ولسي جرګې داطلاعاتو او فرهنګ وزارت ته د نوماند عبدالباري جهاني له دوهم تابعیت نه د تېرېدو اسناد ونه منل او غوښتنه یې وکړه چې د شنبې تر ورځې دې د امریکا سفارت او د بهرنیو چارو وزارت له خواپه دې اړه دوی ته بشپړ اسناد وړاندې شي.

ولسي جرګه به د شنبې په ورځ کاندید وزیرانو ته د رایو صندوقونه کیږدي.

ولسي جرګه وایی چې د شپاړسو نوماند وزیرانو په اړه د ولسي جرګې د لومړي مرستیال په مشرۍ د فرهنګي، نړیوالو چارو او مرکزي پلټني کمیسیونونه ګمارل شوي وو، څو د هغوي اسناد وڅیړي.

د ولسي جرګې لومړی مرستیال وایی، د اتو نوماند وزیرانو اسد الله ضمیر، سعادت منصور نادري، همایون رسا، علی احمد عثماني، عبدالستار مراد، محمد الله بتاش، محمود بلیغ او عبدالباري جهاني د دوه ګوني تابعیت او تحصیلی اسنادو په اړه شکونه وو، چې له اړوندو څانګو څخه د اسنادو په رسیدو سره ستونزې اوارې شوې، خو د عبدالباري جهاني په اړه وړاندې شوي اسناد د دوی قناعت حاصل نه کړ.

د ولسي جرګې لومړی مرستیال ظاهر قدیر:      

“د باري جهاني په اړه د اسنادو تر را رسېدو وروسته چې د بهرنیو چارو وزارت او د امریکا سفارت لیږلي، هغه ته به اجازه ورکړل شي، چې تالار ته راشي.“

بلخوا د پوهنې او ښځو چارو وزارتونو ته کاندیدانو د ولسي جرګې د چهارشنبې په غونډه کې خپل پروګرامونه تشریح کړل.

دپوهنې وزارت ته نوماند اسدالله حنیف بلخي وویل؛ د فساد سره کلکه مبارزه او شکایتونو ته رسیدګي د مدیریت په برخه کې اصلاحات او متخصص کسانو ګمارل او د پوهنې وزارت ستونزو په اړه جدي څیړنه د دوی له مهمو کاري پروګرامونو څخه دي.

د ښځو چارو وزارت ته نوماندې دلبر نظري وویل؛ د دولت په کلیدي او رهبري پوستونو کې د ښځو ګمارل او د ښځو ستونزو ته د سیدګې لپاره د پالیسی ګانو جوړل یې له مهمو کارونو څخه دي.

د ترانسپورت او فواید عامې وزارتونو ته نوماندانو هم د سړکونو د رغولو او د ترانسپورتي سهولتونو په اړه خپلې تګلارې ولسي جرګې ته وړاندې کړي.

ترانسپورت وزارت ته نوماند محمد الله بتاش وویل؛ د معیاری خدماتو وړاندې کول، ترانسپورتي اسانتیاوې رامنځ ته کول، د ترانسپورتي پروژ احیا کول تر څو خلکو ته د کار زمینه برابره شي.

دفواید عامې وزارت ته نوماند محمود بلیغ وویل؛په لنډ مهال کې د وزارت ستونزې څیړل او هغه ته رسیدګې، د طبیعي پیښو او د وسلوالو مخالفینو لخوا د هغه سړکونو رغول چې زیانمن شوي.

مخکې له دې هم یولسو کاندید وزیرانو په درې ورځو کې ولسي جرګې ته خپل کاري پروګرامونه تشریح کړي وو، ولسي جرګه غواړي دغو کاندید وزیرانو ته د شبنې په ورځ د رایو صندوقونه کیږدي.

خبریال: عبدالعزکریمی