د افغان حکومت او طالبانو تر منځ د مخامخ خبرو اترو د دوهم پړاو په درشل د پاکستان يوه جګپوړي دولتي چارواکي د چهارشنبې په ورځ د دې هېواد انګرېزي ورځپاڼې ايکسپريس ټريبيون ته د نوم نه اخيستو په شرط ويلي چې اسلام اباد او بيجينګ چمتو دي چې د دواړو افغان خواوو ترمنځ د خبرو په نتيجه کې د دوى د موافقې د اجرا کېدو ضمانت ورکړي.

“موږ چمتو یو چې څو ګامه وړاندې ولاړ شو، او حتی لیوال یو چې د افغان حکومت او طالبانو تر منځ د خبرو د توافقاتو ضمانت وکړو؛ خو که ښکېل لوري پرمختګ وکړي، موږ ستونزه نه لرو.“

د پاکستان د مري په ښار کې د جولای په اوومه د کابل او طالبانو د استازو تر منځ له مخامخ خبرو وروسته ټاکل شوې د دغو خبرو دوهم پړاو د همدې میاشتې په پای کې په چین کې تر سره شی.

ویل کیږي چې د اختلافي مواردو لیستول د دوهم پړاو خبرو اصلي موضوع ده.

پاکستان هم ویلي چې هڅه کوي نورې وسلوالې ډلې هم د خبرو میز ته حاضرې کړي.

د ولسي جرګې ځینې غړي وایي، په افغانستان کې سوله او ثبات په پاکستان کې د سولې او ثبات په مانا دی او دا ځل اسلام آباد باید په خپلو ژمنو عمل وکړی.

ولسي جرګې غړی – صادقي زاده نیلي:

“خدای دي وکړي چې له کاسې لاندې نیمه کاسه نه وي؛ ځکه چې پاکستان تل زموږ د هیواد له پاره یوه منفي اجنډا لرله. څرنګه کولای شي سړی باور وکړي چې پاکستان پرته له دې چې هغې منفي اجنډا ته نه وي رسیدلای، له دې سولې څخه ملاتړ وکړي. خو که داسې وي چې افغان چارواکي د هغوی د اجنډاوو پرسر یوې پرېکړې ته رسیدلي وي، نو هیله من یو چې د افغانستان له خلکو سره یې په ښکاره توګه شریک کړي. خدای مه کړه داسې نه شي چې هغه بیه چې د سولې له پاره یې ورکوو، له هغې لوړه وي چې د جنګ له پاره یې ورکوو.“      

د ولسي جرګې غړی – عبدالقیوم سجادي:

“هیله لرو په هغو هڅو کې چې په سیمه ییزه کچه د سولې له پاره ترسره کيږي، پاکستان په بنسټيزه توګه خپلې ستراتیژۍ ته د بدلون ورکولو له پاره ګامونه واخلي.”

د خبرو اترو دوهم پړاو په داسې حال کې په چین کې پیلېدونکی دی چې د طالبانو مشر ملا عمر په خپل اختریز پیغام کې ویلي و چې سیاسي هدف ته د رسېدو لپاره خبرې مشروع لار ده او شریعت کې هیڅ ممانعت نشته.