عاجل خبرونه

کرکتپوه راشد خان ارمان له ملي او نړیوال ویاړ برخمن شوی

(Last Updated On: April 6, 2019)

د بدني روزنې کارپوهانو د سپورت ډګر ته ډېرې له ویاړه ډکې ځوانې څېرې وړاندې کړي، چې یوه یې هم د افغانستان د کرکت د ډګر د ملي لوبډلې بریالۍ او ځوانه څېره راشد خان ارمان دی، چې په ملي او نړیواله سطحه له ملي او نړیوال ویاړ برخمن شوی دی.

نوم یې راشد خان ارمان او ویل کیږي، چې د نړۍ د کرکت نابغه هم دی او ان ځینې هېوادونه ورته د تابعیت ورکولو په هڅه کې دي.

د کرکت د ډګر دغه لوبغاړی د ۱۳۷۷ لمریز لیږدیز کال د یکشنبې پر ورځ د وږي پر ۲۹ د هېواد د همیشه بهار ولایت( ننګرهار) په اچین ولسوالۍ کې نړۍ ته راغلی او د کرکت ډګر ته یې هم له همدې ولسوالۍ لومړني ګامونه راپورته کړل. د دغې لوبې په ډګر کې د ښه ځلیدو له کبله بریالی شو، چې په ۲۰۱۵ میلادي کال کې د ملي لوبډلې غړیتوب تر لاسه او نولسمه ګڼه آسماني رنګه جامې تر غاړې کړي.  

د کرکت لوبې دغه ځوان ۲۶ کلن لوبغاړی پر ښي لاس توپ اچونه کوي او پر همدې لاس د توپوهنې بریک لیګ هم تر سره کوي.

د هېواد د کرکت دغه نومیالي ستوری د نړۍ په بېلابېلو غوره لیګونو کې ښه ځلیدلی او د څو لوبډلو غړیتوب هم لري.

هغه په ۲۰۱۶ او ۲۰۱۷ کلونو کې د بنګلدیش په کومیلا ویکتورینز لوبډله کې ولوبیده. په داسې حال کې، چې د ۲۰۱۷ کال په بهیر کې  همهاله د ګایانا آمازونوریورز، د امریکا د کارائیب، د افغانستان د بند امیر د شپږیزې لیګ، ادیلایت ستریکرز، د آسترالیا ۲۰  آوریز  لیګ او د هند حیدرآباد سنرایزرز د لوبو ډګرونو ته وردننه شو او له هماغه کاله راپدیخوا د حیدر آباد د سنرایزرز، د ادیلایت سترایکرز او بند امیر د لوبډلو د غړیتوب ویاړ لري.

د هېواد او نړۍ دغه غوره توپوهونکي په ۲۰۱۸ کال کې څو ځله د انګلستان له ساسیکس، د افغانستان له کابل ځوانانو او د آفریقا له دوربان هیت سوپرلیګ  لوبډلو سره د لوبو ډګر ته وتلی دی.

په ۲۰۱۸ کال کې د راشد خان ارمان ځلیدنه د دې لامل شوه، چې په ۲۰ آوریزو لوبو کې د کرکت د نړیوالې شورا د نوملړ په سر کې ځای پیدا کړي او په یوه ورځنۍ لوبو کې د غوره لوبغاړي نوم خپل کړي. 

دا په داسې حال کې ده، چې د افغانستان د لوبو په تاریخ کې په لومړي ځل د هغه نوم د نړیوال کرکت

په ستر کتاب ویسدن کې ولیکل شو.

هغه، چې د هندوستان د تېر لیک یا آی پي ایل له ارزښتمنو لوبغاړیو څخه و د محمد نبي عیسی خېل تر څنګ د ځلیدو له کبله وتوانیده، چې د حیدرآباد سنرایزرز لوبډله تر اتلولۍ پورې ورسوي او د لوبو په ۲۰۱۹ څپرکي کې هم د همدې لوبډلې لپاره د یو نیم میلیو دالرو پر ارزښت د لوبې لپاره ونیول شو.

ویل کیږي، چې راشدخان ارمان د هېواد د کرکت ملي لوبډلې لپاره هم تر دې دمه ۵۲ یوه ورځنۍ او ۱۱۸ ویکتې، ۳۶- ۲۰ آوریزې نړیوالې لوبې د کرکت د نړیوالې شورا د غړیتوب له لرونکیو لوبډلو سره او ۶۹ ویکتې، د کرکت په الف نوملړ کې ۵۴ لوبې او ۱۲۲ ویکتې او ۱۵۱ – ۲۰ آوریزې لوبې  او۲۲۴ ویکتې ترسره کړي، چې په دې لوبو کې یې  له نامه سره د منډو رکود هم ثبت شوی دی.

ښاغلی راشدخان ارمان اوس هم په ملي لوبډله کې له ارزښت ډک ستوری پېژندل کیږي او د هندوستان په غوره  لیګ کې، چې د مارچ پر ۲۳ پیل شوی؛ د حیدر آباد سنرایزرز لوبډلې ته لوبیږي، چې په قانوني بڼه له آریانا نړیوالې شبکې خپریږي.

د یادونې ده، چې د وري پر ۱۵، چې د اپریل له ۵ سره برابره ده؛ د افغانستان کرکت بورد د غوراوي کمیتې لخوا راشدخان ارمان ته په نړیوال جام سیالیو کې د ۲۰ آوریزو لوبو د ډلمشرۍ ویاړ هم ورپه برخه شو؛ خو نوموړي همهاله په خپل تویت کې لدغه غوراوي سره مخالفت څرګند کړ او هغه یې د نړیوال جام د سیالیو لپاره یوه زیانمنه پرېکړه وګڼله.   

About Ariana News

Avatar

Check Also

کرکت بورد د درې کسانو دندې وځنډولې

(Last Updated On: July 6, 2019)د افغانستان کرکت بورد د سرپرست اجرائیه رییس اسدالله خان، …