سیمه ییز خبرونه
آذربايجان افغان سوداگرو ته د ترانزيتي توكو د كوربتوب ډاډ څرگند كړ
د آذربايجان د گمرك لوړ پوړي چارواكي وايي:
د دغه هېواد حكومت چمتو دى، چې له افغانستان سره همكاري ډېره كړي.
دوى وايي:
آذربايجان د آسيا او اروپا د اقتصادي اړيكو مركز دى او تل به د افغانستان د ترانزيتي او سوداگريزو توكو پرمخ پرانيستى وي.
د افغانستان ماليې وزارت هم له دغه هېواد سره د گمركي او سوداگريزو توكو د زياتوالي غوښتنه كوي.
د آذربايجان د گمركونو د عمومي رييس او د دغه هېواد د ولسمشر د سلاكار په مشرۍ يو پلاوى كابل ته راغلى، چې د افغانستان گمركونه له نږدې وگوري.
ويل كيږي، چې د دې سفر اصلي موخه د سوداگرۍ او گمركونو په برخوكې له افغان چارواكو سره د همكارۍ د زياتوالي په اړه خبرې دي.
د آذربايجان د گمركونو عمومي كميتې رييس آيدين علي اف وايي:
د وريښمو د لارې د بيا فعالولو په برخه كې هڅې د دغه هېواد د حكومت يو لومړيتوب دى، چې له نيكه مرغه افغانستان هم كولى شي له دې لارې گټه پورته كړي.
ښاغلى آيدين علي اف څرگنده كړه، چې:
آذربايجان نه يوازې په اقتصادي برخه كې د همكارۍ زياتولو ته چمتو دى، بلكې غواړي له افغانستان سره په نورو برخو كې هم نږدې همكاري وكړي. زموږ سړكونه د دې توان لري، چې د افغانستان سوداگريز او ترانزيتي توكي اروپا او له هغه ځاى څخه افغانستان ته وليږدوي او د سيمې د نورو هېوادونو په پرتله زموږ گمركي آسانتياوې هم غوره او هم له اروپا سره د نښليدو په برخه كې د افغانستان لپاره لنډه لار ده.
د افغانستان ماليې وزارت د گمركونو مرستيال سيد مبين شاه د افغانستان په اړه د آذربايجان حكومت له اقتصادي سياست هركلى كوي او وايي:
په نږدې وخت كې به افغان ولسمشر تركمنستان ته سفر وكړي او د دې لارې د رسمي پرانيستو په موخه به هم خبرې وكړي.
ښاغلى سيد مبين شاه وايي:
په تېره يوه لسيزه كې د هغو ژمنو له مخې، چې د نړۍ او سيمې د هېوادونو په وړاندې يې لرو زموږ گمركونه هم په منل شويو معيارونو د برابريدو لپاره چمتو كيږي.
په همدې وخت كې آذربايجان د كابل په هوايي ډگر كې د سوداگرو او مسافرو د پوهاوي لپاره دوه دستگاوې ودرولې. دا دستگاوې له مسافرو اوسوداگرو سره په دې برخه كې مرسته كوي، چې پوه شي څه ډول د خپلو سوداگريزو توكو ماليه او گمركي محصول ماليې وزارت ته وسپاري.
ماليې وزارت وايي دا لومړى ځل دى، چې د بشپړو معلوماتو لرونكې دا ډول دستگاه د افغانستان د گمركونو په يوه څانگه كې درول كيږي.
سیمه ییز خبرونه
امریکا دې د بشري حقونو په اړه دوه ګوني سیاست ودروي – ترکیه
د رویټرز خبري آژانس د راپور له مخې؛ ترکیې د چارشنبې پر ورځ امریکا تورنه کړې، چې د بشري حقونو په اړه دوه ګونی سیاست پالي او وایي، چې واشنګټن د بشري حقونو کلنی راپور په غزه کې د اسرائیلو د بریدونو په غندلو کې پاتې راغلی دی.
د ترکیې د بهرنیو چارو وزارت په خبرپاڼه کې راغلي، چې د امریکا دې کلني راپور په غزه کې روان غیر انساني بریدونه په سمه توګه راځلولي ندي. دا راپور پر سیاسي انګیزو له بې طرفۍ او معقولیت څخه لرې چمتو شوی دی.
ترکیې له واشنګټن وغوښتل، چې د بشري حقونو په اړه دوه ګونی سیاست ودروي.
دغه راز په دې راپور کې د سوریې له کردي ملیشې سره د امریکا اړیکو ته هم ګوته نیول شوې، چې انقره یې یوه ترهګر ډله ګڼي.
په غزه کې د روغتیايي چارواکو د څرګندونو له مخې؛ اسرائیلي ځواکونو له ۳۴ زره ډېر فلسطینیان وژلي، چې ډېر یې ملکيان او ماشومان دي. دا سیمه پر کنډواله بدله شوې او د خوراکي توکو سخت کمښت د قحطۍ وېره راپارولې ده.
اسرائیلو د اکټوبر پر اوومه د حماس د وسلهوالې ډلې د هغه برید په ځواب کې خپل هوایي او ځمکني بریدونه پیل کړل، چې د اسرائیلي ځواکونو د څرګندونو له مخې په کې ۱۲۰۰ کسان ووژل شول.
ترکیې په غزه کې د جګړې له کبله اسرائیل غندلی او د اوربند غوښتنه یې کړې ده.
ترکیې پر لویديځو هېوادونو هم نيوکه کړې، چې له اسرائيلو يې بشپړ ملاتړ کړی دی.
سیمه ییز خبرونه
د غزې په شمال کې د قحطۍ خطر ډېر دی
د بشري چارو لپاره د امریکا ځانګړي استازي د سې شنبې پر ورځ ویلي، چې اسرائیلو په وروستیو اوونیو کې غزې ته د مرستو رسولو لپاره د پام وړ ګامونه پورته کړي؛ خو د پام وړ کار پاتې دی، ځکه په دې سیمه کې د قحطۍ خطر ډېر دی.
د بشري چارو لپاره د امریکا ځانګړي استازي ډېوېډ سټېټرفیلډ خبریالانو ته ویلي، اسرائیلو په دې وروستیو دوه نیمو اوونیو کې د پام وړ ګامونه پورته کړي دي.
ډېوېډ سټېټرفیلډ څرګنده کړې: اوس هم د پام وړ کار پاتې دی، چې باید ترسره شي؛ خو پرمختګ شوی دی.
هغه ویلي، چې په ټوله غزه کې په جګړي توګه شمالي سیمې د قحطۍ له ډېر خطر سره مخ دي.
نوموړي ویلي، چې د فلسطین په کوچنۍ ګڼ میشته سیمه کې له اړو خلکو سره مرستې ته اوس ډېره اړتیا ده.
ملګرو ملتونو له اوږده وخت راپدیخوا په غزه کې د مرستې رسولو او د هغې د وېشلو په لار کې له خنډونو څخه اندېښنه ښودلې او څرګنده شوې، چې له تېرو شپږ میاشتو راپدیخوا د اسرائیلو لخوا د غزې د واکمنې اسلامي وسلهوالې ډلې حماس پر ضد هوايي او ځمکني بریدونه ترسره تر سره کیږي.
د اسرائیلو پوځي کمپاین د اکتوبر له میاشتې راپدیخوا، چې حماس د اسرائیلو په سویل کې جګړه پیل کړه، چې له کبله یې د بشري ناورین ترڅنګ د ۲ اعشاریه ۳ میلیون خلکو کورونه له ځمکې سره اوار شوي دي.
د ملګرو ملتونو د فلسطیني کډوالو ادارې (UNRWA) مشر فیلیپ لازاریني د سې شنبې پر ورځ ویلي، چې د اپریل پرپرتله غزې ته د تلونکو لاریو منځنی شمېر د ورځې ۳۱۶ ته لوړ شوی دی.
ویل کیږي، چې اوس کثافاتو راټولولو ته پاملرنه ډېره شوې او هڅه کیږي، چې په سویلي غزه کې د ناروغیو د خپریدو مخه ونیول شي.
سیمه ییز خبرونه
د ایران ولسمشر پر درې ورځني سفر پاکستان ته ولاړ
د ایران ولسمشر ابراهیم رییسي نن سهار ( دوشنبه د غویی درېیمه) د یوه لوړ پوړي سیاسي او اقتصادي پلاوي پر مشرۍ د پاکستان پلازمېنې اسلامآباد ته ورسېد.
د ایران اړوند رسنیو خبر ورکړی، چې دغه درې ورځنی سفر به د پاکستان له لوړ پوړو چارواکو سره د اقتصادي او سوداګریزو اړیکو پر پراختیا او پیاوړتیا، د دوه اړخیزو خبرو اترو او سیمهییزو سلامشورو په پام کې نیولو سره ترسره شي.
ټاکل شوې، چې د ایران ولسمشر به په دې سفر کې د دغه هېواد له ولسمشر اصف علي زرداري سره هم وګوري.
دغه راز د ایراني رسنیو د څرګندونو له مخې؛ پاکستان ته د ایران د ولسمشر د سفر پر مهال د دواړو هېوادونو ترمنځ د دواړو هېوادونو د مشرانو په حضور کې د سوداګرۍ، روغتیا، اقتصاد، امنیت او عدالت په برخو کې د اړدوند وزیرانو لهخوا د همکاریو یو شمېر سندونه لاسلیک شي.
دا سفر د پاکستان په بلوچستان ایالت کې د ایران له برید او د ایران په سیستان او بلوچستان ایالت کې د پاکستان له ځوابي بریدونو یوازې درې میاشتې وروسته رامنځته شوی دی.
-
تازه خبرونه2 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ4 days ago
د جاپان دوه پوځي چورلکې بحر ته وغورځېدې
-
تازه خبرونه4 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
نړۍ2 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
لوبی3 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
لوبی2 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
تازه خبرونه2 days ago
راشد خان د افغان بیسیم سوداګریز سفیر شو
-
سیمه ییز خبرونه3 days ago
د ایران ولسمشر پر درې ورځني سفر پاکستان ته ولاړ