ولسمشر غني د سیاسي ګوندونو د منحلیدو ګوتڅنډنه کړی- محمد محقق

(Last Updated On: سپتمبر 9, 2018)

د اجرائیه ریاست دوه یم مرستیال محمد محقق ادعا کړې، چې: ولسمشر غني سیاسي ګوندونو ته ګوتڅنډنه کړې، چې که پخپلو غوښتونو ټينګار وکړي؛ نو ګوندونه به یې منحل کړي.

پارلماني ټاکنو ته له دوه میاشتو لږ وخت پاتې دی؛ خو حکومتي چارواکي او د سیاسي ګوندونو غړي سر له اوسه د ټاکنو په اړه یوه خوله ندي او د درغلیو د کیدو وېره څرګندوي.

د اجرائيه ریاست دوه یم مرستیال محمد محقق پخپله پر حکومت نیوکه کوي، چې غواړي په ټاکنو کې درغلي وکړي او د ځان په ګټه یې راوڅرخوي.

هغه سیاسي ګوندونوته د ولسمشر هغه ګوتڅنډنه هم وریادوي، چې د ده په وینا د ګوندونو د منحلولو په اړه یې کړې ده.

اجرائيه رییس عبدالله عبدالله د ټاکنو په اړه ځينې سپارښتنې کوي او وایي؛ سمه ده، چې ستونزې لرو، خو ټاکنې هم راروانې دي او هیله من یم، چې د سیاسي ګوندونو غوښتنو ته به په کې پاملرنه وشي.   

له دې ټولو اختلافونو او ستونزو سره سره، سیاسي ګوندونه ټينګار کوي، چې د قدرت او واک د لیږد لپاره له ټاکنو پرته بل غوراوی نشته.

د دعوت ګوند رهبرعبدرب رسول سیاف وایي، چې د ټاکنو تر سره کول اړین دي او هیڅ خنډ یې د ترسره کیدو مخه نشي نیولی.

د ولسمشر دوه یم مرستیال سرور دانش هم ټينګار کوي، چې له اوسني حالت څخه د وتو لپاره له ټاکنو پرته بل غوراوی نشته. دا په داسې حال کې ده، چې: د افغانستان لوی ملي ائتلاف څو ورځې مخکې سلګونه زره داسې جعلي تذکرې رسنیو ته وښودې، چې جعلي وېشل شوي او په ټاکنو کې د ګډون ځانګړی نښه یا ستيکر هم پرې لیګدلی دی.

د احمدشاه مسعود د بنیاد رييس احمد ولي مسعود وایي، چې مونږ باید د دیموکراسۍ د بنسټونو د ټینګیدو لپاره رڼې ټاکنې ومنو؛ ځکه پرته لدې به بې ثباتي نوره هم ډېره شي.

د پارلماني ټاکنو په اړه د چارواکو او سیاسي ګوندونو د نظر اختلافونه مخ په زیاتیدو دي او داسې اندېښنې یې هم را پورته کړي، چې ښايي ټاکنې وځنډيږي او روان ترینګلی حالت نور هم ترینګلی شي.

خبریال: باعث حیات

About Ariana News

Check Also

ELECTION97 17.Dec.2018| انتخابات ۹۷: آمادگی‌ها برای روند نام نویسی انتخابات ریاست جمهوری

(Last Updated On: دسمبر 18, 2018)