Connect with us

تازه خبرونه

داعش په کابل کې د ۱۱۱ فرقي د یوه کنډک ۲۷ سرتېرو ته مرګ و ژوبله اړولې

خپور شوی

د

(Last Updated On: لړم ۲, ۱۴۰۱)

نن سهار مهال په کابل کې د مارشال محمد قسیم فهیم د پوځي پوهنتون ترڅنګ د ۱۱۱ فرقې پر یوه کنډک د داعش وسلوالو په برید کې د پوځ ۱۱ سرتېري وژل شوي او ۱۶ نور ټپیان دي.

بریدګر د اغزن سیم له څو کټارو اوښتي او له وروستي دیوال څخه د اوښتو لپاره یې له ځان سره لوړه زینه وړې وه.

په لومړیو کې ویل کیدل، چې بریدګر د مارشال فهیم پوهنتون ته ننوتي؛ خو بیا وروسته د ملي دفاع وزارت ویاند وویل، چې برید د ۱۱۱ فرقې پر یوه کنډک شوی دی.

د ملي دفاع وزارت ویاند دولت وزیري څرګنده کړې؛ ۵ بریدګرو سهار مهال پر څلورنیمو بجو برید پیل کړ، چې له اووه ساعته نښتې وروسته څلور بریدګر ووژل شول او یو ژوندی ونیول شو.

نوموړي د ورځې پر لس بجو آریانا نیوز ته په ډاګه کړې، چې دوه بریدګرو لومړی ځانته چاودنه ورکړې، دوه نور له امنیتي ځواکونو سره په نښته کې وژل شوي او یو بل ځانمرګی ژوندی نیول شوی دی.

د پوځ د ځانګړیو ځواکونو د قول اردو سرتېری عثمان وایي؛ دښمن له منځه وړل شوی، وسلې، مهمات او بیرغونه ترې پاتې شوي دي.

د پوځ د ځانګړیو ځواکونو سرتیری احسان سیلاب ویلي، چې دغو بریدګرو هم پیکا لرله او هم یې ځانمرګي لرل؛ خو په نښته کې وژل شوي دي.

هارون نومي شاهد ویلي، چې لومړی د تفنګچي ډز وشو بیا د کلشینکوف ډزې وشوې او ورپسې د درندو وسلو ډزې پیل شوې.

نوموړي زیاته کړې، چې په کابل کې له څو ورځو راهیسې پرلپسې خونړي بریدونه کیږي، چې خلک یې سخت اندېښمن کړي او پر امنیتي بنسټونو د خلکو باور ته یې زیان اړولی دی.

په تېرو نهه ورځو کې دا درېیم برید دی، چې په کابل کې د وسلوالو طالبانو او داعش جګړه مارو لخوا رامنځته کیږي. په دغو بریدونو کې شاو خوا دوه سوه کسان ووژل شول او له درې سوه ډېر ټپیان دي.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!