تازه خبرونه
اجرائیه رییس عبدالله د شانګهای په دوه ورځنۍ سرمشریزه کې د ګډون لپاره ازبکستان ته رسیدلی
د ملي وحدت حکومت اجرائیه رییس عبدالله عبدالله نن(جمعه د لړم ۱۰) د شانګهای د همکاریو سازمان په ۱۸ سرمشریزه کې د ګډون لپاره د ازبکستان پلازمېنې تاشکند ته رسیدلی او د دې ناستې په څنډو کې یې د دغو هېوادونو له یو شمېر مشرانو سره لیدلي دي.
ښاغلي عبدالله د یادې سرمشریزې په څنډه کې د تاجکستان له لومړي وزیر قاهر رسول زاده، د ایران د ولسمشر لومړي مرستیال اسحاق جهانګیري او د قزاقستان له لومړي وزیر عسکرمامین سره کتلي دي.
د تاجکستان لومړي وزیر رسول زاده له اجرائیه رییس سره په کتنه کې څرګنده کړې، چې په افغانستان کې سوله او ډېر ارزښت لري.
نوموړي زیاته کړې، چې ترانزیت ، د انرژۍ لیږد او د لویې کچې د سیمه ییزو پلانونو لکه کاسا زر پلي کول د افغانستان له امنیت سره تړاو لري.
ښاغلي عبدالله عبدالله ویلي، چې تاجکستان د افغانستان یو له ستراتیژیک ملګرو او متحدینو څخه دی.
دغه راز د ایران د ولسمشر مرستیال اسحاق جهانګیري له ښاغلي عبدالله سره د لیدو پرمهال د ولسمشرۍ ټاکنې په افغانستان کې د ولسواکۍ او ثبات د ټینګښت پر لوري ډاډمن ګام ونومولې او وایي، چې هېواد به یې له هغه حکومت سره نږدې کار روان وساتي، چې د ټاکنو په پایله کې رامنځته کیږي.
نوموړي زیاته کړه، چې هېواد یې د افغانانو په مشرۍ او مالکیت د سولې له خبرو ملاتړ کوي.
هغه له تروریزم سره په ځانګړي توګه له داعش سره د سیمې هېوادونو په ځانګړي توګه ایران او افغانستان پر ګډې مبارزې هم ټینګار څرګند کړ.
همدارنګه اجرائیه رییس د قزاقستان له لومړي وزیر عسکرمامین سره په کتنه کې د هېواد پر ولسمشریزو ټاکنو، د سولې پر بهیر او دوه اړخیزو همکاریو خبرې اترې کړې دي.
نوموړي زیاته کړې، چې هېواد یې د کرنې، صنعت او کانونو په برخه کې له افغانستان سره همکارۍ ته چمتو دی.
د شانګهای همکارۍ سازمان د اړوند هېوادونو حکومتي سرمشریزه ده، چې دوه ورځې به په تاشکند کې روانه وي.
په دې سرمشریزه کې د شانګهای همکاریو سازمان حکومتي مشران د سیمه ییز سیاسي- امنیتي پرمختګونو، اقتصادي همکاریو، ګډو پانګونو، پراختیا، د تروریزم پرضد مبارزه، افراطیت او سیمه ییزو ننګونو په اړه بحث او خبرې کوي.
د شانګهای همکارۍ سازمان په ۲۰۰۱ کال کې جوړ شوی، چې دا مهال یې چین، روسیه، هند، پاکستان، تاجکستان، ازبکستان، قزاقستان او قرغزستان یې غړي هېوادونه دي؛ افغانستان، ایران، بېلاروس او منګولیا څارونکي غړي دي.
تازه خبرونه
په تېر یو کال کې د افغان ښځو حقونو وضعیت نور هم خراب شو- امریکا
د امریکا بهرنیو چارو وزارت د بشري حقونو په اړه په خپل کلني راپور کې څرګنده کړې، چې د افغان ښځو حقونو وضعیت په ۲۰۲۳ ز. کال کې د ښځو پر وړاندې د محدودیتونو د لګولو له کبله ډېر خراب شوی دی.
وژنې، فزیکي ناوړه ګټه اخیستنه، د زندان سخت شرایط، ناحقه توقیف او اختطاف، د بیان او رسنیو ازادي، د انټرنیټ کارولو او سیاسي مشارکت ازادیو بندیزونو لګولو په ګډون اداري فساد او پوځي څانګې ته د ماشومانو استخدام د بشري حقونو هغه موضوعګانې دي، چې په دې راپور کې ورته نغوته شوې ده.
په دې راپور کې راغلي، چې اسلامي امارت په رسمي ډول د جمهوري پېر په قوانینو کې بدلون ندی راوستی؛ خو داسې فرمانونه یې صادر کړي، چې د نړیوالو کنوانسیونونو له قوانینو او مکلفیتونو سره، چې افغانستان یې ژمنه کړي په ټکر کې دي.
د امریکا بهرنیو چارو وزیر انټوني بلینکن ویلي، چې په افغانستان کې د ښځو او نجونو لپاره کاري او تعلیمي فرصتونه محدود دي او د غیر اخلاقي کړنو پر تور د ښځو او نرینهوو په وهلو ټکولو کې زیاتوالی راغلی دی.
د اسلامي امارت ویاند ذبیح الله مجاهد له بشري حقونو څخه د سرغړونې په اړه د امریکا بهرنیو چارو وزارت د راپور په غبرګون کې ويلي، چې د افغانستان خلک ټول مسلمانان دي او حقوق یې د اسلامي شریعت له مخې تعریف شوي او ورکړ شوي دي. په امریکا او نورو لویدیځو هېوادونو کې تعریف شوي بشري حقونه او کلتور له افغانستان سره توپیر لري او لویدیځوال باید خپل کلتور پر نورو هېوادونو ونهتپي.
تازه خبرونه
وروستیو سیلابونو په افغانستان کې ۱۵۰۰ کورنیو ته زیانونه رسولي
د مرستو رسولو اسلامیک ریلیف ټولنې څرګنده کړې، چې د تېرې اوونۍ بارانونو او سېلابونو په افغانستان کې مالي او ځاني زیانونو اړولي دي.
د دې ټولنې په راپور کې راغلي، چې د وروستیو سېلابونو له کبله شاوخوا ۱۵۰۰ کورنۍ زیانمنې شوي او سلګونه څاروي هم له منځه تللي دي.
اسلامیک ریلیف ټولنې زیاته کړې، چې د وروستیو اورښتونو په پایله کې ۹۰۰ کورونه جزوي او یا بشپړ ویجاړ شوي او ۹۳ زره هکټاره کرنیزه ځمکه زیانمنه شوې ده.
په داسې حال کې، چې په دې وروستیو ورځو کې سختو بارانونو او سیلابونو د افغانستان خلکو ته ځاني او مالي زیانونه اړولي دي، د نړیوالو مرستندویه موسسو د راپورونو پر بنسټ افغانستان له بېسارې بېوزلۍ او اقتصادي بحران سره مخ دی.
دا په داسې حال کې ده، چې له دې مخکې له پېښو سره د مبارزې وزارت ویلي وه، چې په دغو پېښو کې ۹۹ کسان وژل شوي او ۶۴ نور ټپیان دي.
تازه خبرونه
امریکا به افغانستان ته ورته په اوکراین کې هم له شرمېدلې ماتې سره مخ شي – روسیه
د روسیې بهرنیو چارو وزارت ویلي، چې امریکا به افغانستان او ویټنام ته ورته په اوکراین کې هم له شرمېدلې ماتې سره مخ شي.
د رویټرز د څرګندونو له مخې؛ د روسیې بهرنیو چارو وزارت ویاندې ماریا زاخارووا د یکشنبې پر ورځ ویلي: د روسیې پر وړاندې په ګډه جګړه کې ورځ تر بلې د واشنګټن ډوبېدا به ویټنام او افغانستان ته ورته د امریکا لپاره پر یوه لویه او شرمېدلې ماتې بدله شي.
هغې زیاته کړې، چې امریکا غواړي اوکرایین تر پایه وجنګېږي.
زاخارووا ویلي، چې روسیه به د اوکراین په جګړه کې د نورې ډېرې لاسوهنې لپاره د امریکا د کړنو پر وړاندې له قید او شرط پرته پرېکنده ځواب ورکړي.
امریکا د ۱۹۷۵ او ۱۹۹۵ کلونو ترمنځ د ویټنام په جګړه کې له ۵۸ زره څخه ډېر نظاميان له لاسه ورکړل، چې د کمونیسټ پلوه شمالي ویټنام پر بریا او په سویل کې د هغې د واکمنۍ له پای ته رسېدو سره پای ته ورسېده. په دې جګړه کې سلګونه زره ملکي وګړي ووژل شول.
په افغانستان کې هم امریکا د ۲۰۰۱ او۲۰۲۱ کلونو تر منځ ۲ زره ۴۵۹ سرتېري له لاسه ورکړل او له ۲۰ زره ډېر نور یې ټپیان شول.
-
لوبی5 days ago
د افغانستان فوټسال ملي لوبډلې له ایران ماتې وخوړه
-
نړۍ2 days ago
د جاپان دوه پوځي چورلکې بحر ته وغورځېدې
-
تازه خبرونه2 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
لوبی1 day ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
تازه خبرونه5 days ago
تېر ۲۰۲۳ کال د افغانستان د خلکو لپاره د سترو ننګونو کال و -راپور
-
تازه خبرونه2 days ago
چینایي سوداګر کابل ته د پنجشېر اوبو لیږدولو په پروژه کې پانګونې ته لیوالتیا لري
-
سیمه ییز خبرونه22 hours ago
د ایران ولسمشر پر درې ورځني سفر پاکستان ته ولاړ
-
تازه خبرونه6 hours ago
وروستیو سیلابونو په افغانستان کې ۱۵۰۰ کورنیو ته زیانونه رسولي