Connect with us

تازه خبرونه

آی اس آی طالب مشر ته د ۵۰ لوړپوړيو طالبانو د وژنې امر کړی

خپور شوی

د

(Last Updated On: لړم ۲, ۱۴۰۱)

taliban-chief

د پاکستان استخباراتي سازمان یا آی اس آی طالب مشر ملا هبت الله ته امر کړی، چې د طالبانو پنځوس جګپوړي غړي ووژني.

ځینو سرچینو آریانا نیوز ته  ویلي؛ آی اس آی د طالبانو د پنځوس غړیو نوملړ د دې ډلې مشر ملا هبت الله ته سپارلی، چې لومړی دا کسان له دندو ګوښه او بیا ووژني.

د سرچینې په وینا، ملا هبت الله د آی اس آی دې وړاندیز ته هرکلی ویلی او په وروستیو کې یې د شپاړس ولایتونو لپاره د طالبانو والیان له دندو ګوښه کړي دي.

د سرچینې د څرګندونو له مخې؛ ګوښه شوي والیان د آی آس آی  په نوملړ کې راغلي،  چې باید ووژل شي.

د آی اس آی د دې امر له مخې؛ په زابل کې د طالبانو اکمالاتي مسوول قاضي سیف الله هم د پاکستان په کوټې ښار کې د ملا هبت الله د سلاکار په امر وژل شوی دی.

د کورنیو چارو وزارت ویاندصدیق صدیقي وایي، د طالبانوتر منځ اختلافات شته او له روسیې سره اړیکې کیدی شي اختلاف پاروونکې وي.

د نوموړي په وینا؛ د طالبان اختلافونه، تضادونه او مالي ستونزې هم لري.       

د سرچینې د معلوماتو له مخې؛ آی اس آی د طالبانو هغه مشران وژني، چې نورو هېوادونو ته نږدې شوي دي.

پوځي کارپوهانو په ډاګه کړې، چې له دغه کاره د پاکستان موخه طالبان تر بشپړ مدیریت لاندې راوستل دي.

پوځي کارپوه عتیق الله امرخېل وایي، پاکستان له روسیې او ایران سره د طالبانو له اړیکې خوښ نه دی او غواړي ټول طالبانو تر خپل واک لاندې وساتي.

د هغه په وینا؛ دغه کار یرغلګرو او نیواکګرو هېوادونو ته یو اصل دی.

رپوتونه وایي، چې له ایران سره د هلمند لپاره د طالبانو د والي له اړیکې وروسته د ملا منان  اړیکه له ملا هبت الله سره کړکیچنه شوې ده.

د طالبانو پخواني غړي وایي، چې د دې لوبې موخه په افغانستان کې راتلونکی جنګي موسم دی، چې نور به هم خونړی شي.

پخوانی طالب قومندان سید اکبر آغا وایي، ګوښه کول او ګومارل یوه عادي خبره ده؛ زه کومه نوې خبره په دې کې نه وینم.

د نوموړي په وینا؛ د سولې هڅې نشته او طبعیي ده، چې د جګړو لمن به په نوي کال کې نوره هم وغزیږي.      

په پاکستان کې د ملا عمر د مړینې د خبر له خپریدو وروسته د طالبانو په ډله کې اختلافونه ډېر شول او دا ډله پر برخو ووېشل شوه؛ مخالفتونه حتا د طالبانو تر ټیتې پوړۍ هم ورسیدل او  ملا عمر ته وفاداره قومندانان د هغه ځای ناستې ته تابع پاتې نه شول او د طالبانو د بلې ډلې ملا رسول له مشرتابه سره یې بیعت  وکړ.

خبریال باعث حیات

 

Advertisement

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!