تازه خبرونه
د ټاکنو ۱۳ نوماندان سر له سبا ټاکنیز کمپاینونه پیلوي- شهاب حکیمي
د ولسمشریزو ټاکنو د نوماندانو شورا وایي، د ټاکنو ۱۳ نوماندان سر له سبا ټاکنیز کمپاینونه پیلوي.
د ولسمشریزو ټاکنو د نوماندانو کمپاینونه د زمري پر ۶ پیل شوي خو ټاکنیز ډګر ډېر سوړ دی او یوازې دولت جوړوونکي او د ثبات او همپالنې ټاکنیزې ډلې میدان ته را وتلې دي.
د ولسمشریزو ټاکنو د نوماندانو شورا، چې ۱۳ نوماندان په کې غړیتوب لري؛ پړاویز رییس یې شهاب حکیمي ویلي؛ ځکه ټاکنیز کمپاینونه ندي پیل شوي، چې دولت جوړوونکې ټاکنیزه ډله له دولتي امکاناتو او واک کار اخلي.
دا شورا دولت جوړوونکې ټاکنیزه ډله له دولتي امکاناتو څخه پر ګته پورته کولو او دیني عالمانو ته په بډو ورکولو تورنوي.
د سولې او اعتدال ټاکنیزه ډله د هغه څه له کبله خبرداری ورکوي، چې د محمد اشرف غني لخوا یې له دولتي بودجې څخه استفاده بولي.
د سولې او اعتدال ټاکنیزې ډلې ویاند قادرشاه وایي، د ټاکنیز کمپاین پیل ته چمتووالی لري.
که څه هم دا ټاکنیزه ډله وایي، چې په خپل منځ کې هیڅ ډول اختلافات نلري؛ خو ویل کیږي، چې په دې ډله کې د محمد حنیف اتمر او عطا محمد نور تر منځ د لومړي وزیرد څوکۍ پر سر اختلاف موجود دی.
د ولسمشریزو ټاکنو د نوماندانو شورا ادعا کوي، چې محمد اشرف غني دیني عالمان له ولایتونو کابل ته د مشورو لپاره را غوښتي او هغوی ته یې د پیسو په ورکولو ترې غوښتي، چې د ده په ګټه کمپاین وکړي.
دولت جوړونکې ټاکنیزه ډله په ټاکنیزو کمپاینونو کې له دولتي امکاناتو څخه د استفادې په تړاو شوې ادعاوې ردوي.
ملګرو ملتونو او د امریکا سفارت له ټولو نوماندانو غوښتي، چې په ټاکنیزو کمپاینونو کې له دولتي امکاناتو او واک کار وانخلي.
تازه خبرونه
د داعش خراسانی مشر د پاکستان په بلوچستان کې دی – رویټرز
رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.
د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.
رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.
رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.
د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.
له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.
د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.
ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.
تازه خبرونه
د رښتر پر کچه ۵ اعشاریه ۲ درجې زلزلې افغانستان ولړزاوه
د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.
دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.
دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.
تر اوسه د دې پېښې د ځاني او مالي زیان په اړه څه ندي ویل شوي.
تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.
تازه خبرونه
د بیات بنیاد د روژې مرسته د بلخ ولایت اړمنو ته ورسېده
بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.
د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.
نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.
هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.
بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.
-
تازه خبرونه3 days ago
په پاکستان کې ځانمرګي د ۵ چینايي انجینرانو په ګډون ۶ کسان ووژل
-
سوداگري4 days ago
افغانستان ته د پاکستان راغلی پلاوی پر اقتصادي همکاریو خبرې کوې
-
تازه خبرونه4 days ago
بیات بنیاد په ننګرهار کې اړمنو کورنیو ته د روژې مرستې ووېشلې
-
تازه خبرونه5 days ago
په هرات کې له ۵۰۰ ډېر لرغوني آثار موزیم او آرشیف ته سپارل شوي
-
تازه خبرونه2 days ago
په کابل کې سلګونه اړمنې کورنۍ د بیات بنیاد د روژې له مرستو برخمنې شوې
-
تازه خبرونه4 days ago
د پاکستان په تورخم کې سرحدۍ ځواکونو د فډرالي څېړنو ادارې ۶ کارکوونکي وهلي
-
تازه خبرونه1 day ago
د ټاپي ګاز شرکت اجرائیه رییس له وروستیو پرمختګونو خوښي څرګنده کړه
-
سوداگري3 days ago
د افغانستان او پاکستان د سوداګرۍ استازیو پر ننګونو خبرې وکړې