عاجل خبرونه

نبیل: حکومت د داعش د ځپلو لپاره ستر پروګرام لري

(Last Updated On: جون 27, 2015)

vlcsnap-2015-06-27-12h33m08s198

د ملي امنیت لوی رییس رحمت الله نبیل په ننګرهار کې د داعش فعالیت د اندیښنې وړ وباله او وایي؛ افغان حکومت د داعش د ځپلو لپاره ستر پروګرام لري.

په همدې حال کې د کورنیو چارو وزارت وایي، داعش په سویل او سویل ختیځو سیمو کې د فعالیت تر څنګ د بدخشان او کندز په لور هم حرکت پیل کړی دی.

د کورنیو چارو وزارت د ویاند مرستیال نجیب الله دانش          وایي، د هېواد په ختیځ کې د داعش او طالبانو تر منځ سخته جګړه روانه ده او افغان ځواکونه له دې فرصت پر استفادې دواړه ډلې ځپي.

افغان چارواکي داعش نه پخلاکېدونکې ډله او د افغانستان د امنیت لپاره جدي ګواښ بولي؛ خو اټکل دا دی چې داعش هیڅکله په افغانستان کې د طالبانو ځای نه شي نیولی؛ ځکه چې د خلکو له ملاتړ نه  ده برخمنه.

د ملي امنیت لوی رییس وایي، د طالبانو او داعش تر منځ هیڅ توپیر نشته او دوی د دې ډلې د ځپلو لپاره ستر پروګرام لري.

افغان ځواکونه وایي چې د داعش جنګیالي مخکې له دې هم د افغانستان په جنګ کې ښکېل وو، خو په عراق او سوریه کې د داعش جنګیالیو له ملاتړ نه دي برخمن.

مخکې له دې ولسمشر له رسنیو سره ناسته کې ویلي و چې داعش جنګیالي د ننګرهار په نازیانو، بټي کوټ، شینواري، شېرزاد، خوږياڼیو او غني خېلو ولسوالیو کې فعال دي، او له دې لارې غواړي چې مرکزي آسیا ته ګواښ پیښ کړي.

د کورنیو چارو وزارت موندنې هم ښیی چې اوس دې ډلې د کنړ، بدخشان او د کندز د ځینو سیمو پر لور هم حرکت پیل کړی دی.

کارپوهان وایي، داعش د طالبانو برخلاف له زیاتو مالي سرچینو برخمن دي.

ویل کیږي چې داعش هر جنګیالي ته سلګونه ډالر معاش ورکوي. هغوي غواړي لکه طالبان پراخې سیمې لاندې کړي؛ خو د ملي دفاع وزارت د ویاند مرستیال دولت وزیری وایی، دا ډله نه شي کولای چې افغانستان کې د پښې ځای پیدا کړی.

روسیه چې داعش سیمې ته ګواښ بولي، وایي، دا ډله د افغانستان د څلور دیرشو ولایتونو له جملې په پنځه ویشتو هغو کې  حضور لري.

پخوانی ولسمشر حامد کرزی وایي، په افغانستان کې د داعش ناڅاپي ظهور د بهرنیانو د ملاتړ پایله ده.

 

About Ariana News

Check Also

د کابل پوهنتون د لیلیې زدکوونکیو نښته کړې

(Last Updated On: نوومبر 15, 2018) د کابل پوهنتون دلیلې د محصلینو ترمنځ د پنجشنې …