طالبانو ته د سولې وړاندیز د تسلیمۍ معنا نلري- امریکا

(Last Updated On: March 06, 2018 7:09 pm)

د امریکا د بهرنیو چارو وزارت له وسلوالو طالبانو غوښتي، چې د ولسمشر غني د سولې پر وړاندیز سم غور وکړي؛ ځکه، چې د سولې وړاندیز یې د تسلیمۍ معنا نلري.

د امریکا د بهرنیو چارو وزارت مرستیاله الیس ولز په ډاګه کړې، چې طالبانو د افغان دولت د سولې له تازه وړاندیزه د تسلیمۍ معنا اخیستې؛ خو د ولسمشر خبرې د طالبانو د تسلیمي په معنا ندي او طالبانو ناسمه ادعا کړې ده.

هغه زیاتوي؛ ولسمشر غني د طالبانو د تسلیمۍ غوښتنه نه ده کړې. ولسمشر غني یوه باعزته سوله د سیاسي وړاندیز په اډانه کې وړاندې کړې او اوس د طالبانو پرېکړې ته په تمه(طمع) دی.

که څه هم په تېره یوه اوونۍ کې د سولې عالي شورا له طالبانو ځواب نه دی تر لاسه کړی؛ خو له هغو غواړي، چې د سولې دې وړاندیز ته غاړه کیدي.

د سولې عالي شورا مرستیال عزیز الله دین محمد وایي، ملي او نړیوال ذهنیتونه چمتو شوي، چې جنګ نور د ستونزو د حل لار نده. مونږ ګډې ناستې ته هیله من یو او ستونزې به هم د خبرو له لارې حلوو.

ځینې سیاستوال په دې باور دي، چې د کابل ناستې د سولې بهیر څارلی او دولت یې مسوولیت لري.

د افغانستان د نوې ملي جبهې مرستیال صدیق پتمن څرګنده کړې، چې سوله له جنګ سره توپیر لري؛ کله مو، چې د سولې غږ پورته کړ باید ترې بشپړ ملاتړ هم وشي. دا د طالبانو لپاره ښه پیغام دی، چې له هر ځایه یې پیلوي باید پیل یې کړي او د سولې په اړه وخت له لاسه ورنکړي.           

ځینې خلک بیا په دې باوردي، چې د سولې دغه وړاندیز یوه سیاسي پروژه ده.

سیاسي فعال داوود ناجي وایي؛ د دې پر ځای، چې د کابل پروسه د سولې لپاره یو منظم کمپاین وي، ملي وحدت حکومت په ځانګړي بڼه ارګ ترې د سیاسي کمپاین په توګه  کار اخلي.    

د افغانستنان لپاره د روسیې ځانګړي استازي ضمیرکابلوف ویلي؛ هېواد یې تیار دی، چې له افغان حکومت او امریکا سره د معتدلو طالبانو په خبرو اترو کې منځګړیتوب وکړي.

خبریال: علی اصغري

About Ariana News

Check Also

په ايران کې پر پوځي پريډ وسلوال بريد مرګ و ژوبله اړولې

(Last Updated On: September 22, 2018 2:28 pm) د ایران په جنوب اهواز ښار کې …