زلمی خلیلزاد له طالبانو سره له خبرو وروسته بېرته کابل ته راغلی

(Last Updated On: October 13, 2018)

د افغانستان د سولې په اړه د امریکا ځانګړی استازی زلمی خلیلزاد د پاکستان، سعودي عربستان او قطر له سفرونو وروسته بېرته کابل ته رارسیدلی او په ګلخانې ماڼۍ کې یې له ولسمشر غني، اجرائیه رییس عبدالله او دوه یم مرستیال دانش سره ولیدل.

ولسمشرۍ په یوه خبرپاڼه کې په ډاګه کړې، چې د شنبې پر ورځ( د تلې ۲۱) د ارګ په ګلخانې ماڼۍ کې ولسمشر اشرف غني، اجرائیه رییس عبدالله عبدالله او د ولسمشر دوه یم مرستیال سرور دانش د افغانستان د سولې په چارو کې د امریکا له استازي زلمي خلیلزاد سره د سولې په اړه هر اړخیزې خبرې کړې دي.  

په خبرپاڼه کې دا هم راغلې، چې زلمي خلیلزاد د ملي وحدت حکومت مشرانو ته د خپلو سفرونو په اړه بشپړ معلومات وړاندې کړل او ټینګار یې څرګند کړ، چې امریکا د افغانانو په مشرۍ د سولې په اړه هر راز همکارۍ ته چمتوالی لري.

په دې لیدنه کې ولسمشر اشرف غني ویلي؛ له هرې هغې هڅې ملاتړ او درناوی کوي، چې په افغانستان کې د تلپاتې سولې په اړه ترسره کیږي.

دا په داسې حال کې ده، چې تېره ورځ وال ستریت ژورنال د یوې سرچینې د څرګندونو له مخې په ډاګه کړې وه، چې زلمي خلیلزاد د قطر په دوحه کې د طالبانو له استازیو سره د سولې پر بهیر خبرې اترې کړې دي.

د امریکا بهرنیو چارو وزارت په رسمي بڼه د خلیلزاد د دې خبرو تائید ندی کړی؛ خو طالبانو د یوې خبرپاڼې په خپرولو څرګنده کړې، چې طالب استازیو د قطر په دوحه کې له زلمي خلیلزاد سره لیدلي دي.

د دغې خبرپاڼې له مخې؛ د طالب استازیو په ترکیب کې د سیاسي دفتر رییس الحاج شېرمحمد عباس ستانکزي، د سیاسي دفتر مرستیال  مولوي عبدالسلام حنفي، د سیاسي دفتر غړي شیخ  شهاب الدین دلاور ، قاري دین محمد حنیف، الحاج محمد زاهد احمدزي او ښاغلي محمد سهیل شاهین برخه اخیستې وه، چې د افغانستان لپاره یې د امریکا د ځانګړي ستازي داکتر زلمي خلیلزاد په مشرۍ له یوه پلاوي سره د روان میلادي کال د اکتوبر پر ۱۲نېټه، چې د تلې له ۲۰ سره برابره ده په دوحه کې وکتل؛ د بهرنیو ځواکونو او د افغانستان د مسئلې پر سوله ییزحل یې خبرې کړې دي.

خبرپاڼې دا هم په ډاګه کړې، چې دواړو خواوو د سولې په اړه نه یوازې څرګندونې وکړې، بلکې د خبرو پر غزولو هم هوکړه شوې ده.

د یادونې ده، چې کابل ته په لومړي سفر کې زلمي خلیلزاد له حکومت او طالبانو غوښتي وه، چې د سولې خبرو د پیل لپاره خپل واک لرونکي استازي ور وپېژني؛ خو تر اوسه په دې تړاو حکومت پرېکړه نده کړې.

About Ariana News

Avatar

Check Also

په لومړي ځل په هېواد کې یوه سوداګریزه سړخونه جوړه شوه

(Last Updated On: November 14, 2019)په لومړي ځل په هېواد کې یوه ستره سوداګریزه سړخونه …