تازه خبرونه
د اسلام آباد ناسته د م.م له پرېکړې ښکاره سرغړونه ده- احمدي
د افغانستان د بهرنیو چارو وزارت په اسلام آباد کې له طالب استازیو سره د دغه هېواد د لومړي وزیر عمران خان کیدونکې غونډې ته تند غبرګون ښودلی او څرګندوي، چې اسلام آباد لدې کار سره وسلوالو طالبانو ته رسمیت ور په برخه کوي.
ټاکل شوې، چې اسلام آباد به د دوشنبې پر ورځ( د سلواغې ۲۹/ د فبرورۍ ۱۸) د طالب استازیو د څوارلس کسیز پلاوی کوربتوب وکړي او طالب استازي به له زلمي خلیلزاد، د سعودي عربستان له ولیعهد او د پاکستان له لومړي وزیر سره هم وګوري.
افغان حکومت وايي، چې په اسلام اباد کې د طالب استازیو د غونډې په اړه له دوی سره هیڅ سلا مشوره ندې شوې؛ نو، ځکه د افغانستان د بهرنیو چارو وزارت ملګرو ملتونو ته شکایت کړی دی.
دوی باوري دي، چې په اسلام آباد کې له طالب استازیو سره غونډه د ملګرو ملتونو د ۱۹۸۸ کال له پرېکړه لیک څخه ښکاره سرغړونه او د افغان دولت پر ملي حاکمیت ښاره تېری بلل کیدای شي.
د بهرنیو چارو وزارت ویاند صبغت الله احمدي ویلي، چې دغه ناسته طالبانو ته د مشروعیت ورکولو او رسمیت پېژندلو لپاره ده، چې دا کار له ټولو نړیوالو پرېکړو ښکاره سرغړونه ده.
نوموړي زیاته کړې، چې د شېر محمد عباس ستانکزي په ګډون د طالب پلاوي نهه کسان د ملګرو ملتونو د امنیت شورا په بندیزونو کې شامل دي او د سفر اجازه نلري.
طالبانو ته نږدې سرچینې وايي، چې طالب استازي به په اسلام آباد کې له زلمي خلیلزاد سره د طالب زندانیانو پر تبادله او د سولې په خبرو کې د افغان دولت پر را ګډولو خبرې وکړي. سیاسي کارپوه وحید مژده وایي، چې په دې ناسته کې به د سعودي استازی د سولې په خبرو کې د افغان حکومت وردننه کیدل وغواړي.
طالبانو هم ویلي، چې پلاوی به یې د پاکستان له لومړي وزیر سره په دوه اړخیزو او اقتصادي مسایلو خبرې وکړي.
د ولسي جرګې د نړیوالو اړیکو د کمیسیون رييس زمرک پادخوابي وایي؛ پاکستان پرته لدې، چې له افغانستان سره مشوره وکړي؛ طالبان اسلام آباد ته غوښتي او ورسره دوه اړخیزې خبرې کوي.
په همدې حال کې د افغان سولې لپاره د امریکا د بهرنیو چارو وزارت استازي زلمي خلیلزاد اسلام آباد ته له سفر مخکې د یکشنبې پر ورځ( د سلواغې پر ۲۸/ د فبرورۍ پر ۱۷) له اجرائيه رييس عبدالله عبدالله سره لیدلي دي.
اجرائيه رييس ویلي، چې خلیلزاد د سولې د خبرو له پرمختګونو خبر کړی او دواړو د افغانانو پر مالکیت د سولې پر خبرو ټينګار کړی دی.
ټاکل شوې، چې زلمی خلیلزاد به د ورسره پلاوي پر ملتیا د روانې میاشتې پر ۲۵مه په قطر کې له طالب مشرانو سره خبرې ولري او د تېرې جنورۍ ناستې په پایله کې د رامنځته شویو کمیتو ترسره شوې چارې به سره شریکې کړي.
دا په داسې حال کې ده، چې پاکستاني خبریال سميع يوسفزي، چې د طالبانو کړنې څاري رسنیو ته ويلي، چې په اسلام آباد کې له پاکستانيو چارواکو سره د طالبانو د دوشنبې ورځې ناسته لغوه شوې؛ خو طالب سرچینو تر دې دمه په دې اړه څه ندي ویلي.
تازه خبرونه
تېر ۲۰۲۳ کال د افغانستان د خلکو لپاره د سترو ننګونو کال و -راپور
په ۲۰۲۴ کال کې به د افغانستان شاوخوا ۱۵ اعشاریه ۸ میلیون خلک د خوړو د خوندیتوب له بحران او بېړنۍ کچې سره مخ شي.
په افغانستان کې د ملګرو ملتونو ټولنې د ۲۰۲۳ کال د پایلو په کلني راپور کې ویلي، چې په افغانستان کې میلیونونه وګړي له لوږې او خوارځواکۍ سره مخ دي، چې ډېري یې خپلې لومړنۍ اړتیاوې پوره کولی نشي.
ملګرو ملتونو څرګنده کړې، چې بشري ناورین په ۲۰۲۳ کال کې هم دوام درلود او دغه هېواد یوه لسیزه شاه تګ کړی او دا مهال د افغانستان نیمايي وګړي په بې وزلۍ کې ژوند کوي.
د اقتصاد وزارت مسلکي مرستیال عبداللطیف نظري له افغانانو سره د بشري مرستو پر اړتیا ټینګار کوي او زیاتوي، چې دغه وزارت په هېواد کې د فقر او لوږې د ختمولو لپاره مناسب پلانونه لري.
ملګرو ملتونو په راپور کې راغلي، چې له ۲۰۲۱ کال راپدیخوا د اقتصادي تولیداتو کچه یو پر څلورمه راټیټه شوې او د نړیوال بانک د راپور له مخې دا مهال د افغانستان نیمايي نفوس په بېوزلۍ کې ژوند کوي.
دا په داسې حال کې ده، چې ملګرو ملتونو اندېښنه ښودلې او څرګندوي؛ دوی له افغانستان سره د مرستو د دوام لپاره د بودجې له کمښت سره مخ دي.
تازه خبرونه
ملګرو ملتونو تېر کال په افغانستان کې د اوبو ۴۷۰ کیلومټره کانالونه جوړ کړل
د خوړو نړيوال پروګرام ویلي، چې تېر کال يې په افغانستان کې د سيمهييزو ټولنو پر همکارۍ د شاوخوا ٤٧٠ کيلومټرو پر اوږدوالي د اوبو کانالونه جوړ کړي دي.
د دې پروګرام د افغانستان برخې د چارشنبې پر ورځ (د وري نههویشتمه ) په ایکس پاڼه کې لیکلي؛ په افغانستان کې کروندګر اوبو ته له لاسرسي پرته خپل ژوند روان ساتلی نشي.
دغه راز څرګنده شوې؛ د اوبو کانالونو له کروندګرو سره مرسته کړې، چې خپلو کورنیو ته خواړه برابر کړي او خپل اضافي تولیدات او محصولات وپلوري.
د خصوصي سکتورغړي هم وايي؛ د خوړو نړیوال پروګرام لهخوا په هېواد کې د اوبو د مدیریت لپاره د کانالونو له جوړولو هرکلی کوي او څرګندوي، چې د هېواد د اوبو مدیریت کولی شي افغانستان له فقر او اقتصادي بحران څخه وژغوري.
دا په داسې حال کې ده، چې له څو کلونو وچکالۍ وروسته؛ وروستیو اورښتونو د افغانستان کروندګر هیله من کړي، چې راتلونکی کال به ښه حاصلات ولري.
تازه خبرونه
په بیجینګ کې د چین او افغانستان درېیمه اقتصادي ناسته تر سره شوه
په بیجينګ کې د افغانستان اسلامي امارت او د چين ولسي جمهوريت د بهرنيو چارو وزارتونو د اړوند سياسي څانګو پر مشرۍ د بشري مرستو او اقتصادي بيارغونې پر ميکانيزمونو درېيمه ناسته ترسره شوه.
د افغانستان بهرنیو چارو وزارت ویاند عبدالقهار بلخي په ایکس پاڼه کې لیکلي، چې په دې ناسته کې د افغانستان د بهرنيو چارو وزارت پر استازیو سربېره د صنعت او سوداګرۍ، کانونو او پټروليم، د کډوالو او بېرته راستنېدونکیو چارو او د طبيعي پېښو پر وړاندې د امارت وزارت استازو ګډون کړی و.
دغه راز په دې ناسته کې د چين د سوداګرۍ، طبيعي سرچينو، د چين نړيوالې پراختيايي ادارې او نړيوالې همکارۍ ادارو استازو هم برخه اخیستې وه.
د بهرنیو چارو وزارت د څرګندونو له مخې؛ په دې ناسته کې له تېرو دوه نيمو کلونو راپدیخوا د طبيعي پېښو، جبري راستانه شویو کډوالو او روغتيا په برخه کې د مرستو پر میکانیزمونو بیا کتنه وشوه.
افغان پلاوي د چين د مرستو د ګټورتوب لپاره خپل وړانديزونه او سلا مشورې چينايي اړوند لوري ته وړاندې کړل.
چينايي لوري ژمنه کړې، چې له افغانستان سره به د چين بشري مرستې د افغان لوري د اړتياوو او لومړيتوبونو له پام کې نيولو سره تنظيم کړي. دغه راز به له افغانستان سره د جبري راستانه شویو کډوالو د مېشتېدو په برخه کې د چين د سل میلیون يوانو په مرستو کې د افغان لوري وړانديزونه هم په پام کې ونيول شي.
د چين سره صليب ټولنې ژمنه کړې، چې په چين کې به د افغان ماشومانو د زړه ناروغيو د درملنې د بيا پيل زمينه هم برابره کړي.
د عبدالقهار بلخي د څرګندونو له مخې؛ د افغانستان د اقتصادي بيارغونې ميکانيزم په چوکاټ کې د دواړو هېوادونو ترمنځ د سوداګرۍ پر زياتوالي په ځانګړي توګه چين ته د زیاتو افغان توکو د صادرولو د زمينې برابرولو، وړتیا لوړونې او په افغانستان کې د کانونو او معاصرې سوداګرۍ په برخه کې د چين د پانګونې د فرصتونو په اړه هر اړخیزې خبرې وشوې.
دواړو لوريو چين ته د افغانستان د جلغوزو له صادراتو وروسته د انارو د صادراتو زمينې د برابرولو د هرکلی ترڅنګ په افغانستان کې د نفتو د استخراج کچې لوړولو او د لوګر مس عینک کان د استخراج د پيلولو په برخه کې د وروستيو پرمختګونو په اړه خبرې وکړې او ټينګار وشو، چې د چارو د چټکتيا پر طرحو به غور وشي.
افغان لوري د چين پر ملاتړ د افغانستان د حکومت په ګڼو وزارتونو او ادارو کې د ملکي مامورينو د وړتیا لوړونې لپاره له روزنيزو پروګرامونو او افغانانو ته د سکالرشپونو د لړۍ له پراخولو هرکلی وکړ.
ویل کیږي، چې په دې ناسته کې د واخان اقتصادي دهلیز د اهميت او احتمالي ګټو او د دې کوريډور د پرانيستو پر امکاناتو هم بحثونه شوي دي.
-
لوبی5 days ago
د افغانستان اتلانو ليګ د درېيم پړاو سیالیو پچهاچونه پای ته ورسېده
-
ساینس او ټیکنالوژي4 days ago
اپل شرکت د نړۍ د تر ټولو د لوی ګرځند پلورونکي دریځ له لاسه ورکړ
-
نړۍ3 days ago
امريکا او متحدین یې پر ايران د نورو بنديزونو لګولو هڅې کوي
-
تازه خبرونه5 days ago
د کابل په هوايي ډګر کې د ۲۰۲۱ ز. کال ځانمرګی بریدګر عبدالرحمن لوګری و- امریکا
-
تازه خبرونه4 days ago
ازبکستان، سعودي عربستان او قطر پر افغانستان او افغان – ټرانس پټلۍ خبرې وکړې
-
لوبی3 days ago
آریانا ټلویزیون د ۲۰۲۴ پاریس المپیک سیالیو د خپراوي حق ترلاسه کړ
-
سیمه ییز خبرونه3 days ago
سعودي عربستان به په پاکستان کې پر بېلابېلو پروژو پانګونه وکړي
-
تازه خبرونه4 days ago
پاکستان بلوچستان میشتو افغانانو ته د وتلو ګواښ وکړ