تازه خبرونه
د کورنيو چارو وزارت: په بغلان کې مو د طالبانو سنګرونه له منځه وړي دي
د کورنیو چارو وزارت ټینګار کوي چې د ډڼد غوري سیمه کې د وسله والو طالبانو زیاتره سنګرونه له منځه تللي او افغان ځواکونه د وسله والو د ځپلو له پاره له ټولو امکاناتو استفاده کوي.
د کورنیو چارو وزارت ویاند وایي، امنیتي ځواکونه چمتو دي چې د جګړې په موسم کې هم له وسله والو سره پوره مبارزې ته پوره تیاری لري.په همدې حال کې ملي دفاع وزارت وایی، همدا اوس افغان ځواکونه په لسو ولایتونو کې له طالبانو سره په جګړه بوخت دي.
د بغلان ډنډ غوري سیمه کې اوس هم جګړه او تاوتریخوالی دوام لري او د هرې ورځې په تېرېدو سره د جګړې اور تودېږي. افغان ځواکونه وایي، د ډنډغوري په دوولس ورځنیو جګړو کې تر اوسه یوسل او نولس وسله وال وژل شوي او له سلو زیات وسله وال ټپیان شوي دي.
د کورنیو چارو وزارت ویاندصدیق صدیقي وايي: “د طالبانو ډېر سنګرونه له منځه وړل شوي، موږ له خپلو ټولو امکاناتو استفاده کوو، څو وکولای شو طالبان مات کړو.”
په وروستیو ۱۴کلونو کې دا لومړی ځل دی چې افغانستان په ژمي کې هم آرام نه پاتې کیږي او افغان ځواکونه په راتلونکي جنګي موسم کې هم ستونزمن ماموریت په مخ کې لري. دغه ځواکونه وایي، له طالبانو سره د مقابلې له پاره روان جنګي موسم کې هم بشپړ تیاری لري.
د ملي دفاع وزارت د ویاند مرستیالدولت وزیری وايي: “موږ په اوس ورځو کې له طالبانو سره په لسو ولايتونو کې په جګړه بوخت يو او دا عملیات به ادامه ولري.”
خو بغلان کې باور دا دی چې د ډنډ غوري سیمه کې د تفاهم لیک لاسلیک د طالبانو د پیاوړتیا سبب شو او باید د سرحدونو، قومونو او قبایلو وزیر چې دغه تفاهم لیک کې یې لاسلیک کړی، محاکمې ته را وکاږل شي.
د بغلان د ولایتي شورا غړی محمد ظریف ظریف وايي: “که د قومونو او سرحدونو وزير ګلاب منګل تفاهم ليک نه وای لاسلیک کړی نن ورځ به بغلان داسې يوه حالت ته نه رسېده، نو له همدې امله بايد چې د قومونو او قبایلو وزير څارنوالۍ ته معرفي شي.”
افغان ځواکونه له سخت وضعیت سره مخامخ دي، ناټو هم باور لري چې که افغان حکومت له طالبانو سره د سولې د خبرو د پیل له پاره هوکړې ته ونه رسېږي، راتلونکی پسرلی به له تېرو کلونو هم خونړی وي.
تازه خبرونه
ایران او پاکستان د افغانستان په اړه ګډه اعلامیه خپره کړه
ایران او پاکستان په یوه ګډه اعلامیه کې د یو سولهییز، متحد، خپلواک او له ترهګرۍ او نشهیي توکو قاچاق څخه د پاک افغانستان په اړه پخپلو ژمنو ټینګار څرګند کړی دی.
دواړو لوریو د ترهګریزو ډلو شتوالي ته په افغانستان کې نغوته کړې، چې سیمې او نړۍ ته امنیتي ګواښ دی؛ نو پر وړاندې یې پر مبارزه، همکارۍ او متحدې جبهې جوړولو ټینګار کړی دی.
دوی دغه راز د سیمې د امنیت او ثبات د ډاډمنولو لپاره د سیمهییزې او نړیوالې همغږۍ د اړتیاوو پر اهمیت خبرې کړې دي.
دواړه لوري د افغانستان حاکمیت او ځمکنۍ بشپړتیا ته د احترام کولو تر څنګ څرګندوي؛ د دې هېواد ټولې خواوې باید په بنسټیزو پرېکړو کې ونډه ولري، چې په هېواد کې د سولې او ثبات لامل شي.
تازه خبرونه
له ۱۰۰۰ ډېر افغان مهاجرین له پاکستان څخه جبري وایستل شول
د مهاجرینو چارو وزارت ویلي، چې د غویي پر څلورمه د سپین بولدک له فرضي کرښې څخه ۱۰۰۱ افغان مهاجرین پر جبري بڼه خپل هېواد ته راستانه شول.
د کندهار سپین بولدک سرحدي آمریت د راپور له مخې؛ ۱۹۱ کورنۍ، چې ۹۹۸ کسان دي او درې کسان نور، چې له بنده ازاد شوي؛ په جبري توګه له پاکستان څخه هېواد ته راستانه شول.
د مهاجرینو چارو وزارت د څرګندونو له مخې؛ د مهاجرینو چارو له ریاست سره له نوم لیکنې وروسته د نورو مرستو لپاره د ملګرو ملتونو عالي کمېشنرۍ، د مهاجرت او د خوړو نړیوالې ټولنې دفترونو ته ور وپېژندل شول.
دغه راز له ۱۸ کلونو کم عمره دوه کسان، چې بندیان ول د مرستې لپاره OMPO موسسې ته ور پېژندل شوي.
ویل کیږي، چې له هرې کورنۍ سره د حکومت له لوري لس – لس زره افغانۍ نغدي مرسته هم شوې ده.
تازه خبرونه
د ټرانسپورټ او هوايي چلند وزارت چارسمبالي د ازبکستان په شپږ اړخیزه غونډه کې ګډون وکړ
د ټرانسپورټ او هوايي چلند وزارت چارسمبالي حميدالله اخوندزاده پرون (سې شنبه د غویی څلورمه) د يوه پلاوي پر مشرۍ ازبکستان ته سفر کړی او د دې هېواد پر کوبتوب یې د افغانستان، روسيې، بېلاروس، پاکستان، قزاقستان او ازبکستان هېوادونو ترمنځ په شپږ اړخيزه غونډه کې ګډون وکړ.
د افغانستان پلاوي په دې کتنه کې د نورو هېوادونو له استازیو سره د افغانستان، روسيې، بېلاروس، پاکستان، قزاقستان او ازبکستان هېوادونو ترمنځ د شپږ اړخيز دهليز له لارې د راکړې ورکړې د پراختيا په اړه خبرې وکړې.
د ټرانسپورټ او هوايي چلند وزارت ويلي، چې د دې غونډې په څنډه کې د دغه وزارت چارسمبالي د روسیې او بلاروس د ټرانسپورټ له مرستیالانو سره هم وکتل.
دغه راز د ټرانسپورت او هوايي چلند وزارت چارسمبالي د روسيې او بېلاروس د ټرانسپورټ وزارتونو له مرستيالانو سره د افغانستان او روسيې، افغانستان او بېلاروس ترمنځ د ټرانزيټي لارو د پراختيا او د ټرانسپورټي اسانتياوو د برابرولو په اړه خبرې وکړې.
ویل کیږي، چې د ټرانسپورټ او هوايي چلند وزارت چارسمبالي د افغانستان په چارو کې د ازبکستان د ولسمشر ځانګړي استازي او د ټرانسپورټ له وزیر سره دوه اړخیزې ناستې کړي او د دواړو هېوادونو ترمنځ یې د ټرانزیټ پر پراختیا بحث او خبرې کړې دي.
-
تازه خبرونه2 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ4 days ago
د جاپان دوه پوځي چورلکې بحر ته وغورځېدې
-
نړۍ2 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
تازه خبرونه4 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
لوبی3 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
لوبی2 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
تازه خبرونه2 days ago
راشد خان د افغان بیسیم سوداګریز سفیر شو
-
سیمه ییز خبرونه3 days ago
د ایران ولسمشر پر درې ورځني سفر پاکستان ته ولاړ