په ۴۲ ورځو کې د څه باندې ۴ میلیون وګړیو پر تذکرو ستیکرونه لګیدلي

(Last Updated On: مې 29, 2018)

د ټاکنو خپلواک کمیسیون وایي، په ۴۲ ورځو کې د څه باندې څلور میلیون وګړیو پر تذکرو ستیکرونه لګول شوي او نږدې دوه زره کسانو د ولسي جرګې لپاره د نوماندۍ فورمې اخیستي او اتلس سوه کسانو د ولسوالیو شوراګانو لپاره ځانونه نوماند کړي دي.

د ټاکنو خپلواک کمیسیون غړی حفیظ الله هاشمي وایي، په درې زره درې سوه پېنځه مرکزونو کې څلور میلیون او ۲۱ زره کسانو ځانونه راجستر کړي، چې دوه میلیون او شپږ سوه زره یې نرینه، یو میلیون او دوه سوه زره یې ښځې، شپږ اویا زره کوچیان او څلور سوه اووه نوي هندوان دي.

په کابل کې څه باندې یو میلیون او څلویښت زره کسان ثبت شوي او په نورستان کې یو سلو دريدېرش زره اووه کسانو ځانونه ثبت کړي، چې کابل یې لوړ او نورستان یې ټیټ رقم لري.

د نوموړي په وینا؛ تر اوسه په ټول هېواد کې نږدې دوه زره کسانو د ولسي جرګې لپاره او اتلس سوه بیا د ولسوالیو شوراګانو لپاره ځانونه نوماند کړي. دوی باید په درې ورځو کې خپلې فورمې بېرته کمیسیون ته وسپاري.

د ولسي جرګې احتمالي کاندید غلام سخي پارسایي وایي: هیله من یم، چې دا بهیر روڼ او ټولو ته د منلو وړ وي.                     

د ولسي جرګې احتمالي کاندید میر افغان ساپی وایي: د کمیسیون کار د تېر په پرتله روڼ دی او هیله من یم، چې تر پایه همداسې پاتې شي.        

د دوشنبې پر ورځ ځینو سیاسي ګوندونو په یوه پرېکړه لیک کې د ټاکنو کمیسیون له اوسنیو کړنو سره مخالفت وکړ. په داسې حال کې، چې د ټاکنو خپلواک کمیسیون وایي، دوی خپلې پرېکړې د اساسي قانون او د افغانستان د ټاکنو قانون له مخې تر سره کړې دي.

خبریال: علی اصغري

About Ariana News

Check Also

په ننګرهار کې ۲۴ داعش جنګیالي ملي امنیت ته تسلیم شوي

(Last Updated On: نوومبر 18, 2018) په ننګرهار کې د ۹ بهرنیانو په ګډون څلیریشت …