عاجل خبرونه

له پاكستان سره په سوداګريزه راكړه وركړه كې شپېته په سلو كې كمى راغلى دى

(Last Updated On: اپریل 28, 2014)

د افغانستان د سوداګرۍ خونې مسئولين وايي، له پاكستان سره د افغانستان په سوداګريزه راكړه وركړه كې شپېته په سلو كې كمى راغلى دى.

مسئولين وايي، د افغانستان او پاكستان د سوداګرۍ خونو ترمنځ به د چهارشنبي په ورځ ( د غویي ۱۰ ) په اسلام اباد كي غونډه جوړه شي، چې د سود اګريزو اړيكو د لاټينګښت پر سر خبرې پكې كېږي.

د كلونو هڅو او بېلا بېلو تړونونو سر بېره لاهم د ترانزيت په برخه كې له پاكستان سره د افغانستان ستونزې نه دي حل شوې.

د افغانستان د سوداګرۍ خونې مرستيال خان جان الكوزي وايي:

د پاكستان د كراچي لاره، چې افغان سوداګرو ته د خپلو مالونو د انتقال لپاره ډېره نږدې او مهمه لاره ده، خو پاكستان حكومت افغان سوداګرو ته ترانزيټي ستونزې جوړوي.

دى همدارنګه وايي، دا ستونزې د دې لامل شوې، چې افغان سوداګر د پاكستان د كراچۍ بندر پر ځاى نورو بندرونو او لارو ته مخه كړي.

د هغه په وېنا دا كار د دې لامل شو، چې په روان كال كې د پاكستان او افغانستان سوداګريزه راكړه وركړه شپېته په سلو كې را كمه شي.

د خان جان الكوزي په وېنا په اسلام آباد كې د دواړو هېوادونو د سوداګرۍ خونو په غونډه كې به پر دغو ستونزو خبرې وشي.

په غونډه کې به نږدي ۹۰ سوداګر او د دواړه هېوادونو لوړ پوړي چارواكي برخه ولري.

د دواړو هېوادونو د سوداګرۍ د خونو نهمه غونډه په داسې حال كې جوړېږي، چې افغان سوداګر اوس خپل مالونه له ایران څخه افغانستان ته راوړي.

About Ariana News

Check Also

که موقت حکومت سوله راپه برخه کوي، ملاتړ یې اړین دی- زاخېلوال

(Last Updated On: فبروري 14, 2019) د پاکستان په اسلام آباد کې د افغانستان پخوانی …