عاجل خبرونه

تاکل شوې، چې د ابوظبي ناسته به چارشنبه هم روانه وي

(Last Updated On: December 18, 2018)

په متحده عربي اماراتو کې د طالبانو او امریکایانو د استازیو تر منځ خبرې له تېرې ورځې څخه راپدیخوا روانې ساتل شوي او تاکل شوې، چې د ابوظبي ناسته به تر چارشنبې روانه وي.

په ابوظبي کې د امریکایانو، طالبانو، عربي متحده اماراتو او پاکستان د استازیو خبرې د دوه یمې ورځې لپاره هم د افغان اووه لس کلنې جګړې د پای پر لارو چارو روانې وې.

د دغو خبرو پر دوه یمه ورځ طالبانو څرګنده کړې، چې په دې ناسته کې له افغانستان څخه د بهرنیو ځواکونو د وتلو پر څرنګوالي، ملکي تلفاتو، بیا رغاونې، شپږ میاشتني اوربند، لنډ مهاله ادارې، په واک کې د طالبانو پر شریکولو، د طالب بندیانو پرخلاصون، د طالبانو پر مشرانو د بندیزونو پر لیرې کولو او نورو مواردو بحث او خبرې شوې دي.

د طالبانو یوه چارواکي رویترز ته ویلي، طالبانو د خلیلزاد د ۶ میاشتني اوربند وړاندیز منلی او دوی هم امریکا ته دوه وړاندیزونه لري؛ د لنډ مهالې ادارې مشر دې د دوی په خوښه وي او سعودي عربستان، متحده عربي امارات او پاکستان باید د دې بهیر بشپړ ضمانت وکړي.

سیاسي فعال حسن حقیار وایي: دغه خبرې ډاډمنې روانې دي؛ په افغانستان کې د امریکایي سرتېرو د برخلیک، د دواړو خواوو د بندیانو، د طالبانو د سیاسي دفتر او دغه راز له افغان حکومت سره د طالبانو د خبرو په اړه د ډاډ وړ پرمختګونه رامنځته شوي دي.    

افغان حکومت وایي، د دوی دولس کسیز پلاوی ابوظبي ته رسیدلی، چې له طالبانو سره احتمالي پیلیدونکیو خبرو اترو ته تیاری ونیسي؛ خو طالب استازیو د حکومت له استازیو سره هر ډول خبرې رد کړې دي.

د اجرائیه رییس ویاند مجیب الرحمان رحیمي وایي: د افغانستان حکومت له طالبانو سره خبرو ته له شرط پرته چمتووالی اعلام کړی او د همدې لپاره په ابوظبۍ کې اوسیږي.             

د پاکستان لومړي وزیر په خپل تویت کې څرګنده کړې، چې هېواد یې د ابوظبي ناستې ته لار اواره کړې او هیله ده، چې په دې ناسته کې د افغانستان د اووه لس کلنې جګړې د پای ته رسولو لار پیدا شي.

په ولسي جرګه کې د غزني استازی عارف رحماني وایي: په افغانستان کې د سولې بهیر کوږ، نسکوره او ناروغه دی؛ ځکه، نو دا بهیر زمونږ په اند بریالی ندی.    

د دې ترڅنګ د افغانستان لپاره د ملګرو ملتونو ځانګړي استازي تداماچی یاماماتو په امنیت شورا کې ویلي، چې د افغانستان د اووه لس کلنې جګړې د پای ته رسولو لپاره هیڅکله داسې فرصت نه و برابر شوی. یعنې د خبرو اترو له لارې د جګړې د حل لپاره په رښتیا زمینه برابره شوې ده.

About Ariana News

Avatar

Check Also

په افغانستان کې د خوړو د مصونیت نشتوالی ننګونکی دی

(Last Updated On: October 17, 2019)د خوړو او کرنې نړیوال سازمان په افغانستان کې د …