Connect with us

تازه خبرونه

ترهگر په اسلامي نړۍ کې پرمختگ ټکنی کوي- اشرف غني

خپور شوی

د

(Last Updated On: لړم ۳, ۱۴۰۱)

RR

که څه هم ریکا یوه اقتصادي ناسته ده؛ خو په سیمه کې د ترهگرۍ له اړخه مخ پر زیاتېدونکي گواښونه او د کابل او اسلام آباد تر منځ په اړیکو کې ترینگلتیا د دې سبب شوې، چې د دې ناستې دوه یمه ورځ پر امنیتي او سیاسي مسایلو را وڅرخي.

ولسمشر اشرف غني په دې ناسته کې د آسیا لویه وچه د شخړو مرکز وباله او هیله یې وښوده، چې تر راتلونکیو پېنځه لسیزو آسیا د تاوتریخوالي او جگړې لیدونکې نه وي.

هغه وایي، د ترهگرو ستر هدف له پرمختگ څخه د اسلامي نړۍ را گرزول دي.

د نوموړي په وینا؛ د تاوتریخوالي شبکې او ترهگرغواړي اسلام یوه داسې مسیر ته بوځي، چې هلته پرمختگ دریدلی وي. د هغوی پیغام ناهیلي ده او غواړي ډاډمن شي، چې بې گناه کسان وژني او فرهنگي میراثونه له منځه وړي؛ ځکه، نو ترهگري نړۍ او سیمې ته گواښ دی.

ولسمشر ټینگار کوي، چې که څه هم افغانانو له ترهگرو څخه په سینه زیات ټپونه لیدلي؛ خو بیا هم د دغې پدیدې په وړاندې دریدلي دي.

هغه د ترهگرو له ملاتړ کوونکیو څخه یو لړغوښتنې هم لري:

مونږ څلویښت کاله ستونزې او مشکلات وگالل او اوس هم د ترهگرو په وړاندې ولاړ یو او مبارزه کوو. زمونږ پیغام هغو کسانو ته، چې له ترهگرو ملاتړ کوي دا دی؛ په گډه د گډ درک او همکارۍ پرلوري باید روغه جوړه وکړو.

د ایران د کورنیو چارو وزیر د افغانستان له پاره د سیمې د اقتصادي همکاریو په ناسته کې د نورو هېوادونو د استازیو خلاف خپلې خبرې د ترهگرو د مخ پر زیاتېدونکي گواښ په اړه پیل کړې.

هغه په سیمه او افغانستان کې د امنیت ټینگښت مهم گڼي.

د ایران د کورنیو چارو وزیر وایی، باید ترهگر په ښو او بدو ونه وېشل شي.

د ایران د کورنیو چارو وزیر رحمان فضلي په دې اند دی، چې د ترهگرۍ خلاف د مبارزې په لار کې ډېر فرصتونه شته.

د هند د بهرنیو چارو وزارت استازې سوجاتامیهتاهم د ریکا په ناسته کې د خبرو پر مهال وویل؛ تر هغې، چې د ترهگرۍ له اړخه شته گواښونه له منځه تللي نه وي، د سیمې د پروگرامونو تطبیق ناممکن دی.

هغه وایي، مونږ به تر هغې سیمه ییزې پروژې تطبیق نه کړای شو، چې په افغانستان کې مو ترهگرۍ او افراطیت ته ماتې ورکړې نه وي. باید د دغې پدیدې په وړاندې گډه مبارزه وکړو.

د طالبانو د رژیم له پرځیدو وروسته د افغانستان په اړه ډېرې ناستې وشوې؛ په دغو نړیوالو ناستو کې، چې اقتصادي هم په کې راځي، له افغانستان سره په همکاریو او مرستو ټینگار شوی دي.

د کارپوهانو په وینا؛ افغان دولت ونه کړای شو، چې له دغو ناستو څخه ملي گټه واخلي او هغه فرصتونه یې هم له لاسه ورکړل، چې ځانبسیاینې ته د رسیدو له پاره را منځته شوي وه.

خبریال: فواد ناصري.

Advertisement

تازه خبرونه

تېر ۲۰۲۳ کال د افغانستان د خلکو لپاره د سترو ننګونو کال و -راپور

Published

on

(Last Updated On: وری ۳۰, ۱۴۰۳)

په ۲۰۲۴ کال کې به د افغانستان شاوخوا ۱۵ اعشاریه ۸ میلیون خلک د خوړو د خوندیتوب له بحران او بېړنۍ کچې سره مخ شي.

 په افغانستان کې د ملګرو ملتونو ټولنې د ۲۰۲۳ کال د پایلو په کلني راپور کې ویلي، چې په افغانستان کې میلیونونه وګړي له لوږې او خوارځواکۍ سره مخ دي، چې ډېري یې خپلې لومړنۍ اړتیاوې پوره کولی نشي.

ملګرو ملتونو څرګنده کړې، چې بشري ناورین په ۲۰۲۳ کال کې هم دوام درلود او دغه هېواد یوه لسیزه شاه تګ کړی او دا مهال د افغانستان نیمايي وګړي په بې وزلۍ کې ژوند کوي.

د اقتصاد وزارت مسلکي مرستیال عبداللطیف نظري له افغانانو سره د بشري مرستو پر اړتیا ټینګار کوي او زیاتوي، چې دغه وزارت په هېواد کې د فقر او لوږې د ختمولو لپاره مناسب پلانونه لري.

ملګرو ملتونو په راپور کې راغلي، چې له ۲۰۲۱ کال راپدیخوا د اقتصادي تولیداتو کچه یو پر څلورمه راټیټه شوې او د نړیوال بانک د راپور له مخې دا مهال د افغانستان نیمايي نفوس په بې‌وزلۍ کې ژوند کوي.

دا په داسې حال کې ده، چې ملګرو ملتونو اندېښنه ښودلې او څرګندوي؛ دوی له افغانستان سره د مرستو د دوام لپاره د بودجې له کمښت سره مخ دي.

Continue Reading

تازه خبرونه

ملګرو ملتونو تېر کال په افغانستان کې د اوبو ۴۷۰ کیلومټره کانالونه جوړ کړل

Published

on

(Last Updated On: وری ۳۰, ۱۴۰۳)

د خوړو نړيوال پروګرام ویلي، چې تېر کال يې په افغانستان کې د سيمه‌ييزو ټولنو پر همکارۍ د شاوخوا ٤٧٠ کيلومټرو پر اوږدوالي د اوبو کانالونه جوړ کړي دي.

د دې پروګرام د افغانستان برخې د چارشنبې پر ورځ (د وري نهه‌ویشتمه ) په ایکس پاڼه کې لیکلي؛ په افغانستان کې کروندګر اوبو ته له لاسرسي پرته خپل ژوند روان ساتلی نشي.

دغه راز څرګنده شوې؛ د اوبو کانالونو له کروندګرو سره مرسته کړې، چې خپلو کورنیو ته خواړه برابر کړي او خپل اضافي تولیدات او محصولات وپلوري.

د خصوصي سکتورغړي هم  وايي؛ د خوړو نړیوال پروګرام له‌خوا په هېواد کې د اوبو د مدیریت لپاره د کانالونو له جوړولو هرکلی کوي او څرګندوي، چې د هېواد د اوبو مدیریت کولی شي افغانستان  له فقر او اقتصادي بحران څخه وژغوري.

دا په داسې حال کې ده، چې له څو کلونو وچکالۍ وروسته؛ وروستیو اورښتونو د افغانستان کروندګر هیله من کړي، چې راتلونکی کال به ښه حاصلات ولري.

Continue Reading

تازه خبرونه

په بیجینګ کې د چین او افغانستان درېیمه اقتصادي ناسته تر سره شوه  

Published

on

(Last Updated On: وری ۳۰, ۱۴۰۳)

په بیجينګ کې د افغانستان اسلامي امارت او د چين ولسي جمهوريت د بهرنيو چارو وزارتونو د اړوند سياسي څانګو پر مشرۍ د بشري مرستو او اقتصادي بيارغونې پر ميکانيزمونو درېيمه ناسته ترسره شوه.

د افغانستان بهرنیو چارو وزارت ویاند عبدالقهار بلخي په ایکس پاڼه کې لیکلي، چې په دې ناسته کې د افغانستان د بهرنيو چارو وزارت پر استازیو سربېره د صنعت او سوداګرۍ، کانونو او پټروليم، د کډوالو او بېرته راستنېدونکیو چارو او د طبيعي پېښو پر وړاندې د امارت وزارت استازو ګډون کړی و.

دغه راز په دې ناسته کې د چين د سوداګرۍ، طبيعي سرچينو، د چين نړيوالې پراختيايي ادارې او نړيوالې همکارۍ ادارو استازو هم برخه اخیستې وه.

د بهرنیو چارو وزارت د څرګندونو له مخې؛ په دې ناسته کې له تېرو دوه نيمو کلونو راپدیخوا د طبيعي پېښو، جبري راستانه شویو کډوالو او روغتيا په برخه کې د مرستو پر میکانیزمونو بیا کتنه وشوه.

 افغان پلاوي د چين د مرستو د ګټورتوب لپاره خپل وړانديزونه او سلا مشورې چينايي اړوند لوري ته وړاندې کړل.

چينايي لوري ژمنه کړې، چې له افغانستان سره به د چين بشري مرستې د افغان لوري د اړتياوو او لومړيتوبونو له پام کې نيولو سره تنظيم کړي. دغه راز به له افغانستان سره د جبري راستانه شویو کډوالو د مېشتېدو په برخه کې د چين د سل میلیون يوانو په مرستو کې د افغان لوري وړانديزونه هم په پام کې ونيول شي.

د چين سره صليب ټولنې ژمنه کړې، چې په چين کې به د افغان ماشومانو د زړه ناروغيو د درملنې د بيا پيل زمينه هم برابره کړي.

د عبدالقهار بلخي د څرګندونو له مخې؛ د افغانستان د اقتصادي بيارغونې ميکانيزم په چوکاټ کې د دواړو هېوادونو ترمنځ د سوداګرۍ پر زياتوالي په ځانګړي توګه چين ته د زیاتو افغان توکو د صادرولو د زمينې برابرولو، وړتیا لوړونې او په افغانستان کې د کانونو او معاصرې سوداګرۍ په برخه کې د چين د پانګونې د فرصتونو په اړه هر اړخیزې خبرې وشوې.

دواړو لوريو چين ته د افغانستان د جلغوزو له صادراتو وروسته د انارو د صادراتو زمينې د برابرولو د هرکلی ترڅنګ په افغانستان کې د نفتو د استخراج کچې لوړولو او د لوګر مس عینک کان د استخراج د پيلولو په برخه کې د وروستيو پرمختګونو په اړه خبرې وکړې او ټينګار وشو، چې د چارو د چټکتيا پر طرحو به غور وشي.

افغان لوري د چين پر ملاتړ د افغانستان د حکومت په ګڼو وزارتونو او ادارو کې د ملکي مامورينو د وړتیا لوړونې لپاره له روزنيزو پروګرامونو او افغانانو ته د سکالرشپونو د لړۍ له پراخولو هرکلی وکړ.

ویل کیږي، چې په دې ناسته کې د واخان اقتصادي دهلیز د اهميت او احتمالي ګټو او د دې کوريډور د پرانيستو پر امکاناتو هم بحثونه شوي دي.

Continue Reading

Trending

Copyright © 2022 Ariana News. All rights reserved!