرو دوو ساعتونو کې یوه افغان ښځه د ماشوم د زېږون پرمهال مړه کېده”.

د ملګرو ملتونو د وګړو صندوق هڅه کوي له هغو څه باندې یو میلیارد میلیونو ډالرو مرستې نه چې نړیوالې ټولنې یې ژمنه کړې کړي، نژدې ۳۰ میلیونه یې د افغان ښځو او نجونو د ژوند ژغورنې طبي برخې ته تر لاسه کړي.

په افغانستان کې روغتیايي حالت ته په پام ښايي اړینو روغتیايي مرستو ته د رسېدو لپاره خوندي لاره ورکړل شي او طالبان هم په دې باور دي چې له بهرنیو مرستو پرته په افغانستان کې روغتیايي سیستم نه شي پایېدلی.

د ملګرو ملتونو د وګړو صندوق اندېښمن دی چې په کوچني عمر کې د ودونوو ډېرېدل ښايي د مور او ماشوم د مړینې کچه لا ډېره کړي.

ډېرېدونکي بې وزلي، اوسمهال ښوونځیو ته د غټو نجونو نه پرېښودل، او وسله والو سره د کوچنیو نجونو د ودولو اندېښنې مهم موضوعات دي. ډاکټره کنېم وايي، که څوک په کم عمر کې مور شوې وي، د ژوند پایېدو چانس یې سملاسي راکمېږي.

پر ښځو د طالبانو نوي بندیزونه د افغانستان روغتیايي سیستم، چې له وړاندې نازک دی، لا نور ځپلی شي. د افغانستان په ډېرو سیمو کې ښځې دباندې وتو پرمهال باید حجاب یا چادري واغوندي. خو یوه بله لویه اندېښنه هم شته.

داسې رپوټونه شته چې روغتونو او کلینیکونو ته ویل شوي چې ښځینه ناروغانې به یوازې ښځینه ډاکترانې ګوري.

یوې قابلې چې نه یې غوښتل نوم یې واخیستل شي، بي بي سي ته وویل یو ډاکټر هغه مهال ډبول شوی و چې ښځینه ناروغه یې یوازې په خونه کې معاینه کړې وه.

هغه قابله وايي په هغه مرکز کې چې دا پکې کار کوي، ډاکټرانو ته ویل شوي،‌ که د ښځینه ناروغانو د معاینې لپاره ښځینه ډاکټرانې نه وي، نارینه ډاکټر یوازې په هغه صورت کې ښځې ناروغانې کتلای شي چې په خونه کې دوه یا درې نور کسان هم حاضر وي.

ښځو ته ویل شوي چې له محرم یا له نارینه پرته دې بهر نه وځي،‌ خو زرمینه چې په ننګرهار کې د پنځو میاشتو میندواره ده، وايي:

“زما مېړه غریب سړی دی، هغه موږ ته د یوې مړۍ ډوډۍ لپاره د سړک تر غاړې سودا خرڅوي. زه ولې هغه ته ووایم چې کار پرېږدي او له ماسره روغتون ته ولاړ شي؟”

د عابدې په وینا له میندوارو مېرمنو سره روغتون ته د نارینه و د تګ اجباري کول په دې مانا دي چې ښايي د زرمینې په څېر ګڼې میندوارې میرمنې کلینیکونو ته د مهمو معاینو لپاره ولاړې نه شي.

همدا ډول ښايي ګڼې روغتیايي کارکوونکې هم له دې وروسته کار ته تګ لپاره زړه ښه نه کړي.

Pregnant Afghan woman. Photo collage illustration from photographs courtesy Getty Images

BBC
کلتوري محدودیتونو هم افغانستان کې روغتیایي اسانتیاو ته د ښځو لاسرسی کم کړی

د روغتیا نړیوال سازمان وايي په افغانستان کې د هرو لسو زرو کسانو لپاره ۴ اعشاریه ۵ ډاګټران شته چې دا له نړیوال معیار نه پنځه برابره ټیټه کچه ده.

دې ته په پام چې د طالبانو له بیا واکمنۍ وروسته ګڼ ډاکټران له افغانستانه وتلي، ښايي دا کچه نوره هم راکمه شوې وي.

په اګست میاشت کې طالبانو له ښځینه روغیتايي کارکوونکو وغوښتل چې خپلو کارونو ته ستنې شي. خو ډاکټر مجروح وايي،‌ د باور جوړېدل وخت غواړي او ډاکټرانې باید ډاډه شي چې کومه ستونزه ورته نشته.

بني زاده په کابل کې د ښځو د ناروغیو ډاکټره ده. هغې پر کابل د طالبانو له واک وروسته خپله دنده پرېښې ده او په کابل هوايي ډګر کې یې له هېواد د وتو لپاره ۲۴ ساعته انتظار هم کړی دی.

نوموړې وايي،‌ هر څه په یوه شپه کې بدل شول.‌ د اغلې نبي زاده پخوانۍ همکارانې هم یا له افغانستانه وتلي او یا یې د خوندیتابه لپاره دندې پرېښې دي.

هغه زیاتوي: “زما ګاونډۍ د ۳۵ اوونیو میندواره ده، غواړي له ډاګټرې سره د زېږون عملیاتو لپاره وخت واخلي، خو د ډاکټرې تیلیفون بند دی. ګاونډۍ مې ډېره ورخطا ده او وايي په خیټه کې یې د ماشوم حرکتونه نه حس کوي”.

د روغتیا عامه خدمتونو کارکوونکو ته له تېرو درېیو میاشتو معاشونه نه دي ورکړل شوي. عابده یوه له همغو کسانو ده، خو وايي له معاش پرته بیا هم غواړي تر دوو نورو میاشتو کار وکړي. نوموړې وایي:

“موږ پرېکړه کړې چې دا کار به د خپلو ناروغانو او خپلو خلکو لپاره کوو. خو د پيسو نشتوالی نه یوازې زموږ اندېښنه ده بلکې ناروغان مو هم ډېر اندېښمن دي. هغوی ډېر بې وزله دي، د درملو پېرلو وس نه لري”.

دبشري حقونو د څار ادراې په برخه کې د ښځو د برخې مشره هېدر بار وايي: “افغانان د جګړې د مرګژوبلې په اړه ډېر څه اوري. خو ډېر لږ پر دې غږېږي چې د ماشومانو د زېږون پر مهال څومره میندي او ماشومان مري، داسې حال کې چې مخنیوی یې کېدای شي”.

اغلې چې بار چې په می میاشت کې کابل ته تللې وايي، یوه روغتون د خپلو کارکوونکو د معاشونو پوره کولو لپاره هر څه کم کړي و. د زېږون پرمهال ګڼې میندې مجبورې وې چې وسایل په خپلو پيسو واخلي.

هغه زیاتوي: “یوې ښځې د خپل ولادت لپاره څه نا څه ۵۵۰۰ افغانۍ (۲۶ ډالره) پردې لګولي وو چې د زېږون لپاره اړین طبي وسایل واخلي. هغې خپلې وروستۍ پیسې پر هغو وسایلو مصرف کړې وې چې که عملیاتو ته یې اړتیا پېښېږي، باید له وړاندې یې وپېري”.

افغان ماشومان

BBC
داسې وېره شته چې ښایي افغانستان کې په کم عمر کې د نجونو ودول لا ډېر شي

اوس چې درمل او طبي وسایل کم شوي دي، یوازې له شخصي درملتونونو یې په خپلو پيسو اخیستلای شي، خو ډېری افغانان یې وس نه لري.

زرمینه وايي: “داسې میندوارې ښځې مې ولېدې چې ټوله ورځ یې زموږ په سیمه ییزو روغتیايي مرکزونو کې درملو ته په تمه تېروله، خو تش لاس بیرته کورونو ته ستنېدل. دا غوره ګڼم چې زېږون مې کور کې وشي، نه په روغتون کې. ځکه هلته نه درمل شته او نه هم وسایل. د ماشوم روغتیا او خپل صحت ته مې اندېښمنه یم”.

د نړیوال بانک د مالوماتو له مخې، په افغانستان کې نژدې ۵۵ سلنه وګړي د فقر تر کرښې لاندې ژوند کوي. ډېر یې په لېرې پرتو سېمو کې اوسېږي.

ډاکټر لودي چې د هرات په لېرې پرتو سیمو کې د بې وزلو خلکو او ګوښو خلکو درملنه کوي وايي: “موږ د داسې خلکو درملنه کوو چې خورا ډېر بې وزله او ډېر لږ مالي امکانات لري. موږ له ډېر سخت روغتیايي ناورین سره مخامخ یوو”.

له هغې راهیسې چې طالبان واک ته رسيدلي، د ښاغلي لودي کاري ډله وايي د خوارځواکۍ، نمونیا، رواني ناروغیو او د زیږون پرمهال ستونزې په ډرماتیک ډول ډېرې شوې دي.

د هرات د یوې لېرې پرتې سیمې ۲۸ کلنه اوسېدونکې لېنا وايي: “د طالبانو له راتګ مخکې یوه روغتیايي کلینک راته وویل چې خوارځواکه یم او نېمونیا ناروغي لرم. او زه میندواره هم وم”.

نوموړې وايي: “مېړه مې روغتون ته په خره یوړم. هلته قابلې زما د ولادت ستونزه را حل کړه خو د ماشوم وزن مې کم دی”.

لینا اوس په کور کې ده او حالت یې نازک دی، نه پوهېږي چې له ګټې وټې پرته یې ماشوم څرنګه لوی کړي.

ډېر افغانان وېره لري چې د دې هېواد د روغتیایی سیستم کړکېچ ورځ تر بلې ژورېږي او بد لور ته روان دی. د دې حالت تر ټولو ډېر زیان د میندوارو مېرمنو، نویو زېږېدلو او د ټیټ عمر ماشومانو په څېر چې تر ټولو ډېر زیامنېدونکي دي، رسېږي.

عابده چې د خپلې قابلې دندې ته په ډېر نهلۍ ځي، وايي،‌ د هرې ورځې په تېرېدو حالت لا بدترېږي او هیڅوک نه پوهېږي چې څه به کېږي.

Continue Reading
Advertisement

بی بی سی پښتو

د جاپان شهزادګۍشاهي مقام پرېښود او واده یې وکړ

خپور شوی

په

(Last Updated On: لړم ۴, ۱۴۰۰)
د سې شنبې پر ورځ دې جوړې خبري غونډه وکړه.

Getty Images
د سې شنبې پر ورځ دې جوړې خبري غونډه وکړه.

د جاپان شهزادګۍ ماکو له خپل شاهي حیثیته تېره شوه او د محصلۍ دورې له ملګري کيې کومورو سره یې واده وکړ.

د جاپاني قانون له مخې د شاهي کورنۍ ښځینه غړې له یوه عام سړي سره له واده وروسته خپل شاهي حیثیت له لاسه ورکوي، خو د نارینه غړو شاهي حیثیت بیا پر ځای پاتې کېږي.

اغلې ماکو دغه راز د واده له شاهي مراسمو تر سره کولو هم ډډه کړې او هغه پیسې یې هم نه دي اخیستې چې واده وروسته د شاهي کورنۍ نجونو ته ورکول کېږي.

نوموړې د شاهي کورنۍ لومړنۍ ښځینه غړې ده چې له واده وروسته له دا ډول مراسمو او د پیسو له اخیستلو انکار کوي.

تمه کېږي چې دا جوړه به له واده وروسته د اوسېدو لپاره امریکا ته لاړ شي، چې ښاغلی کومورو پکې د مدافع وکیل په توګه دنده لري.

People take part in a march to protest against the marriage between Japan's Princess Mako and Kei Komuro in Tokyo on October 26, 2021.

Getty Images
د دې واده پر ضد احتجاج هم شوی

یو شمېر جاپانیانو په خواله رسنیو او ځايي ورځپاڼو کې د نوموړي په هکله نیوکې هم کړې او د بېلګې په توګه د هغه د سر وېښتو پر کوڅۍ جوړولو اعتراضونه وشول، چې ګواکې له یوې شهزادګۍ سره د واده کوونکي لپاره مناسب نه دي.

د سې شنبې پر ورځ د دې جوړې د واده پر ضد احتجاج هم شوی دی.

بل لور ته پر همدې سه شنبه اغلې ماکو په یوه خبري غونډه کې وویل، که د دې د واده له کبله کومه ستونزه رامنځته شوې وي، بخښنه غواړي. هغې زیاته کړه:

که کوم ناسم پوهاوی رامنځته شوی وي، بخښنه غواړم… او له هغو ټولو مننه کوم چې پرلپسې یې زموږ ملاتړ وکړ.

د این ایچ کي په رپوټ کې بیا د نوموړې له قوله ویل شوي:

زما لپاره کي بې بدیله دی، واده زموږ لپاره اړین و.

Japan's Princess Mako (R) hugs her sister Princess Kako (2nd R) before leaving her home at Akasaka Estate in Tokyo on October 26, 2021

Getty Images
شاهزادۍ ماکو د واده پر ورځ توکیو کې له کوره وتلو مخکې له خپلې خور شاهزادۍ کاکو سره مخه ښه کوي.

ښاغلي کومورو بیا په دې هکله وویل، له اغلې ماکو سره مینه کوي او غواړي ژوند له هغې سره ګډ تېر کړي.

نوموړي وویل:

زه له ماکو سره مینه کوم. موږ یوازې یو ځل ژوند لرو، او زه غواړم موږ یې له هغه چا سره تېر کړو، چې مینه ورسره لرو.

د اې ایف پي رپوټ کې د نوموړي له قوله ویل شوي، چې د ناوړه تورونو له کبله د اغلې ماکو ذهني او فزیکي وضعیت ته خواشینی و.

Continue Reading

بی بی سی پښتو

د داعش ډلې جرمن غړې د یزیدي نجلۍ مړینې په تړاو په بند محکومه شوه

خپور شوی

په

(Last Updated On: لړم ۳, ۱۴۰۰)
جنیفر وینیسچ په محکمه کې خپل مخ په دوتنه کې پټ کړی

Getty Images
جنیفر وینیسچ په محکمه کې خپل مخ په دوتنه کې پټ کړی

د جرمني میونیخ کې هغې مسلمانې شوې ښځې ته د لس کلن زندان سزا ورکړل شوې، چې عراق کې له اسلامي دولت نومې ډلې سره له یو ځای کېدو وروسته یې یوه ایزيدي نجلۍ وژلې وه.

ویل کېږي، جنیفر وینیسچ له خپل مېړه سره په شریکه وژل شوې نجلۍ د وینځې په توګه پېرلې وه.

پر دې ښځه تور و، چې تر سره لمر لاندې د تندې له کبله د پنځه کلنې نجلۍ مړینې پر مهال د مېړه تر څنګ ولاړه وه او جنګي جرم یې کړی دی.

د وینیسچ مېړه چې یو عراقی جهادي وسله وال و، د جرمني په فرانکفرت کې محاکمه کېږي.

دا پېښه ۲۰۱۵ کال کې د عراق فلوجه کې رامنځته شوې وه.

وینیسچ پر ځان لګېدلي تورونه رد کړي دي. د دې مدافع وکیل وايي، د مړې شوې نجلۍ مور نورا د باور وړ عیني شاهده نه ده او داسې هېڅ ثبوت نه شته چې دا نجلۍ مړه شوې ده.

د یادونې ده چې داعش وسله والو نورا او لور یې له یو شمېر نورو ایزیدي ښځو سره یو ځای د وینځو په توګه پېرلې وې.

په روانه محاکمه کې داسې تمه کېږي چې د وینیسچ د مېړه طحا الجمیلي په هکله به راتلونکې میاشت پرېکړه وشي.

دا د ایزدیانو پر ضد د داعش ډلې جرمونو لومړنۍ محاکمه بلل کېږي.

کرد توکمه ایزیدیان د عراق شمال کې لومړنۍ ټولنه ده، چې داعش وسله والو په ځانګړې توګه په نښه کړه. وینیسچ په ۲۰۱۶ کال کې ترکیه کې له نیول کېدو وروسته جرمني ته د محاکمې لپاره سپارل شوې وه.

داعش وسله والو ۲۰۱۴ کال کې د عراق شمال کې د ایزیدیانو مرکزي مېشت سیمه ونیوله او زرګونه ښځې او ماشومانې یې د وینځو په توګه له ځان سره بوتلې.

Continue Reading

بی بی سی پښتو

یو شمېر افغان ښځو له ملګرو ملتونو غوښتي، د افغانستان استازولي دې طالبانو ته نه ورکوي

خپور شوی

په

(Last Updated On: تله ۳۰, ۱۴۰۰)
ملګري ملتونه

Getty Images

یو شمېر افغان ښځو له ملګرو ملتونو غوښتي په دغه سازمان کې دې د طالبانو استازولۍ ترلاسه کولو مخه ونیسي.

د رویټرز رپوټ کې ویل شوي، نیویارک کې د ملګرو ملتونو مرکزي دفتر ته د پنجشنبې پر ورځ یوه لیدنه کې دې ښځو په یاد سازمان کې د خپل هېواد لپاره د غوره استازولۍ غوښتنه وکړه.

افغان سیاستوالې فوزیه کوفي د ملګرو ملتونو عمومي مرکز مخې ته له خبریالانو سره په دې هکله خبرو کې وویل:

دا ډېره اسانه (چاره) ده. ملګري ملتونه باید دا څوکۍ هغه چا ته ورکړي، چې د افغانستان د ټولو خلکو حقونو ته درناوي کوي.

له فوزیه کوفي سره دې د ملګرو ملتونو سازمان په دې لیدنه کې سیاستواله ناهید فرید، پخوانۍ دیپلوماته اصیله وردګ او خبریاله انیسه شهید هم ملګرې وې.

اغلې فرید خبریالانو ته وویل، طالبانو د افغانستان کنټرول تر لاسه کولو پر مهال ژمنه کړې وه، چې ښځو ته به د کار او زدکړو اجازه ورکوي، خو په وینا یې دوی پر خپله ژمنه نه دي درېدلي.

په افغانستان کې د نجونو پر تعلیم بنديز نړيوال غبرګونونه راپارولي او د طالبانو د رسيمت پېژندو پر وړاندې هم خنډ ګرځېدلي دي.

د یادونې ده چې طالبانو مخکې ويلي وو چې “د اسلامي اصولو له مخې له شپږم ټولګې پورته د نجونو د زدکړو لپاره په لارښود کار کوي”.

ملګرو ملتونو له دې مخکې ویلي دغه سازمان کې د افغانستان د استازیتوب په اړه یوه کومېټه پرېکړه کوي چې نهه هېوادونه یې غړي دي.

ښايي دا کومېټه روانه میاشت غونډه وکړي.

بل لور طالبانو ویلي، په ملګرو ملتونو کې د افغانستان څوکۍ دې د دوی رژیم ته ورکړل شي او په دې سره به په اسانۍ وکړی شي چې د بشري مرستو لپاره له ملګرو ملتونو سره همغږي وکړي.

په قطر کې د طالبانو د سیاسي دفتر ویاند سهیل شاهین چې د طالبانو له خوا ملګرو ملتونو کې د اوسني نظام د استازي په توګه معرفي شوی یوه بیان کې ویلي و چې طالبان په ټول افغانستان واک لري او د ده په وینا د نړیوالو قوانینو له مخې هم “دا زموږ حق دی چې په ملګرو ملتونو کې نمایندګي ولرو”.

Continue Reading

Trending

آریانا نیوز: ټول حقونه خوندي دي