د لندن کنفرانس د پای په مراسمو کې ولسمشر غني په افغانستان کې شویو پرمختگونو ته اشاره وکړه او د نړیوالو د مرستو او همکاریو غوښتونکی شو.

افغان ولسمشر وویل، چې د ملي یووالي حکومت د افغانستان د بېلابېلو قومونو اکثریت په ځان کې رانغاړي او له اجرائیه رییس داکتر عبدالله عبدالله سره به گټورگامونه هم پورته شي.

ولسمشر غني دغه راز د افغان ځواکونو پیاوړتیا وستایله او وایي، چې د تېرو څلور کلونو په ترڅ کې د امنیتي مسوولیتونو له انتقال سره سم افغان ځواکونو له ځانه ښې وړتیاوې ښودلي او د هېواد په ډېرو برخو کې یې امنیت ته اوږه ورکړې ده.

د بریـتانیې د بهرنیو چارو وزیر په افغانستان کې د ښې حکومتدارۍ غوښتونکی شو او د فساد په وړاندې یې د چټکې مبارزې غوښتنه وکړه.

نومخوړي وړاندیز وکړ، چې په افغانستان کې باید د یو لړ اصولو له په پام کې نیولو سره مثبت بدلون ته لاره اواریدلی شي.

دیوید کامرون وویل؛ د نړۍ ترټولو بریالي هېوادونه هغه دي، چې فساد په کې شتون نلري، پیاوړې زیربناوې ، ښه او پراخه حکومتداري، آزاد او مناسب انتخاباتي نظام، د قانون حاکمیت، وړ عدلي سیسټم، مارکتونو ته لاسرسی، آزاد مطبوعات، چې خلک د زنداني کیدو له وېرې د فساد په افشا کولو کې رول ولوبوي.

ښاغلي کامرون دا هر څه طلايي ارزښتونو وبلل.

نوموړي له افغانستان سره د خپل هيواد د همکاریو ډاډ ورکړ او زیاته یې کړه، چې دوی هڅه کوي د فوتبال له لارې هم د دواړو هيوادونو اړیکې ژورې کړي او پدې برخه کې یېډاډ څرگند کړ، چې د افغانستان د فوتبال له فدراسیون سره یې گډ کار هم پیل کړی دی.

د بریتانیا د پراختیایي مرستو وزیره د لندن کنفرانس د افغانستان لپاره ډېر مهم بولي، او وایي، په دغه کنفرانس کې له افغانستان سره د نړیوالې ټولنې له خوا په خپلو مرستو ټینگار او د افغان دولت له خوا د سمونونو د راوستو لپاره ژمنې کولی شي د دغه هېواد د پراختیا لپاره نوي مسیر ته زمینه برابره کړي.

د بریتانیا د پراختیایي مرستو وزیره زیاتوي، افغان دولت د سمونونو د راوستو لپاره روښانه پروگرامونه لري، خو اوس هم د امنیت او ثبات په وړاندې ننگونې شته.

د افغانستان په اړه د لندن نړیوال کنفرانس د بریتانیا د بهرنیو چارو د وزیر فلیپ هاموند په وینا؛ د لیندۍ په ۱۳ پیل شوی او د دغه کنفرانس د جوړیدو موخه د افغاسنتان په تړاو د توکیو د کنفرانس د ژمنو یوځل بیا تازه کول دي. د توکیو په کنفرانس کې د مرستندویو هېوادونو ژمنې به له دې وروسته په سیاسي، اقتصادي او پوځي برخو کې افغانانو ته پلې شي.