تازه خبرونه
د کانونو وزارت لګښتونه له عوایدو ډېر لوړ دي
کانونه، دولت ته د عوایدو لویه سرچینه ده؛ خو د هغو اسنادو له مخې، چې آریانا نیوز تر لاسه کړي د کانونو وزارت لګښتونه له عوایدو ډېر لوړ ښیي او عواید یې په وروستیو ۵ کلونو کې په بېسارې توګه کم شوي دي.
د دغه راپور له مخې؛ له لوړو معاشونو سره د سلاکارانو استخدام، د سرپرستانو په توګه د قراردادي کارکوونکیو ګمارنه او د قراردادي شرکتونو نږدې ۵ میلیون افغانۍ پورونه ټول هغه موارد دي، چې د کانونو په وزارت کې له پراخ فساد پرده پورته کوي.
د کانونو او پترولیم وزارت عواید او لګښت د ۱۳۹۱ او ۱۳۹۵ کلونو تر منځ څه باندې څلور میلیارد افغانۍ کسر لري.
له ۱۳۹۱ تر ۱۳۹۵ کلونو د کانونو وزارت ټولیز عواید نهه میلیارد و اووه سوه اتلس میلیون و دو سوه درویشت زره او څلور سوه شپږ څلویښت افغانۍ و.
د افغانستان روڼتیا څار رییس سید اکرام افضلي وایي: په تېرو څو کلونو کې د کانونو وزارت پر مصرفي وزارت اوښتی، چې ستر دلیل یې پراخ فساد او ځواب نه ورکوونکی جوړښت دی.
د دې تر څنګ ځینې شرکنونه د قانوني سرغړونو او د تړونونو په ګټو کې د لاسوهنې تر څنګ دولت نږدې څلور میلیون دالره او نږدې ۵۵ میلیون افغانۍ قرضدار دي. دغه پورونه له څو کلونو راپدیخوا نه دي ورکړشوي.
د کانونو د څارنې شبکې غړی ابراهیم جعفري وایي: اداري دسپلین، چې باید یو وزارت ولري؛ دلته له منځه تلی دی؛ د وزارت واحدونه د یو او بل په وړاندې دریږي.
د راپور د څرګندونو له مخې؛ د بغلان، تخار، ننګرهار، بدخشان، هرات او کابل ولایتونو د کانونو په پروژو کې فساد او د تړون له ګټو سرغړونې هم شوي دي.
د کانونو او پترولیم وزارت ویاند مطفي وایي: په دې وروستیو کې مو د پورونو کمیته جوړه کړې، چې له ځینو شرکتونو پورونه راټول شوي؛ ځکه، نو عواید مو لوړ شوي دي.
کاري نیمګړتیاوې، ناقانونه کړنې او په تړونونو کې مالي فساد په دې وزارت کې د کارونو د خرابي لوی علتونه یادیږي.
د بېلګې په توګه، د کانونو پخواني وزیر ابراهیم عادل د بغلان د سمنتو غوري کارخانې تړون له افغان انوسمنت کمپنۍ سره د نهه څلویښت کلونو لپاره لاسلیک کړی و، چې د کانونو وزارت ۳۰ کاله ټاکلي دي.
د کانونو وزارت دې ټولو اندېښنو او د فساد په وړاندې وروستیو اقداماتو ته په پام سره داسې وایي.
ښاغلي مطفي څرګنده کړې، چې وزارت په دې وروستیو کې دوه کاره کړي؛ لومړی اصلاحاتي پروګرام جوړول او دوه یم دا، چې استخراجي مدیریت څنګه وارزوو.
د کانونو په وزارت کې سرپرستي بله ننګونه ده، چې د سرپرست وزیرې په ګډون د دې وزارت دوه په درېیمه برخه ریاستونه د سرپرستانو لخوا اداره کیږي.
د کانونو وزارت له چارو څارونکي بنسټونه وایي، ولسمشر د دې وزارت ټول واکونه اخیستي او د ټولو کانونو د داوطلبي بهیرونه یې هم ځنډولي دي.
خبریال: شاهپور فرهمند
تازه خبرونه
تېر ۲۰۲۳ کال د افغانستان د خلکو لپاره د سترو ننګونو کال و -راپور
په ۲۰۲۴ کال کې به د افغانستان شاوخوا ۱۵ اعشاریه ۸ میلیون خلک د خوړو د خوندیتوب له بحران او بېړنۍ کچې سره مخ شي.
په افغانستان کې د ملګرو ملتونو ټولنې د ۲۰۲۳ کال د پایلو په کلني راپور کې ویلي، چې په افغانستان کې میلیونونه وګړي له لوږې او خوارځواکۍ سره مخ دي، چې ډېري یې خپلې لومړنۍ اړتیاوې پوره کولی نشي.
ملګرو ملتونو څرګنده کړې، چې بشري ناورین په ۲۰۲۳ کال کې هم دوام درلود او دغه هېواد یوه لسیزه شاه تګ کړی او دا مهال د افغانستان نیمايي وګړي په بې وزلۍ کې ژوند کوي.
د اقتصاد وزارت مسلکي مرستیال عبداللطیف نظري له افغانانو سره د بشري مرستو پر اړتیا ټینګار کوي او زیاتوي، چې دغه وزارت په هېواد کې د فقر او لوږې د ختمولو لپاره مناسب پلانونه لري.
ملګرو ملتونو په راپور کې راغلي، چې له ۲۰۲۱ کال راپدیخوا د اقتصادي تولیداتو کچه یو پر څلورمه راټیټه شوې او د نړیوال بانک د راپور له مخې دا مهال د افغانستان نیمايي نفوس په بېوزلۍ کې ژوند کوي.
دا په داسې حال کې ده، چې ملګرو ملتونو اندېښنه ښودلې او څرګندوي؛ دوی له افغانستان سره د مرستو د دوام لپاره د بودجې له کمښت سره مخ دي.
تازه خبرونه
ملګرو ملتونو تېر کال په افغانستان کې د اوبو ۴۷۰ کیلومټره کانالونه جوړ کړل
د خوړو نړيوال پروګرام ویلي، چې تېر کال يې په افغانستان کې د سيمهييزو ټولنو پر همکارۍ د شاوخوا ٤٧٠ کيلومټرو پر اوږدوالي د اوبو کانالونه جوړ کړي دي.
د دې پروګرام د افغانستان برخې د چارشنبې پر ورځ (د وري نههویشتمه ) په ایکس پاڼه کې لیکلي؛ په افغانستان کې کروندګر اوبو ته له لاسرسي پرته خپل ژوند روان ساتلی نشي.
دغه راز څرګنده شوې؛ د اوبو کانالونو له کروندګرو سره مرسته کړې، چې خپلو کورنیو ته خواړه برابر کړي او خپل اضافي تولیدات او محصولات وپلوري.
د خصوصي سکتورغړي هم وايي؛ د خوړو نړیوال پروګرام لهخوا په هېواد کې د اوبو د مدیریت لپاره د کانالونو له جوړولو هرکلی کوي او څرګندوي، چې د هېواد د اوبو مدیریت کولی شي افغانستان له فقر او اقتصادي بحران څخه وژغوري.
دا په داسې حال کې ده، چې له څو کلونو وچکالۍ وروسته؛ وروستیو اورښتونو د افغانستان کروندګر هیله من کړي، چې راتلونکی کال به ښه حاصلات ولري.
تازه خبرونه
په بیجینګ کې د چین او افغانستان درېیمه اقتصادي ناسته تر سره شوه
په بیجينګ کې د افغانستان اسلامي امارت او د چين ولسي جمهوريت د بهرنيو چارو وزارتونو د اړوند سياسي څانګو پر مشرۍ د بشري مرستو او اقتصادي بيارغونې پر ميکانيزمونو درېيمه ناسته ترسره شوه.
د افغانستان بهرنیو چارو وزارت ویاند عبدالقهار بلخي په ایکس پاڼه کې لیکلي، چې په دې ناسته کې د افغانستان د بهرنيو چارو وزارت پر استازیو سربېره د صنعت او سوداګرۍ، کانونو او پټروليم، د کډوالو او بېرته راستنېدونکیو چارو او د طبيعي پېښو پر وړاندې د امارت وزارت استازو ګډون کړی و.
دغه راز په دې ناسته کې د چين د سوداګرۍ، طبيعي سرچينو، د چين نړيوالې پراختيايي ادارې او نړيوالې همکارۍ ادارو استازو هم برخه اخیستې وه.
د بهرنیو چارو وزارت د څرګندونو له مخې؛ په دې ناسته کې له تېرو دوه نيمو کلونو راپدیخوا د طبيعي پېښو، جبري راستانه شویو کډوالو او روغتيا په برخه کې د مرستو پر میکانیزمونو بیا کتنه وشوه.
افغان پلاوي د چين د مرستو د ګټورتوب لپاره خپل وړانديزونه او سلا مشورې چينايي اړوند لوري ته وړاندې کړل.
چينايي لوري ژمنه کړې، چې له افغانستان سره به د چين بشري مرستې د افغان لوري د اړتياوو او لومړيتوبونو له پام کې نيولو سره تنظيم کړي. دغه راز به له افغانستان سره د جبري راستانه شویو کډوالو د مېشتېدو په برخه کې د چين د سل میلیون يوانو په مرستو کې د افغان لوري وړانديزونه هم په پام کې ونيول شي.
د چين سره صليب ټولنې ژمنه کړې، چې په چين کې به د افغان ماشومانو د زړه ناروغيو د درملنې د بيا پيل زمينه هم برابره کړي.
د عبدالقهار بلخي د څرګندونو له مخې؛ د افغانستان د اقتصادي بيارغونې ميکانيزم په چوکاټ کې د دواړو هېوادونو ترمنځ د سوداګرۍ پر زياتوالي په ځانګړي توګه چين ته د زیاتو افغان توکو د صادرولو د زمينې برابرولو، وړتیا لوړونې او په افغانستان کې د کانونو او معاصرې سوداګرۍ په برخه کې د چين د پانګونې د فرصتونو په اړه هر اړخیزې خبرې وشوې.
دواړو لوريو چين ته د افغانستان د جلغوزو له صادراتو وروسته د انارو د صادراتو زمينې د برابرولو د هرکلی ترڅنګ په افغانستان کې د نفتو د استخراج کچې لوړولو او د لوګر مس عینک کان د استخراج د پيلولو په برخه کې د وروستيو پرمختګونو په اړه خبرې وکړې او ټينګار وشو، چې د چارو د چټکتيا پر طرحو به غور وشي.
افغان لوري د چين پر ملاتړ د افغانستان د حکومت په ګڼو وزارتونو او ادارو کې د ملکي مامورينو د وړتیا لوړونې لپاره له روزنيزو پروګرامونو او افغانانو ته د سکالرشپونو د لړۍ له پراخولو هرکلی وکړ.
ویل کیږي، چې په دې ناسته کې د واخان اقتصادي دهلیز د اهميت او احتمالي ګټو او د دې کوريډور د پرانيستو پر امکاناتو هم بحثونه شوي دي.
-
لوبی4 days ago
د افغانستان اتلانو ليګ د درېيم پړاو سیالیو پچهاچونه پای ته ورسېده
-
ساینس او ټیکنالوژي4 days ago
اپل شرکت د نړۍ د تر ټولو د لوی ګرځند پلورونکي دریځ له لاسه ورکړ
-
نړۍ3 days ago
امريکا او متحدین یې پر ايران د نورو بنديزونو لګولو هڅې کوي
-
تازه خبرونه4 days ago
د کابل په هوايي ډګر کې د ۲۰۲۱ ز. کال ځانمرګی بریدګر عبدالرحمن لوګری و- امریکا
-
تازه خبرونه4 days ago
ازبکستان، سعودي عربستان او قطر پر افغانستان او افغان – ټرانس پټلۍ خبرې وکړې
-
نړۍ5 days ago
امریکا به پر ایران د اسرائیلو په ځوابي برید کې برخه وانخلي
-
لوبی2 days ago
آریانا ټلویزیون د ۲۰۲۴ پاریس المپیک سیالیو د خپراوي حق ترلاسه کړ
-
سیمه ییز خبرونه3 days ago
سعودي عربستان به په پاکستان کې پر بېلابېلو پروژو پانګونه وکړي