عاجل خبرونه

د مشورتي لویې جرګې ګډونوال دې جرګه تحریم کړي- طالبان

(Last Updated On: April 28, 2019)

 په داسې حال کې، چې د دوشنبې پر ورځ( د غویي ۹) د ولسمشر غني په غوښتنه څلورورځنۍ مشورتي لویه جرګه د درې زره کسانو په ګډون جوړیدونکې ده؛ خو طالبانو ویلي، چې له امریکا سره د سولې خبرو پرمختګ کړی او د افغانانو خپلمنځي خبرو لپاره هم ګامونه پورته شوي؛ نو په داسې حال کې د جرګې لخوا د سولې لپاره د سرو کرښو راکښل به د سولې خبرې ګډوډې کړي.

د جرګې لپاره ټول چمتووالی بشپړ شوی؛ خو ګډونوال یې اندېښنه لري، چې ګواکي نظرونو ته به یې پام وشي او که نه.

د سولې مشورتي لویې جرګې ګډونوال اسدالله  وایي، چې مونږ د خلکو د غوښتنو د وړاندې کولو لپاره راغلي یو او په جرګه کې باید د چا ځانګړې او شخصي وړاندیزونه په پام کې ونه نیول شي.

د سولې مشورتي لویې جرګې یو بل ګډونوال ویلي، چې مونږ د خپلو خلکو د غوښتنو د وړاندې کولو لپاره ګواښونه منلي؛ خو راغلي یو.

د سولې مشورتي لویې جرګې د کمیسیون مرسیتال ضیاالحق امرخېل وايي؛  په دې جرګه کې یوازې یو کمپاین کیږي، چې هغه د سولې او د جنګ د پای ته رسیدو ، هغه د یو او بل د منلو کمپاین دی او هغه د تېرو ۱۸ کلونو پر لاسته راوړنو ټینګار دي.  

که څه هم تر اوسه څرګنده نده، چې د دغې جرګې رییس به ټاکل کیږي او که یا به یې ولسمشر غوره کوي؛ خو د اعلان شوي مهالوېش له مخې د پرانیستي ورځې له غرمې وروسته به سلا مشورې پیل شي، په درېیمه ورځ به پایلې په ډاګه او په څلورمه ورځ به خپلې سپارښتنې حکومت ته وسپاري.

د مشورتي لویې جرګې د انسجام ريیس احمد شعیب رحیم  وایي؛ زه فکر کوم، چې ګډونوال ډک زوړنه راغلي او په جرګه کې ګډون کوي او ټول د ویلو خبرې لري. دغه جرګه د دوی د وړاندیزونو او اندېښنو د وړاندې کولو لپاره جوړیږي.   

د مشورتي جرګې د پالیسۍ کمیسیون مرستیاله ناحید سرابي وایي، چې سوله خپله بیه لري او یوه بیه یې داده، چې مونږ به د مشورې  او د خپلو خلکو د اندونو راټولولو لپاره هغه څه وړاندې کړو، چې بحث پرې کیږي.

لویه مشورتي جرګه په داسې حال کې جوړیږي، چې په وړاندې یې مخالفتونه هم زور اخلي؛ پر طالبانو سربېره د حکومت اجرائيه رييس، د ولسمشریزو ټاکنو دولس ډلو او ګڼو سیاستوالو دغه جرګه تحریم کړې او له ګډونوالو هم غواړي، چې په جرګه کې ګډون ونکړي.

خبریال: خالد نیکزاد

About Ariana News

Avatar

Check Also

ملګرو ملتونو او ټاکنو کمیسیون له ټاکنډلو سره د ګډې ناستې پرېکړه کړې

(Last Updated On: December 6, 2019)د ټاکنو خپلواک کمیسیون او ملګري ملتونه له ټاکنیزو ډلو …