تازه خبرونه
د کندهار پنجوایي ولسوالۍ خلکو د راحت احساس وکړ
له تېرو څو کلونو راهیسې د کندهار ولایت سرحدي ولسوالۍ پنجوایي ته د پاکستان حکومت ډېرې ستونزې جوړې کړې وې؛ خو اوس د راحت احساس کوي، ځکه خپله دروازه یې له پاکستان سره د تل لپاره تړلې ده.
د دې ولسوالۍ اوسیدونکیو آریانا نیوز ته ویلي، چې پنجوایی د افغانستان په سویل کې د سوله ییز ژوندانه پر بېلګې اوښتې او هیڅ مخالف وسلوال ته به د فعالیت اجازه ورنکړ شي، چې د دغې ولسوالۍ له لارې تګ راتګ وکړي.
پنجوایي لس کاله د طالبانو ستر مرکز و او همدا سیمه د بهرنیو ځواکونو لپاره هم مرګونې وه.
پنجوایي؛ د کندهار هغه ولسوالۍ ده، چې له پاکستان سره ګډه پوله لري؛ خو د افغانستان په سویل کې یوازنۍ پوله ده، چې اوس پرې ترهګر او د نشه یي توکو قاچاق وړونکي تګ راتګ نه شي کولی.
په دې ولسوالۍ کې د سرحدي او سیمه ییزو پولیسو تشکیلات او جوړښتونه زیات شوي دي. که څه هم پنجوایي د هلمند په ګاونډ کې ده؛ خو له پاکستان څخه یې دې ولایت ته پر طالبانو د تګ لار هم بنده کړې ده.
د دې ولسوالۍ په بازار کې ګڼه ګوڼه ډېره ده؛ خلک یې کروندګر دي، د ښوونځیو دروازې یې نجونو او هلکانو ته پرانیستې دي او د سوله ییز ژوندانه یو څرګند چاپېریال ترې جوړ شوی دی.
افغان ځواکونه په پنجوایي کې عصري او پرمختللې وسلې لري او وایي، چې له طالبانو یې تر لاسه کړي دي.
د طالبانو د نفوذ د مخنیوي لپاره خلکو ملاتړلې او ویل کیږي، چې طالبان به نور نه پریږدي، چې له دې لارې رادننه شي او یا نورو ولایتونو ته تګ راتګ وکړي.
دا په داسې حال کې ده، چې د افغانستان د سویل پرانیستو پولو ترهګرو ته حتا تر کابله د راتګ زمینه برابره کړې ده؛ خو په کندهار کې پنجوایي یوازنۍ ولسوالي ده، چې د ترهګرو او د قاچاق وړونکیو تګ راتګ پرې اوس نه کیږي.
خبریال: باعث حیات
تازه خبرونه
د داعش خراسانی مشر د پاکستان په بلوچستان کې دی – رویټرز
رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.
د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.
رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.
رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.
د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.
له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.
د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.
ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.
تازه خبرونه
د رښتر پر کچه ۵ اعشاریه ۲ درجې زلزلې افغانستان ولړزاوه
د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.
دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.
دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.
تر اوسه د دې پېښې د ځاني او مالي زیان په اړه څه ندي ویل شوي.
تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.
تازه خبرونه
د بیات بنیاد د روژې مرسته د بلخ ولایت اړمنو ته ورسېده
بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.
د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.
نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.
هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.
بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.
-
تازه خبرونه3 days ago
په پاکستان کې ځانمرګي د ۵ چینايي انجینرانو په ګډون ۶ کسان ووژل
-
سوداگري4 days ago
افغانستان ته د پاکستان راغلی پلاوی پر اقتصادي همکاریو خبرې کوې
-
تازه خبرونه4 days ago
بیات بنیاد په ننګرهار کې اړمنو کورنیو ته د روژې مرستې ووېشلې
-
تازه خبرونه4 days ago
په هرات کې له ۵۰۰ ډېر لرغوني آثار موزیم او آرشیف ته سپارل شوي
-
تازه خبرونه4 days ago
د پاکستان په تورخم کې سرحدۍ ځواکونو د فډرالي څېړنو ادارې ۶ کارکوونکي وهلي
-
تازه خبرونه2 days ago
په کابل کې سلګونه اړمنې کورنۍ د بیات بنیاد د روژې له مرستو برخمنې شوې
-
سوداگري3 days ago
د افغانستان او پاکستان د سوداګرۍ استازیو پر ننګونو خبرې وکړې
-
سیمه ییز خبرونه3 days ago
په بلوچستان کې د پاکستان د بحري ځواک پر هوايي اډه وسلوال برید وشو