عاجل خبرونه

نی: طالبان د خبريالانو کورونه لټوي چې د حقايقو د خپرولو مخه ونيسي

(Last Updated On: October 4, 2015)

وسله والو طالبانو په کندز کې بشر ضد جرمونو په لړ کې د رسنیو څلور دفترونه سوځولي دي او د سیمه يیزې راډیو یو خبریال یې وژلی دی. د افغانستان د آزادو رسنیو د ملاتړ اداره (نی) وايي چې وسله وال طالبان د خبریالانو کورونه لټوي ترڅو د حقایقو د خپرولو مخه ونیسي. د دغه بنسټ ريیس د بشري حقونو له خپلواک کمیسیون څخه غوښتنه کوي چې د طالبانو دغه عمل جنګي جنایت وګڼي.

په کندز د وسله والو طالبانو له ولکې وروسته د افغانستان د آزادو رسنیو د ملاتړې ادارې (نی) رپوټونه خپاره کړل چې وسله والو طالبانو په عامه المنفعه ځایونو او خلکو هېڅ رحم نه دی کړی او بشري جنایتونه یې کړي دي.

د نی مسولین وايي چې وسله والو طالبانو د رسنیو ځيني دفترونه چور کړي او یو خبریال یې وژلی دی.

د افغانستان د آزادو رسنیو د ملاتړ ادارې اجرايي رییس مجیب خلوتګر وايي:

«د رسنيو څلور دفترونه ځينې سوزول شوي او ځينې هم لوټل شوي دی، د نړيوالو بشري حقوقو له مخې بايد په جګړه کې عام المنفعه ځايونه خوندي وي. په جګړه کې ښکېلې دواړې غاړې يې بايد وساتي. د کندوز په جګړه کې په تېرو څلورويشتو ساعتونو کې د پښتونيار په نوم د سيمه ييزې راډيو يو خبريال وژل شوی دی.»

د دغه بنسټ مسولین اندېښنه څرګندوي چې لا هم وسله وال طالبان د خبریالانو د لټون هڅې کوي.

د افغانستان د آزادو رسنیو د ملاتړ ادارې اجرايي رییس مجیب خلوتگر زياتوي:

«طالبان نه بشري حقونو او نه هم اسلام ته درناوی لري، دوی عام خلک او خبريالان ځوروي، دوی د هر خبريال کور پلټي او نه يې پرېږدي چې حقيقتونه خپاره کړي.»

له کندز څخه رپوټونه وايي چې په تازه عملیاتو کې د دغه ښار زیاتره برخه له وسله والو طالبانو پاکه شوې ده.

 

 

About Ariana News

Avatar

Check Also

په کابل کې ۱۰۰۰۰ کورنیو ته د خوراکي توکو مرسته ووېشل شوه

(Last Updated On: April 7, 2020)له کرونا ویروس څخه د ژغورنې جرګه ګۍ په ډاګه …