د ټاکنو د نوماندانو د نوملیکنې بهیر به د شنبې پر ورځ پیل شي

(Last Updated On: May 28, 2018 2:18 pm)

ټاکل شوې، چې د ولسي جرګې او ولسوالیو شوراګانو د ټاکنو د نوماندانو د نوملیکنې بهیر دوه ورځې وروسته(د غبرګولي ۵) پیلیږي.

د شنبې پر ورځ د هغو کسانو د نوملیکنې لړۍ پیلیږي، چې غواړي د ولسي جرګې او ولسوالیو شوراګانو ټاکنو ته ځانونه نوماند کړي.

د ټاکنو خپلواک کمیسیون وایي، دغه لړۍ به په پلازمېنه او ټولو ولایتونو کې پیل شي او هر څوک، چې د نوماندۍ پر شرایطو برابر وي، کولی شي ځانونه نوماند کړي.

د ولسي جرګې کاندیدان باید پېنځه ویشت کلنۍ ته رسیدلې وي، برحاله دنده ونلري، د ملاتړ په توګه زر پېژندپاڼې ورسره وي او د لوړو زدکړو لرل ورته شرط ندی.

د ټاکنو خپلواک کمیسیون غړی حفیظ الله هاشمي وایي: د ټاکنو خپلواک کمیسیون د وروستي نوملړ له اعلان مخکې به د احتمالي او رسمي نوماندانو نومونه ونښودل شي.            

څارونکي بنسټونه اندېښمن دي، چې په ځینو ولایتونو کې د رایه ورکوونکیو د نوملیکنې لړۍ ډېره ټېټه ده؛ خو په تناسب یې د ټاکنو د احتمالي کاندیدانو شمېر ډېر دی، چې دا د ټاکنو مشروعیت تر پوښتنې لاندې راولي.

د افغانستان د آزادو او عادلانه ټاکنو د څار رییس یوسف رشید وایي:  مونږ داسې ولایتونه هم لرو، چې تر دې دمه په کې لس زره کسانو نوملیکنه نده کړې؛ خو ۴۰ یا ۵۰ احتمالي نوماندان لري. دوی ۴۰۰۰۰ زره تذکرو ته اړتیا لري. په داسې حال کې، چې هلته لس زره کسانو نوملیکنه نده کړې.           

لا تر اوسه د ولسي جرګې او ولسوالیو شوراګانو د نوماندانو د نوملیکنې بهیر نه دی پیل شوی؛ خو احتمالي نوماندانو ټاکنیز کمپاینونه پیل کړي دي، د عکسونو او شعارونو تر څنګ په ټولنیزو شبکو کې خپل پلانونه هم وړاندې کوي.

په ټاکنو قانون کې دا درغلي ګڼل کیږي او کیدی شي ځینې دغه کسان د نوماندانو له نوملړه ووځي.

د افغانستان د رڼو ټاکنو د څار بنسټ رییس نعیم ایوب زاده وایي: له راجستر کیدو وروسته اصول او تګلاره د پاملرنې وړ ده؛ خو که له تګلارې سرغړونه رامنځته کیږي بیا؛ نو نوماندان باید له قانوني چلند سره مخ شي.

د ولسي جرګې او ولسوالیو شوراګانو د ټاکنو د نوماندانو د نوملیکنې بهیر د غبرګولي له ۵ پیل کیږي او تر ۲۲ دوام کوي.

هغه څوک به ښه چانس ولري، چې د ټاکنو کمیسیون له فلتر تېر شي او نوم یې د نوماندانو وروستي نوملړ ته لار پیدا کړي.

ویل کیږي، چې په ولسي جرګه کې؛ کابل ۳۳ ، هرات ۱۷، ننگرهار ۱۴،  بلخ ۱۱ ، کندهار ۱۱ ، غزني ۱۱،  بدخشان ۹،  کندوز ۹ ، فاریاب ۹،  تخار ۹ ،  هلمند ۸،  بغلان ۸ ، غور ۶، پروان ۶ ،  پکتیا ۵ ، جوزجان ۵، خوست ۵ ، سرپل ۵ ، فراه ۵، وردگ ۵، بادغېس ۴ ، بامیان۴ ، پکتیکا ۴ ، دایکندي ۴ ، سمنگان۴، کاپیسا ۴ ، کونړ۴ لغمان ۴ ، لوگر ۴ ،  روزگان ۳ ، زابل ۳ ، پنجشېر ۲ ، نورستان ۲ ، نیمروز ۲ ، کوچيان ۱۰ ، هندوان ۱ ، چې ټول ۲۴۹ استازي کیږي له ۳۴ ولایتونو څخه دغې جرګې ته لار موندلی شي.

خبریال: باعث حیات

About Ariana News

Check Also

په بلخ کې له ۹ ورځني ځنډ وروسته د ټاکنو کمیسیون ور خلاص شو

(Last Updated On: September 23, 2018 2:19 pm) په بلخ کې د لوی ملي ائتلاف …