دیني عالمان دې په افغانستان کې جګړه ناروا اعلان کړي- مشرانو جرګه

(Last Updated On: July 10, 2018 2:58 pm)

مشرانو جرګه په سعودي عربستان کې د اسلامي هېوادونو د دیني عالمانو پر غونډه غږ کوي، چې په افغانستان کې د جګړې پر خلاف فتوا صادره او دغه جګړه ناروا اعلان کړي.

په سعودي عربستان کې د اسلامي هېوادونو لسګونه دیني عالمان د افغانستان د جګړې په اړه د حل پر لارو او سولې ته د وسلوالو طالبانو پر را ماتولو خبرې کوي.

د مشرانو جرګې غړي د سعودي له غونډو تمه لري، چې په افغانستان کې به د جګړې پر اور سړې اوبه تویي کړي.

د مشرانو جرګې غړی عبدالباقي بریال وایي، چې د سعودي عربستان په جده کې د دیني عالمانو ناسته یوه لاسته راوړنه ده؛ د دوی ژمنې به له شک پرته اړینې وي. دغه ناسته مو د هېواد او خلکو په ګټه ده؛ د نړۍ او ګاونډ هېوادونو ونډه او همکاري له افغانستان سره یوه اړتیا ده.     

د مشرانو جرګې غړي ټينګار کوي، چې نړیواله ټولنه باید د افغانستان د جګړې د اصلي عواملو په له منځه وړلو تمرکز وکړي.

د مشرانو جرګې یو بل غړي ګل احمد اعظمي په ډاګه کړې؛ د سعودي په ناستو کې باید د افغانستان پر اړوند ټولو موضوعاتو خبرې وشي، چې څنګه کیدی شي دغه هېواد له امنیته برخمن او په دې اړه رښتینې ژمنې نه یوازې افغانانو وړاندې، بلکې د پلي کیدو لپاره یې هم عملي ګامونه پورته شي.

د مشرانو جرګې غړی زلمی زابلی د امریکایانو رښتینو هڅو ته هیله من ندی او وایي، چې حکومت باید له امریکایانو سره بشپړې او څرګندې خبرې وکړي؛ ځکه طالبان د پاکستان تر فرمان لاندې او پاکستان د امریکا تر هغې لاندې دی. اندېښنه هم همدا ده، چې امریکا له افغانستان سره رښتینې نده.

د مشرانو جرګې لومړی مرستیال د سعودي د غونډې له ګډونوالو غواړي؛ داسې شرعي فتوا دې ورکړي، چې له مخې یې د افغانستان جګړه نامشروع وبلل شي.

د مشرانو جرګې لومړی مرستیال محمد علم ایزدیار وایي، چې د جدې ناسته نه یوازې افغانستان ته یو طلایي فرصت دی، بلکې طالبان دې هم ترې ګټه پورته کړي. مونږ هیله من یو، چې د افغانستان په اړه ټول موضوعات تر پاملرنې لاندې ونیول شي او داسې شرعي فتوا دې ورکړي، چې د افغانستان جګړه نامشروع ده.

د مشرانو جرګې غړي پر نړیواله ټولنه او امریکا هم نیوکه کوي، چې د افغانستان د سولې او امنیت په اړه بې پروا دي؛ نو، ځکه افغانانو ته د نړیوالې ټولنې او امریکا کړنې د پوښتنې وړ ګرزیدلې دي.

د یادونې وړ ده، چې نن د افغانستان په اړه د سعودي په جده کې غونډه ترسره کیدونکې ده او سبا به دغه د اسلامي نړۍ عالمان په مکه مکرمه کې هم پر اړوند موضوع خبرې کوي.

خبریال: رفیع صدیقي

About Ariana News

Check Also

پولیسو په ننګرهار ولایت کې د لوی ملي ائتلاف خیمې ټولې کړې

(Last Updated On: September 18, 2018 6:07 pm) د ننګرهار والي ویاند څرګنده کړې، چې …