Connect with us

تازه خبرونه

دولتي ادارې به سږ کال د خپلو پرمختیایي بوديجو ۴۶ سلنه او د عادي بوديجو ۸۱ سلنه ولګوي

خپور شوی

د

(Last Updated On: لړم ۳, ۱۴۰۱)

د مشرانو جرګې د بوديجې او مالي چارو کمیسیون وایي، دیارلس سوه دري نوي یم مالي کال کې دولتي بنسټونه په دې توانېدلي چې د خپلو پرمختیایی بوديجو شپږڅلویښت سلنه برخه ولګوي.

د دغه کمیسیون له خوا د دري نوي یم مالي کال قطعيه حسابونه له رسنیو او د مدني ټولنې له فعالانو سره شریک شول. د مشرانو جرګې ځینې غړي وایي، قطعيه د وزارتونو او ادارو د کارونو ارزونه او د هغوی د مالي بوديجو د لګښت رپوټ دی چې خلک باید د هغوی له کړنو خبر شي.

د مشرانو جرګې د مالي چارو او بوديجې کمیسیون د دري نوي یم مالي کال قطعیه حسابونه رسنیز کړل. کمیسیون وایی، په دغه کال کې دولتي ادارې په دې توانېدلي چې د خپلو پرمختیایي بوديجو شپږڅلویښت سلنه او د عادي بوديجو یو اتیا سلنه برخې ولګوي.

د مالي چارو او بودجې د کمیسیون رییسه انارکلي هنریار وايي چې قطیعه حسابونه کولای شي د خلکو او دولت تر منځ واټن را کم کړي او وزارتونه مکلف دي چې د خپلو کارونو په هکله خلکو ته معلومات ورکړي.

د مشرانو جرګې لومړی مرستیال او د مدني ټولنې فعالان له دولتي بنسټونو غواړي چې خپل کاري رپوټونه په وخت سره خلکو ته وړاندې کړي.

د مشرانو جرګې لومړی مرستیال محمد علم ایزد یار وايي چې قطعيه د وزارتونو او ځینو ادارو د کړنلارو او نیمګړتیاوو د څرګندولو او همدا شان د مثبتو بدلونونو د راوستلو لامل ګرځي او د ملي یووالې حکومت باید دې خبرې ته پاملرنه وکړي.

د مدني ټولنې غړی عبدالرحیم جامي وايي «له دولت غواړو چې په دې برخه کې مسلکي چلند وکړي او مونږ هم چمتو یو چې له دولتي ادارو سره د اړتیا په صورت کې همکاري وکړو.»

د دري نوي یم مالي کال قطعیه حسابونه د البا په پروژه کې وړاندې شول. البا د ملي شورا د ظرفیتونو په پیاوړتیا کار کوي. د دغې پروژې مسولین وایي، د فساد د له منځه وړلو لپاره اړینه ده چې دولتي ادارې د خپلو کړنو حساب ورکړي.

د البا پروژې مرستیال محمد یوسف غزنوي وايي: «که دولتي ادارې ونه شي کړای شي چې خپلې بوديجې ولګوي، لازمه ده چې پاتې پیسې ملي بودجې ته وسپاري، که داسې ونه شي، دوی به د قانون په چوکاټ کې چلند وکړي.

د افغانستان د پرمختیایي بوديجې ستره برخه په بهرنیو مرستو ولاړه ده، خو د دغو پیسو زیاته برخه هر کال پرته له دې چې مصرف شي، پاتې کېږي. مسولین د دغې ستونزې یو ستر علت ناامني او په دولتي ادارو کې ټیټ ظرفیتونه بولي.

خبريال: نبیله حفیظي

Advertisement

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!