Connect with us

تازه خبرونه

خاص روزګان ته د نه پاملرنې له کبله مرګ و ژوبله ډېره شوې- عبدالله عبدالله

خپور شوی

د

(Last Updated On: لړم ۲, ۱۴۰۱)

اجرائیه رييس وايي، چې د روزګان ولایت په خاص روزګان ولسوالۍ کې په بیړه د جګړې د نه مخنیوي له کبله د ملکي وګړیو مرګ و ژوبله ډېره شوې ده.

ولسمشرۍ ماڼۍ په خپل لومړي فرمان کې د روزګان جګړه قومي بللې وه او په یو بل تازه حکم کې یې دغه جګړه یوه پېښه بللې؛ خو اجرائیه رييس اعتراف کړی، چې د جګړې په مخینوي کې پاتې راغلي دي.

اجرائیه رییس عبدالله عبدالله وایي: منم، چې په بیړه موکړنې تر سره شوې ندي او دې کار خلک ډېر زیانمن کړي دي. ورته تسلیت وړاندې کوم؛ حکومت به په خاص روزګان او مالستان کې د جګړې د مخنیوي لپاره خپل ټول وس وکاروي.

د روزګان په خاص روزګان او د غزني په مالستان ولسوالیو کې له جګړې څخه لس ورځې تېريږي.

د دغو ولسوالیو یو شمېر اوسیدونکي کابل ته په اعتراض راغلي او غوښتنه کوي، چې حکومت باید په دغو ولسوالیو کې امنیت خوندي کړي.

د غزني یو اوسیدونکی وایي: لس ورځې کیږي، چې خلک د جګړې په اور کې سوځي؛ خو حکومت په اړوند سیمو کې جګړه قومي نوموي؛ مونږ د اړوند سیمو قومونه په خپلو کې اتفاق لرو، دا تاسې یاست، چې نفاق ته لمن وهئ.

د روزګان اوسیدونکی اقبال علي نومی وایي، چې: زه د روزګان ولایت یو سپین ږیری یم. راغلی یم، چې له حکومته امنیت وغواړم؛ ماشومان مو در په در او بې برخلیکه پاتې شوي دي.  

د روښنايي د جنبش غړی داوود ناجي وایي: حکومت سیمې ته ځواکونه نه لیږي او ورته پاملرنه هم نلري. هغه ځواکونه، چې حکومت لیږلي، تېل نلري او خلک له خپلو کورونو ورته تېل ورکوي.

ملي دفاع وزارت ویاند غفور احمد جاوید وايي، چې د جګړې د کابو کولو او عملیاتو لپاره یې تازه دمې سرتېري استولي دي.

د نوموړي په وینا؛ همدا اوس مو د ځواکونو عملیات روان دي، هوایي او ځمکني ځواکونه ور لیږل شوي دي.

که څه هم د سیمې اوسیدونکي ادعا کوي، چې وسلوالو طالبانو یې پر سیمو بریدونه کړي؛ خو طالبانو ویلي، چې دا یوه ناموسي موضوع وه، چې له سیمه ییز وسلوال حکیم شجاعي سره رامنځته شوې وه.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!