۲۲ په سلو کې د میندو له تي بې برخې ماشومان مري

(Last Updated On: اګست 5, 2018)

په افغانستان کې هر کال دوه ویشت په سلو کې ماشومان؛ ځکه ژوند له لاسه ورکوي، چې میندې خپلې شیدې نه ورکوي.

د مور پر شیدو د ماشوم د تغذیې د اوونۍ په مناسبت جوړو شویو مراسمو کې د عامې روغتیا وزیر فیروزالدین فیروز وویل؛ په افغانستان کې میندې د ناپوهۍ له کبله نه غواړي، چې ماشوم ته خپلې شیدې ورکړي.

هغه دا هم څرګنده کړه، چې: دوه ویشت په سلو کې ماشومان؛ ځکه مري، چې میندې هغوی ته تی نه ورکوي او پر نورو خوراکي توکو یې تغذیه کوي.

نوموړي ویلي؛ د مور پر شیدو تر سره شوې څېړنې ښيي، چې د مور پر شیدو د تغذیې له کبله هر کال له یو میلیون ډېر لږ عمره ماشومان له مرګه ژغورل کیږي.

داکتران وايي، چې میندې باید تر شپږ میاشتو له خپلو شیدو پرته نور هیڅ ډول خواړه ماشوم ته ورنکړي.

د ملي وحدت حکومت اجرائیه رییس داکتر عبدالله عبدالله وایي، چې که څه هم جنګ او تاوتریخوالي ډېرې ستونزې رامنځته کړي او خلک ترې ډېر ځوریږي؛ خو په هره توګه د مور په غېږه کې ماشوم مهربانه لویږي او هر ماشومان باید تر دوه کلونو د مور پر شیدو تغذیه شي.

په دغو مراسمو کې له رسنیو او ملا امامانو وغوښتل شول، چې د ماشوم لپاره د مور د شیدو پر اهمیت ډېرې خبرې وکړي.

د ښځو چارو وزیرې دلبر نظري وایي؛ هغه کورنۍ، چې اقتصادي ستونزې لري او ماشومانو ته پوره خواړه برابرولی نشي؛ د مور شیدې ورته غوره ټاکنه ده.

د کرنې او مالدارۍ وزیر نصیر احمد درانی وایي، چې د مور پر شیدو د ماشوم ناسمه تغذیه او دغه راز له شپږ میاشتنۍ وروسته پر بېلابېلو خوړو د ماشوم پوره نه مړول؛ د خوارځواکۍ ستر علت دی.

دغه راز دا ډاډ هم څرګند شوی، چې د عامه پوهاوي له لارې به د مور پر شیدو د ماشوم پر تغذیه د مړینې په کچه کې لږوالی راشي.

About Ariana News

Check Also

د پکتیا د احمد ابا ولسوالۍ لاریونکوني د برښنا غوښتونکي شول

(Last Updated On: نوومبر 20, 2018) د پکتیا د احمد ابا ولسوالۍ اوسیدونکیو لاریون کړی …