صحت
آغاز کمپاین فرعی واکسین پولیو در افغانستان
مسوولان در وزارت صحت عامه می‌‌گویند که کمپاین فرعی ملی تطبیق واکسین پولیو در ۱۶ ولایت آغاز شده است.
شرافت زمان امرخیل، سخنگوی وزارت صحت عامه، می‌گوید که کارزار فرعی ملی تطبیق واکسین ضدپولیو امروز (دوشنبه، ۷ عقرب) در ولایت‌های کابل، کندهار، هلمند، ارزگان، زابل، فراه، ننگرهار، لغمان، کنر، نورستان و برخی ولایت‌های دیگر و حوزه‌های جنوب، جنوب‌شرق، شرق، غرب و شمال‌شرق کشور آغاز شده است.
به گفته‌ی سخنگوی وزارت صحت عامه، این کمپاین سه روز ادامه خواهد داشت و در جریان آن حدود ۶.۲ میلیون کودک زیر پنج سال واکسین ضدپولیو دریافت خواهند کرد.
آقای زمان، از والدین، عالمان دین و بزرگان قومی می‌خواهد که با واکسیناتوران این وزارت در تطبیق کمپاین واکسین ضدپولیو بر کودکان زیر پنج سال در ولایت‌های یادشده، هم‌کاری کنند.
مسوولین در وزارت صحت عامه، می‌افزایند که در سال روان میلادی هیچ رویداد مثبت پولیو در کشور ثبت نشده است و این وزارت می‌خواهد که از طریق تطبیق واکسین ضدپولیو از این بیماری پیش‌گیری کند.
