Connect with us

سیمه ییز خبرونه

له ترهگرۍ سره د مبارزې لپاره اړينه ده، چې كابل او اسلام آباد په خپلو كې نږدې شي

خپور شوی

د

(Last Updated On: لړم ۳, ۱۴۰۱)

په پاكستان كې د بريتانيا سفير وايې، اسلام آباد د سولې د خبرو ميز ته د طالبانو له حاضرولو سره ليوالتيا ښيي. نوموړي ترهگري د افغانستان او پاكستان گډ دښمن وباله او له دې ستونزې سره يې د مقابلې لپاره د پاكستان او افغانستان په گډو همكاريو ټينگار وكړ.

په كابل او اسلام آباد كې د بريتانيا سفيرانو د ديورند كرښې په دواړو غاړو كې د ثبات د ټينگښت لپاره د افغانستان او پاكستان په گډو همكاريو ټينگار وكړ.

دوى په كابل كې خبري غونډې ته څرگنده كړه، له ترهگرۍ سره د مبارزې لپاره اړينه ده، چې كابل او اسلام آباد په خپلو كې نږدې شي.

په افغانستان كې د بريتانيا سفير ريچارد ستيك وايي:

له دواړو دولتونو سره زمونږ د كار اصلي اړخ دا دى، څو له هغوى سره مرسته وكړو، چې خپل منځي ستونزې حل شي. زمونږ په آند د افغانستان او پاكستان تر منځ مهم دريځ دا دى، چې څرنگه كولاى شي، د كرښې د دواړو غاړو امنيت تامين كړي او د وېره اچوونكو پر وړاندې په اغيزمن ډول مبارزه وكړي.

دا په داسې حال كې ده، چې له ترهگرۍ سره د مبارزې پر وړاندې د پاكستان دوه گوني چلند تل د افغان حكومت اندېښنې را پارولي دي.

له وسله والو طالبانو سره خبرې اترې، او د خبرو له لارې تاوتريخوالى پاى ته رسول په وروستيو كلونو كې د افغان حكومت مهم پروگرامونه دي.

د افغانستان اصلي متحدانو لكه امريكا، بريتانيا او ناټو لدې پروگرامونو ملاتړ كړى دى. دا هڅې دومره جدي دي، چې د افغانستان د مدني ټولنې ځينو بنسټونو واك ته د طالبانو د بېرته ستنېدو په باب اندېښنه لري.

په كابل كې د بريتانيا سفير همدا راز له افغانستان څخه د نړيوالو ځواكونو تر وتو وروسته د افغان ځواكونو د وړتياو  په باب خوشبينه دى، خو وايې، نړيوالې ټولنې په افغانستان كې ځينې فرصتونه له لاسه وركړل او دې فرصتونو كولاى شواى حالت ښه لور ته بيولى واى.

د بريتانيا دولت د ۱۳۷۱لمريز كال له تجربو زده كړه كوي. مونږ به خپلې اوږد مهاله همكاري جاري ساتو، په افغانستان كې زمونږ رول بدلېږي، خو د همكاريو بڼه نه بدليږي.

په همدې حال كې په اسلام آباد كې د بريتانيا سفير آدام تامسن وايې:

سولې ته د رسېدو لپاره پوځي تگلاره برياليتوب نه شي را منځته كولاى. پاكستانيان ډېر ليوال دي، چي افغاني طالبان له پاكستان ووځي او په افغانستان د سولې له بهير سره يو ځاى شي. لكه چې مونږه په افغانستان كې د پوځي حل لارې شاهدان نه يو، همدا راز د دغو پټنځايونو د را غونډولو لپاره پوځي حل لار نشته.

د ديورند كرښه بله مسئله وه، چې په اسلام آباد كې د بريتانيا سفير ورته اشاره وكړه. هغه وويل، د افغانستان او پاكستان دولتونه د ديورند كرښې پر وړاندې د بريتانيا له ليدلوري خبر دي.

د افغانستان او پاكستان دولتونه د بريتانيا د پخواني دولت دريځ باندې پوهېږي او په اوسنيو شرايطو كې غوره ده، چې پرې خبرې ونه كړو.

دا په داسې حال كې ده، چې په ملي او نړيوالو رسنيو كې د ديورند كرښې مسئله وخت ناوخته يادېږي او امريكايي چارواكو هم ويلي، چې د ديورند كرښه د افغانستان او پاكستان تر منځ د رسمي پولې په توگه په رسميت پېژني، كوم دريځ چې د افغان حكومت غبرگون يې له ځان سره درلود.

Advertisement

سیمه ییز خبرونه

د ایران او پاکستان د ګاز‌نللیکې له غځولو ملاتړ نکوو – امریکا

Published

on

(Last Updated On: وری ۹, ۱۴۰۳)

د امریکا د بهرنیو چارو وزارت د سې شنبې پر ورځ ( د وري اوومه) ویلي، چې د ایران او پاکستان د ګاز‌نللیکې له غځولو ملاتړ نکوي او له تهران سره، چې د واشنګټن د بندیزونو له خطر سره مخ دی؛ د سوداګرۍ پر نکولو ټینګار څرګنوي.

د رویټرز خبري اژانس د راپور له مخې؛ د ایران او پاکستان د ګاز‌نللیکه، چې د سولې نللیکه یادېږي.

دغه راز دا نللیکه د تهران او اسلام‌آباد ترمنځ یوه اوږدمهاله پروژه ده، چې له تېرو څو کلونو راپدیخوا څو ځلې ځنډول شوې او مالي چارې یې له ستونزو سره مخ شوې دي.

دا نللیکه له ایران څخه پاکستان ته، چې ​​ختیځ ګاونډ یې دی؛ طبیعي ګاز لېږدوي.

ایران او پاکستان تېر اوړي دا پېنځه کلن سوداګریز پلان لاسلیک کړ او هوکړه وشوه، چې خپله دوه اړخیزه سوداګري به پېنځه میلیارډ ډالرو ته لوړه کړي.

په دې وروستیو ورځو کې د تهران پر وړاندې د واشنګټن د بندیزونو په اړه د اسلام‌آباد په تګلاره کې له پاکستانيو چارواکو متضادې څرګندونې اورېدل کېږي.

د پاکستان بهرنیو چارو وزارت ویاندې ممتاز زهرا بلوچ ویلي؛ د پاکستان حکومت له ایران څخه د طبیعي ګازو د واردولو د نللیکې د جوړولو لپاره د امریکا له بندیزونو او اجازې څخه معافیت ته اړتیا نلري.

دغه راز د پاکستان د تېلو وزیر مصدق ملک ټینګار کړی، چې هېواد یې د امریکا له بندیزونو څخه د معافیت په لټه کې دی.

د امریکا بهرنیو چارو وزارت یوه ویاند د سې شنبې پر ورځ په یو خبري کنفرانس کې ویلي: مونږ تل ټولو ته دا مشوره ورکوو، چې له ایران سره سوداګري زمونږ د بندیزونو خطر لري او مونږ له ټولو غوښتي، چې د دې مسلې ټولو اړخونو ته پوره پاملرنه ولري.

له دې مخکې د جنوبي او منځنۍ آسیا په چارو کې د امریکا بهرنیو چارو وزارت مرستیال ډونالډ لو ویلي وه، چې اسلام‌آباد له ایران سره د ګازو د سوداګرۍ د ترسره کولو لپاره له بندیزونو د معافیت غوښتنه نده کړې او واشنګټن یې ملاتړ نکوي.

تېره میاشت د پاکستان چارسمبالي حکومت د دې نللیکې د ۸۰ کیلومټره برخې د جوړولو منظوري ورکړه، چې تر ډېره حده یې د ۷ میلیارډ ډالرو په پروژه کې د کلونو ځنډونو له کبله ایران ته د میلیاردونو جریمې د ورکولو مخه ونیوله.

ایران او پاکستان د ۲۰۰۹ کال په جون کې د ګازو د پېر او پلور تړون لاسلیک کړ، چې د نللیکې لپاره به د ایران له جنوبي پارس څخه پاکستان ته هره ورځ له ۷۵۰ میلیون څخه تر ۱ میلیارډ مټر مکعب ګاز صادروي.

ایران ادعا کوي، چې تر ۲۰۱۱ کال پورې یې له خپلې غاړې د ۹۰۰ کیلومټره نللیکې د غځولو چارې بشپړې کړي؛ خو د پاکستان له لوري یې د جوړولو کار ندی پیل شوی.

په تېرو کلونو کې ایران څو ځلې پاکستان ته ګواښ کړی، چې د نړیوال منځګړتوب او له تړون څخه د سرغړونې له کبله به ۱۸ میلیارډ ډالره جریمه شي.

د یادونې ده، چې تهران د اټومي پروګرام له کبله له تېرې یوې لسیزې راپدیخوا د واشنګټن تر بندیزونو لاندې دی.

Continue Reading

سیمه ییز خبرونه

د مسکو د برید تر شا امریکا، بریټانیا او اوکراین لاس لري – FSB

Published

on

(Last Updated On: وری ۸, ۱۴۰۳)

د روسیې د فډرالي امنیتي خدماتو (FSB) رییس الکساندر بورتنیکوف د سې شنبې پر ورځ څرګنده کړې؛ امریکا، بریټانیا او اوکراین د مسکو د وسله‌وال برید تر شا لاس لري، چې په کې لږ تر لږه ۱۳۹ کسان ووژل شول.

اوکراین په دې برید کې، چې پړه یې داعش وسله‌والې ډلې منلې؛ د روسیې تورونه رد کړي دي.

رویټرز راپور ورکړی، چې لویدیځو هېوادونو ویلي؛ د دوی استخباراتي څرګندونې ښیي، چې د داعش افغان څانګه د برید مسووله ده.

روسیې د شنبې پر ورځ ویلي، چې مسکو ته نږدې یې د کنسرت په یوه تالار کې يې پر ډزو او وژنې تورن ټول څلور وسله‌وال نیولي دي.

داعش د جمعې د ورځې د وسلوال برید پړه پر غاړه واخیسته؛ خو داسې نښې نښانې شته، چې روسیه یې له اوکراین سره اړیکې څاري. په داسې حال کې، چې اوکرایني چارواکې په کې لاس لرل ردوي.

د مسکو والي اندرې وروبیوف ویلي؛ په ۲۴ ساعتونو کې له کنډوالو څخه ۱۳۳ جسدونه را ایستل شوي او ډاکټران د ۱۰۷ کسانو د ژغورنې لپاره مبارزه کوي.

د دولتي ټلویزیون مدیره مارګریتا سیمونیان پرته له دې، چې سرچینې ته نغوته وکړي؛ د ځاني زیان شمېر ۱۴۳ ښودلی و.

پوتین په یوه ټلویزیوني وینا کې ویلي، چې د څلورو وسله‌والو په ګډون ۱۱ کسان نیول شوي دي.

نوموړی وایي: هغوی د پټېدو هڅه وکړه او اوکراین ته پر لاره ول او د لومړنیو معلوماتو له مخې د اوکراین له لوري د دوی لپاره یوه لار چمتو شوې وه، چې د دولت له پولې تېر شي.

د روسيې د FSB ادارې ويلي، وسله‌والو له اوکراين سره اړيکې درلودې او له پولې سره نږدې نيول شوي دي. د رویټرز د راپور له مخې؛ دوی مسکو ته لېږدول شوي دي.

له دې مخکې د روسیې بهرنیو چارو وزارت ویاندې ماریا زخاروا ویلي وه، چې داعش د امریکا پر دښمنانو برید کوي.

Continue Reading

سیمه ییز خبرونه

په بلوچستان کې د پاکستان د بحري ځواک پر هوايي اډه وسلوال برید وشو

Published

on

(Last Updated On: وری ۷, ۱۴۰۳)

د پاکستان د بلوچستان ایالت په تربت ښار کې د پاکستان د بحري ځواکونو پر هوایي ډګر ډله‌ییز وسله‌وال برید شوی دی.

د پاکستان سیمه‌ییزو رسنیو د پاکستان د اړوند چارواکو د څرګندونو له مخې په ډاګه کړې؛ امنیتي ځواکونو د دوشنبې پر شپه د بلوچستان ایالت د بحري ځواکونو په یوه هوايي اډه کې شپږ وسلوال وژلي دي.

ډان ورځپاڼې د مکران د کمشنر سعید احمد عمراني د څرګندونو له مخې ویلي، چې د تربت هوايي ډګر په شاوخوا کې د ډزو او درندو چاودنو راپورونه ورکړ شوي دي.

نوموړي ویلي: وسله‌والو پر هوايي ډګر له درې خواوو څخه بريد وکړ؛ خو امنيتي ځواکونو سمدستي ځواب ورکړ او د هغوى د ورننوتلو هڅه يې شنډ کړه.

نوموړي د مرګ او ژوبلې په اړه کره شمېر څرګند نکړ؛ خو وایي، چې تر دې دمه د سیمې روغتون ته کوم مړى او ټپي ندى رسېدلى.

پي این ایس صدیقي، چې د پاکستان تر ټولو لویه بحري هوايي اډه ده؛ د برید موخه وه.

امنیتي چارواکو د دوشنبې پر شپه ویلي، د تربت هوايي ډګر له پولې بهر “شپږ ترهګر وژل شوي”، چې ورسره د اډې امنیت ډاډمن شوی دی.

هغه زیاته کړې: د حساسو بحري تاسیساتو د زیان راپور هم نلرو.

د سیمې خلکو ویلي؛ په تربت ښارګوټي کې د ۱۲ چاودنو غږونه اورېدل شوي او ډزې، چې د شپې له شاوخوا لس بجو پیل شوې د شپې تر ناوخته روانې وې.

د بلوچستان ازادي غوښتونکي اردو د دې برید پړه منلې ده.

Continue Reading

Trending

Copyright © 2022 Ariana News. All rights reserved!