عاجل خبرونه

د شخصي ګټې وټې لپاره د کابل لومړنۍ پایلې ځنډول شوي- کارپوهان

(Last Updated On: January 6, 2019)

د چارو کارپوهانو تور لګولی، چې د ټاکنو خپلواک کمیسیون چارواکو له قانوني وخت اووه شپېته ورځې وروسته هم د کابل لومړنۍ پایلې د شخصي ګټې وټې لپاره ځنډولې دي.

د ولسي جرګې له ټاکنو اووه شپېته ورځې تېریږي؛ خو د ټاکنو خپلواک کمیسیون اوس هم ندی بریالی شوی، چې د کابل ولایت لومړنۍ پایلې اعلان کړي.

د ټاکنو د مهالوېش له مخې؛ په پام کې وه، چې د لړم میاشتې پر نولسمه لومړنۍ پایلې اعلان شي؛ خو اوس هم دغه پایلې اعلان شوې ندي. د ټاکنیزو شکایتونو کمیسیون د لیندۍ پر پېنځلسمه د کابل رایې باطلې اعلان کړي؛ خو بیا وروسته له خپلې پرېکړې پر شا شو.  

د کمیسیون مسوولین وايي، چې دوی غواړي رڼې او د قناعت وړ لومړنۍ پایلې اعلان کړي.

د ټاکنو خپلواک کمیسیون د ویاند مرستیال ذبیح الله سادات وایي، چې مونږ د ټاکنو د غوره او رڼو پایلو د اعلام لپاره هڅه کړې، چې تورې رایې له سپینو هغو بېلې کړو.

د کابل په ۵۵۸ مرکزونو او درې زره درې سوه محلونو کې ټاکنې تر سره شوې. ټاکنیزو شکایتونو کمیسیون د یو سل و اتیا مرکزونو او درې سوه محلونو د بیا شمېرنې غوښتنه کړې ده.

د ټاکنو خپلواک کمیسیون وايي، چې د کابل اتیا په سلو کې رایې یې په معلوماتي مرکز کې ځای پر ځای کړي؛ خو اوس هم د کابل د ټولو رایو شمېر څرګند ندی.

له همدې کبله پر ټاکنو کمیسیون نیوکې مخ پر زیاتیدو دي، چې په خپلو چارو کې پاتې راغلی دی.

یو شمېر سیاسي ډلې وايي، چې کمیشنرانو د خپلو شخصي ګټو لپاره د کابل لومړنۍ پایلې ځنډولې دي.

د ټاکنو خپلواک کمیسیون پخوانی ویاند نور محمد نور وایي، چې د ټاکنو خپلواک کمیسیون کاري وړتیا نلري؛ د ځانګړې ګټې وټې لپاره غواړي ټاکنې وځنډوي او دا کار به سترې ستونزې رامنځته کړي.

د ټاکنو خپلواک کمیسیون پخواني رييس نجیب الله احمدزي څرګنده کړې، چې په ټاکنو کمیسیون کې ناست کسان مسلکي ندي او ان د ټاکنې پر ارزښت هم نه پوهیږي. دوی د ټاکنو په مارکیت کې کار ندی کړی او زما په اند دا به ډېره مشکله وي، چې څلور واړه ټاکنې تر سره کړي.

د ولسمشریزو ټاکنو یو شمېر احتمالي نوماندان وايي، چې د ټاکنو خپلواک کمیسیون په جوړښت کې باید بدلون رامنځته شي.

د ولسمشریزو ټاکنو احتمالي نوماند شیدا محمد ابدالي د ټاکنو خپلواک کمیسیون پر اوسني ترکیب باور نلري او وایي؛ هغه وخت رارسیدلی، چې د ولسي جرګې د ټاکنو، د کمیسیون له غړیو او سیستمه ناپېیلې پلټنې تر سره او دا ښکاره شي، چې ستونزه چرته ده.

له درغلیو او ګڼو نیمګړتیاوو سره د ولسي جرګې د ټاکنو له تر سره کیدو وروسته پر ټاکنو کمیسیون نیوکې مخ پر ډېریدو دي او کمیسیون هم مني، چې په ځينو برخو کې د دوی چارې نیمګړې وې.

خبریال: علی اصغري

About Ariana News

Avatar

Check Also

په راتلونکیو ۵ ورځو کې افغان حکومت سل طالب زندانیان خوشې کوي

(Last Updated On: March 26, 2020)د ملي امنیت شورا څرګنده کړې، چې په راتلونکیو ۵ …