عاجل خبرونه

صديق صديقي: تر اوسه کندوز کې ستر پوځي عمليات نه دي پيل شوي

(Last Updated On: September 30, 2015)

د کورنیو چارو وزارت وايي چې د کندوز د مرکز د نیولو له پاره تر اوسه ستر پوځي عملیات نه دي پیل شوي. د دغه وزارت ویاند صدیق صدیقي وايي چې په کندوز کې به ډېر ژر ستر چاڼیز عملیات پیل کړي. له بلې خوا یو شمېر کارپوهان وايي چې افغان ځواکونه باید کندوز کلابند کړي تر څو وسله وال د وتلو چانس تر لاسه نه کړي.

له کندوز څخه تر لاسه شوي رپوټونه وايي چې وسله والو طالبانو د ولایت په مرکز کې کور په کور تلاشي پیل کړې او له دولت سره د کار په تور یې کسان بېولي.

دا په داسې حال کې ده چې ویل کېږي سلګونه ځانګړي افغان سرتېري دغه ولایت ته رسېدلي، خو لا يې د و سله والو طالبانو په خلاف چاڼیزعملیات نه دي پیل کړي.

پوځي کارپوه جاوېد کوهستانی وايي: «د کندوز په هوايي ډګر کې چې کوم ځواکونه دي له مرکز څخه د عملياتو اجازه نه ده ورکړل شوې، کوم کسان چې په کندوز کې د عملیاتو اجازه نه ورکوی تر اوسه هم فعال دي.»

پوځي کارپوه عتیق الله امرخېل وايي: «کندوز دې ډېر ژر کلابند شي، د وسایطو د تګ راتګ لارې دې وتړل شي، د مخالفينو کوم وسایط چې راځي بايد په دقیقه توګه کشف او کنټرول کړل شي. دا به زموږ په ګټه وي.»

د کورنیو چارو وزارت وايي چې که څه هم په کندز کې د طالبانو پر خلاف هوايي بریدونه دوام لري او ځمکني بریدونه او چاڼيز عملیات به هم ډېر ژر پیل کړي.

د کورنیو چارو وزارت ویاند صدیق صدیقي وايي: «د هر قدم د اخيستو په اړه فکر کوو بيا وړاندې ځو، اساسي هدف مو دا دی چې ډېر ژر له خپلو ټولو امکاناتو کار واخلو او کندوز بېرته په ولکه کې راولو.»

مسولین وايي چې وسله والو طالبانو په کندوز کې له یو شمېر بانکونو څخه پیسې ایستلې دي. دغه راز وسله والو طالبانو له افغان سرتېرو څخه ګڼې وسلې او مهمات نیولي او د دې وېره هم شته چې جګړه به د ډېر وخت له پاره دوام وکړي.

About Ariana News

Avatar

Check Also

د طالب بندیانو د خلاصون بهیر یو ځل بیا له تخنیکي ستونزو سره مخ شو

(Last Updated On: April 4, 2020)د حکومت او طالبانو تخنیکي ډلې په څلورمه ورځ هم …