په کابل کې د لوړ پوړو چارواکو د ساتنې د امنیت په ریاست موټر بم او ډله ییز برید د غندنو په ترڅ کې، د ملګرو ملتونو د امنیت شورا، سپینې ماڼۍ، د امریکا د بهرنیو چارو وزارت، اروپايي ټولنې، ناټو او د پاکستان لومړي وزیر هم دغه خونړی برید په کلکو ټکو غندلی دی.

د ملګرو ملتونو د امنیت شورا په افغانستان کې د هغو ګواښونو په هکله جدي اندېښنه ښودلې چې افغان ځواکونه او ولسي وګړي د وسله والو طالبانو، القاعدې او داعش لخوا ورسره مخامخ دي. اروپايي ټولنې ویلي چې د کابل برید په ډاګه کړه چې هلته امنیتي حالت څومره ترینګلی دی. امریکا بیا ویلي چې له افغانانو سره به خپلو همکاریو ته دوام ورکوي.

د افغانستان ولسمشرۍ ماڼۍ او ملي دفاع وزارت ته نږدې د وسله والو طالبانو خونړيبرید نړیوال غبرګونونه را پارولي دي. د ملګرو ملتونو د امنیت شورا دا برید غندلی او ویلي یې دي چې نړیوال باید د دغه سازمان منشور او نړیوالو مکلفیتونو ته په کتو د نړۍ د ثبات او له ترهګرۍ سره د مبارزې له پاره هڅې وکړي.

د اروپايي ټولنې د بهرني سیاست مسولې فدریکا موګریني د کابل برید ته په اشارې ویلي چې په افغانستان کې حالات څومره ترینګلي او ماتېدونکي دي.

د اروپايي ټولنې د بهرني سیاست مسولې فدریکا موګریني وايي: “د کابل برید مونږ ته وښوده چې هلته امنیتي حالت څومره ټکنی دی او دا مونږ ته را په یادوي چې هلته له څومره انرژۍ او کډ کار ته اړتیا ده چې افغان رهبري د خپل هېواد د ثبات او اقتصادي ودې جوګه شي.”

له بلې خوا سپینې ماڼۍ او د امریکا د بهرنیو چارو وزارت ویلي چې طالبان باید د ملکي خلکو د وژنې په ځای د سولې لاره غوره کړي.

د سپیڼې ماڼۍ ویاند جورج ارنس وايي: “امریکا په افغان ځواکونو او ملکیانو دغه ناځوانمردانه برید غندي. د جګړې د فصل په پیل سره مونږ له افغانانو سره همکاریو ته دوام ورکوو چې له ترهګرۍ سره مبارزه وکړي. مونږ طالبانو ته وایو چې د جګړې په ځای چې د ملکي کسانو د وژنې لامل کېږي، د سولې لاره غوره کړي.”

د امریکا د بهرنیو چارو وزارت ویاند جان کربي وايي: “دا ډول بریدونه مونږ لا هڅوي چې له افغانانو سره مرسته وکړو ترڅو په خپل هېواد کې سوله او ثبات راولي. مونږ ډاډه یو چې د افغانانو په رهبرۍ به د سولې هڅې بریالۍ شي. طالبان باید د سولې لاره غوره کړي.”

د امریکا د بهرنیو چارو وزارت ویلي چې د افغانستان وضعیت به د اوباما د ځای ناستي د ټاکل کېدو له پاره د پام وړ موضوع وي.

د پاکستان لومړي وزیر افغان ولسمشر ته د یوه پیغام په استولو سره دا برید وحشیانه او ناوړه بللی او په کلکو ټکو یې غندلی دی.

د پاکستان لومړی وزیر نواز شریف وايي: “دا ډول بریدونه مونږ ته دا راښيي چې ترهګري د سیمي او هېوادونو د ثبات له پاره څومره لوی ګواښ دی. لهدغه ډول خطرونو او ګواښونو سره مبارزې ته غښتلې اراده او ګډې هڅې په کار دي.”

په افغانستان کې د ناټو د غوڅ ملاتړ ماموریت هم دا برید غندلی دی. د دغه ماموریت امریکايي قومندان ویلي چې وسله وال له افغان ځواکونو سره د مخامخ جګړې توان له لاسه ورکړی او دا ډول بریدونه کوي.