د نیویارک تایمز ورځپاڼې د څرګندونو له مخې؛  د امريکا ولسمشر دونالد ترمپ خپلو ديپلوماتانو ته سپارښتنه کړې، چې له طالبانو سره دې د مخامخ خبرو زمینه برابره کړي.

ورځپاڼه د امريکا په پاليسۍ کې دا يو ارزښتمن بدلون ښيي او لیکي؛ افغان او امریکایي چارواکو درک کړې، چې  طالبان پخپل دريځ کلک ولاړ دي او باید امریکا مخامخ خبرو ته چمتو شي.

د ورځپاڼې په باور؛ د دغه ستراتیژیک بدلون په پایله کې د طالبانو او امریکا دریځونه یو تر بله نږدې شوي او د خبرو خنډ به هم له منځه لیرې شي.

له دې مخکې د امریکا ټینګار دا و، چې د سولې خبرې دې د افغان حکومت پر مشرۍ ترسره شي؛ خو د ترمپ ستراتیژۍ د طالبانو د پرمختګونو په مخنیوي کې د پاموړ بدلون نه دی راوستی.

ورځپاڼې دا هم په ډاګه کړې؛ که څه هم تراوسه د مذاکراتو نېټه نه ده ټاکل شوې او اوس هم دا اندېښنه شته، چې د ترمپ په تګلاره کې بدلون راشي.

له طالبانو سره مستقیمو مذاکراتو ته د امریکا چمتووالی ښیي، چې سپينه ماڼۍ غواړي نور په افغانستان کې له په ټپه ولا حالته راووځي.

ورځپاڼه لیکي؛ له طالبانو سره د مذاکراتو پرېکړه دا معنا نلري، چې طالبان دې د ملي وحدت حکومت ځایناستي شي، بلکې د جګړې پای ته رسول موخه ده.

نیویارک تایمز دا هم لیکلي، چې دا پرېکړه تېره میاشت د ترمپ د امنیتي سلاکارانو لخوا رامنځته شوې او د امریکا د بهرنیو چارو استازیو هم سیمې ته سفرونه کړي دي.

په افغانستان کې د نړيوالو ځواکونو عمومي قومندان جنرال جان نيکلسن د دوشنبې پر ورځ په افغانستان کې د ۷ هېوادونو له سفيرانو او افغان دفاع وزير طارق شاه بهرامي سره کندهار ته د خپل سفر پر مهال يوې غونډي ته په وينا کې ویلي، چې د امریکا حکومت له دې وروسته افغان طالبانو سره د سولې د مخامخ خبرو لپاره هڅه کوي.

نوموړي زیاته کړې؛ که طالبان د جنګ لاره انتخاب کړې؛ دوی به یې د ځپلو لپاره د افغان حکومت سره په ګډه اقدام وکړي.

په ورته وخت کې د ملي دفاع وزير طارق شاه بهرامي هم  کندهار ته په سفر کې ویلي، چې دوی د وسلوالو ډلو په وړاندې د پوځي عملياتو ترڅنګ د هغو وسلوالو سره د سولي هڅي مخته وړي، چې له جګړې لاس اخلي.

بهرامي زیاته کړې؛ د نړيوالي ټولني په مرسته توانیدلي، چې په سیاسي برخه کي خپل مهم ګاونډی ډډې ته کړي.

پخواني طالب سید اکبر آغا آریانا نیوز ته په ډاګه کړې؛ طالبان وایي: مونږ پر حکومت باور نلرو، ځکه بهرنیان دلته ډېر واک لري او له بهرنیانو سره نېغ په نېغه خبرې کوو. همدوی جنګ پیل کړی او له دوی سره خبرې کوو.

د افغانستان د سولې عالی شورا ویاند سید احسان الله طاهري ویلي، چې: امریکا له طالبانو سره د افغان حکومت د خبرو ګړندي کولو لپاره دا کار کړی دی؛ ځکه، چې افغان حکومت د امریکا په ګډون له ټولو نړیوالو همکارانو څخه د سولې د رامنځته کولو غوښتنه کړې ده.

د حراست او ثبات شورا ویاند مسعود تراشوال وایي، چې د ښکېلو خواوو په جګړه کې بهرنیان ښکېل شوي او د سولې ډګر ته دې هم راودانګي.  

طالبانو تېر کال د امريکا ولس ته په يوه ليک کې له دوی سره د مخامخ خبرو پېلولو غوښتنه کړې وه. دغه راز تېره مياشت يې هم د يوې خبرپاڼې په خپرولو سره دغه غوښتنه  تکرار کړې وه؛ خو اوس یې د دغو تازه څرګندونو په اړه تر دې دمه  څه نه دي ویلي.

د اوباما د واکمنۍ پرمهال هم امریکا له طالبانو سره مخامخ مذاکراتو ته چمتووالی ښودلی و او طالبانو په همدې موخه په قطر کې خپل سیاسي دفتر پرانیست؛ خو د وخت ولسمشر حامد کرزي د یادې اندېښنې له کبله د امریکا او طالب د مذاکراتو مخالفت وکړ او د سولې هڅې له پیل مخکې په ټپه ودریدې.

اوس له طالبانو سره د نېغ په نېغه خبرو سپارښتنه په داسې حال کې په ډاګه شوې، چې د افغانستان د ۹ شمالي ولایتونو ملکي او بهرنۍ ادارې د تړلو له ګواښ سره مخ دي.